Judas 1:1-25

  • Kumprimentus (1, 2)

  • Mestre falsu sira sei hetan tesi-lia (3-16)

    • Miguel haksesuk malu ho Diabu (9)

    • Enoc nia profesia (14, 15)

  • Hela nafatin iha Maromak nia domin (17-23)

  • Fó glória ba Maromak (24, 25)

 Haʼu Judas, Tiago nia alin,+ no Jesus Kristu nia atan ida, haʼu hakerek ba sira neʼebé Aman Maromak hili ona+ no hadomi, neʼebé nia tau matan atu bele sai ida deʼit ho Jesus Kristu:+  Haʼu harohan katak Maromak sei aumenta liután ninia laran-sadiʼa, dame no domin ba imi.  Maluk doben sira, foufoun haʼu hakarak tebes hakerek ba imi kona-ba oinsá Maromak sei salva ita,+ maibé agora haʼu haree katak haʼu presiza hakerek hodi fó laran-manas ba imi, atu imi luta makaʼas hodi defende fiar+ neʼebé fó ona ba ema santu* sira dala ida deʼit ba nafatin.  Haʼu-nia razaun atu hakerek ba imi mak tanba ema balu tama ona iha imi-nia leet. Sira mak ema neʼebé Eskritura fó-hatene horiuluk kedas atu hetan tesi-lia. Ema aat sira-neʼe uza sala Maromak nia laran-diʼak neʼebé boot hodi halo hahalok aat toʼo la sente moe*+ no la laran-metin ba ita-nia Naʼi Jesus Kristu neʼebé sosa fali ona ita.+  Haʼu hakarak fó-hanoin imi maski imi hatene didiʼak ona kona-ba buat sira-neʼe hotu, katak Jeová* salva povu ida husi rai-Ejitu,+ maibé ikusmai nia halakon tiha sira neʼebé la hatudu fiar.+  Kona-ba anju sira neʼebé la kaer metin ba sira-nia pozisaun* hodi husik tiha sira-nia hela-fatin neʼebé loos,+ nia kesi metin sira nafatin iha nakukun laran toʼo sira hetan tesi-lia iha Maromak nia loron boot.+  Nuneʼe mós ho Sodoma no Gomorra no sidade neʼebé haleʼu sira, sira mós entrega sira-nia an hodi halo sala seksuál* no halo tuir deʼit sira-nia hakarak isin nian neʼebé sala.+ Sira hetan kastigu ho ahi neʼebé lakan ba nafatin,* no neʼe sai nuʼudar avizu ba ita.+  Maski nuneʼe, ema sira-neʼe mós hanoin kona-ba buat aat iha sira-nia neon,* halo hahalok neʼebé hafoʼer isin, hakribi sira neʼebé iha podér, no koʼalia aat ema sira neʼebé iha glória.+  Maibé kuandu arkanju+ Miguel+ haksesuk malu ho Diabu kona-ba Moisés nia mate-isin,+ nia hatudu haraik an no la tesi-lia ba Diabu ho liafuan aat,+ maibé nia hatete: “Jeová* sei korrije ó.”+ 10  Maibé ema sira-neʼe koʼalia aat kona-ba buat hotu neʼebé loloos sira la komprende.+ No hanesan animál neʼebé labele hanoin,+ sira komprende deʼit buat hotu neʼebé sira sente, no sira kontinua hafoʼer sira-nia an ho buat sira-neʼe. 11  Susar ba sira, tanba sira halo tuir ona Caim nia hahalok,+ no sira lalais atu halo tuir Balám+ nia hahalok neʼebé sala tanba hakarak simu kolen, no sira mós lakon ona tanba sira halo tuir Kora+ neʼebé koʼalia kontra+ ema sira neʼebé iha podér! 