Segundu Tesalónika 1:1-12

  • Kumprimentus (1, 2)

  • Ema Tesalónika nia fiar sai metin tebes (3-5)

  • Maromak sei fó kastigu ba ema neʼebé la halo tuir (6-10)

  • Orasaun ba kongregasaun (11, 12)

1  Haʼu Paulo, Silvano* no Timóteo,+ haruka karta neʼe ba kongregasaun* Tesalónika neʼebé ida deʼit ho ita-nia Aman Maromak no Naʼi Jesus Kristu:  Haʼu harohan katak Aman Maromak no Naʼi Jesus Kristu sei hatudu laran-diʼak neʼebé boot no haraik dame ba imi.  Maun-alin sira, ami iha obrigasaun atu fó obrigadu beibeik ba Maromak kona-ba imi. Ami halo nuneʼe tanba imi-nia fiar sai metin tebes no imi ida-idak nia domin ba malu aumenta ba beibeik.+  Tan neʼe, ami koʼalia ho orgullu kona-ba imi+ iha Maromak nia kongregasaun sira-nia leet tanba iha terus no susar hotu neʼebé imi hasoru* daudaun, imi tahan no hatudu fiar.+  Neʼe mak prova neʼebé hatudu katak Maromak tesi-lia ho loloos, no rezultadu mak nia sei sura imi nuʼudar ema neʼebé merese atu simu Maromak nia Ukun,* no imi hetan terus daudaun tanba Ukun neʼe.+  Tanba Maromak mak laran-loos, nia sei fó kastigu ba sira neʼebé fó-terus ba imi.+  Maibé ba imi neʼebé agora hetan terus, Maromak sei fó kmaan ba imi hamutuk ho ami iha tempu neʼebé Naʼi Jesus+ mosu mai husi lalehan hamutuk ho ninia anju sira neʼebé iha kbiit boot+  ho ahi neʼebé lakan, no nia sei fó kastigu* ba sira neʼebé la hatene Maromak no ba sira neʼebé la halo tuir liafuan diʼak kona-ba ita-nia Naʼi Jesus.+  Naʼi sei tesi-lia hodi kastigu ema sira-neʼe. Sira sei lakon ba nafatin+ husi Naʼi nia oin no la haree tan ninia kbiit neʼebé kmanek. 10  Iha tempu neʼebé Naʼi mai atu simu glória hamutuk ho ninia ema santu* sira, sira hotu neʼebé hatudu fiar ba nia sei hateke ho hakfodak, inklui mós imi tanba imi tau fiar ba liafuan neʼebé ami fó sai ba imi. 11  Tan neʼe, ami sempre halo orasaun kona-ba imi, atu nuneʼe ita-nia Maromak bele sura imi nuʼudar ema neʼebé merese atu simu kolen neʼebé nia bolu+ imi atu simu. No ami mós harohan atu Maromak uza ninia kbiit hodi halo kompletu buat diʼak hotu neʼebé nia hakarak no buat neʼebé imi halo daudaun tanba imi-nia fiar. 12  Atu nuneʼe, ita-nia Naʼi Jesus nia naran bele simu glória liuhusi imi, no imi simu glória tanba sai ida deʼit ho nia, hodi tuir ita-nia Maromak no Naʼi Jesus Kristu nia laran-diʼak neʼebé boot.

Nota-rodapé

Ninia naran seluk mak Silas.
Ka “tahan”.
Ka “Reinu; Governu”.
Ka “sei selu fali”.