12  Ema sira-neʼe han hamutuk ho imi iha festa neʼebé imi halo atu hatudu imi-nia domin,+ maibé sira hanesan fatuk neʼebé subar iha tasi okos, sira mak bibi-atan neʼebé la moe hodi fó-han deʼit sira-nia an;+ sira hanesan kalohan neʼebé la lori udan no anin huu bá-mai;+ sira hanesan ai-hun neʼebé la iha fuan maski toʼo ona ninia tempu, neʼebé mate dala rua* no fokit sai ona; 13  hanesan tasi nia laloran neʼebé siʼak no hasai furin, sira hasai hahalok neʼebé la iha moe;+ sira hanesan fitun neʼebé la laʼo tuir ninia dalan no Maromak tau ona sira iha fatin neʼebé nakukun tebes ba nafatin.+ 14  Sin, Enoc,+ neʼebé nuʼudar jerasaun hitu husi Adão, nia mós fó sai profesia kona-ba sira, hodi dehan: “Haree bá! Jeová* mai ona ho ninia anju santu sira rihun ba rihun+ 15  atu tesi-lia ba ema hotu,+ no fó kastigu ba ema aat hotu tanba hahalok aat sira neʼebé sira halo no tanba liafuan aat tebes neʼebé sala-naʼin sira koʼalia hasoru nia.”+ 16  Ema sira-neʼe muramura,+ no la kontente ho buat neʼebé sira simu ona iha sira-nia moris. Sira halo tuir deʼit sira-nia hakarak rasik,+ no sira-nia ibun gaba an kona-ba buat neʼebé boot no koʼalia liafuan midar ba ema seluk* atu sira bele manán buat ruma.+ 17  Maibé kona-ba imi, maluk doben sira, hanoin-hetan liafuan sira neʼebé uluk hatoʼo ona ba imi* liuhusi ita-nia Naʼi Jesus Kristu nia apóstolu sira. 18  Sira koʼalia beibeik ba imi, hodi dehan: “Iha tempu nia rohan, gozadór sira sei mosu mai, no sira sei halo tuir deʼit sira-nia hakarak rasik hodi halo buat neʼebé aat.”+ 19  Sira halo ema haketak malu,+ sira hatudu hahalok hanesan animál,* no sira la iha Maromak nia espíritu.* 20  Maibé kona-ba imi, maluk doben sira, hametin imi-nia fiar neʼebé santu no halo orasaun tuir espíritu santu,+ 21  atu nuneʼe, imi bele hela nafatin iha Maromak nia domin,+ no hein nafatin ita-nia Naʼi Jesus Kristu atu hatudu laran-sadiʼa hodi lori ita atu hetan moris rohan-laek.+ 22  Imi mós kontinua hatudu laran-sadiʼa+ ba ema balu neʼebé duvida hela;+ 23  salva sira+ hodi hasai sira husi ahi. Maibé kontinua hatudu laran-sadiʼa ba ema seluk, halo nuneʼe ho laran-taʼuk, no iha tempu hanesan, imi odi sira-nia roupa neʼebé iha noda tanba halo hahalok aat.+ 24  Maromak neʼebé iha glória bele proteje imi atu labele sidi no bele halo imi hamriik ho ksolok boot nuʼudar ema neʼebé moos iha ninia oin.+ 25  Iha Maromak mesak ida deʼit, nia mak ita-nia Salvadór liuhusi ita-nia Naʼi Jesus Kristu. Maromak iha glória, kmanek, forsa no podér, husi tempu uluk kedas, agora no ba nafatin. Amen.

Nota-rodapé

Lian Gregu, asélgeia. Haree Glosáriu.
Haree Ap. A5.
Neʼe katak sira-nia fatin ka pozisaun iha lalehan.
Ka “ema sira-neʼe mós gosta mehi”.
Haree Ap. A5.
Ka “maran-dekor”.
Haree Ap. A5.
Ka “no admira ema nia hahalok”.
Ka “buat sira neʼebé fó sai nanis ona ba imi”.
Ka “sira tuir deʼit hakarak isin nian”.
Ka “sira laʼós ema espirituál”.