Primeiru Pedro 1:1-25

  • Kumprimentus (1, 2)

  • Moris fali dala ida tan hodi iha esperansa neʼebé ba nafatin (3-12)

  • Sai santu bá nuʼudar oan neʼebé halo tuir Maromak (13-25)

1  Haʼu Pedro, Jesus Kristu nia apóstolu ida,+ hakerek ba imi neʼebé hela namkari iha Pontus, Galásia, Kapadósia,+ Ázia no Bitínia. Haʼu hakerek ba imi neʼebé Maromak hili ona neʼebé hela temporáriu iha mundu neʼe.  Aman Maromak hili imi tuir ninia hakarak neʼebé nia deside nanis ona.+ Nia halo imi santu* ho ninia espíritu,+ atu nuneʼe imi bele halo tuir nia, no hisik Jesus Kristu nia raan ba imi:+ Haʼu harohan katak Maromak sei haraik ninia laran-diʼak boot no dame barak liután ba imi.  Fó hahiʼi ba Maromak, ita-nia Naʼi Jesus Kristu nia Aman, tanba tuir ninia laran-sadiʼa neʼebé boot mak nia halo ita moris fali dala ida tan+ hodi iha esperansa neʼebé ba nafatin+ liuhusi Jesus Kristu nia moris-hiʼas husi mate.+  Maromak fó ba imi liman-rohan neʼebé labele rahun no sai aat.+ Nia rai hela liman-rohan neʼe ba imi iha lalehan,+  no Maromak proteje imi liuhusi ninia kbiit tanba imi-nia fiar, atu imi hetan salvasaun neʼebé sei hatudu sai iha tempu nia rohan.  Tan neʼe mak imi haksolok tebes, maski karik imi sente laran-susar ba tempu uitoan tanba hasoru terus oioin,+  atu nuneʼe, imi-nia fiar neʼebé hetan ona koko+ bele halo imi hetan hahiʼi, glória no respeitu iha tempu neʼebé Jesus Kristu hatudu sai ninia an.+ Imi-nia fiar neʼe folin-boot liu fali osan-mean neʼebé bele mohu maski koko* ona ho ahi.  Maski imi la haree Kristu, maibé imi hadomi nia. Maski agora imi la haree nia, maibé imi hatudu fiar ba nia no haksolok tebes, no liafuan la toʼo atu esplika kona-ba ksolok boot neʼe,  tanba liuhusi imi-nia fiar neʼe mak imi sei hetan salvasaun.+ 10  Profeta sira neʼebé fó sai nanis kona-ba Maromak nia laran-diʼak boot neʼebé nia hatudu ba imi, sira husu ho badinas no buka-hatene kona-ba salvasaun neʼe.+ 11  Antes neʼe, Maromak uza ninia espíritu atu fó-hatene sira katak Kristu sei hetan terus,+ no tuirmai hetan glória. Tan neʼe mak sira kontinua buka-hatene kona-ba saida mak sei akontese ba Kristu+ no bainhira mak buat sira-neʼe sei akontese. 12  Maromak hatudu sai ba sira katak sira laʼós serbí sira-nia an rasik, maibé serbí imi. Tanba profeta sira hakerek kona-ba buat neʼebé agora fó sai ona ba imi, no imi rona ida-neʼe liuhusi sira neʼebé haklaken liafuan diʼak ba imi ho ajuda husi espíritu santu neʼebé haruka mai husi lalehan.+ Anju sira mós hakarak buka-hatene kona-ba buat sira-neʼe. 13  Tan neʼe, prepara imi-nia neon atu halo serbisu.+ Kontinua matan-moris kona-ba buat hotu.+ Tau imi-nia esperansa ba Maromak nia laran-diʼak boot neʼebé sei fó ba imi iha tempu neʼebé Jesus Kristu hatudu sai ninia an. 14  Nuʼudar oan neʼebé halo tuir Maromak, labele hatudu tan hahalok neʼebé tuir imi-nia hakarak aat neʼebé uluk imi iha bainhira imi seidauk hatene Maromak, 15  maibé imi-nia hahalok hotu tenke santu hanesan Maromak Santu neʼebé bolu imi,+ 16  tanba hakerek nanis ona: “Imi tenkesér santu, tanba haʼu santu.”+ 17  Se imi harohan ba Aman neʼebé tesi-lia hodi la todan ba sorin+ tuir ema ida-idak nia hahalok, imi tenke hatudu katak imi hamtaʼuk Maromak+ durante tempu neʼebé imi hela temporáriu iha mundu neʼe. 18  Imi hatene katak laʼós ho buat neʼebé sei mohu hanesan osan-mutin ka osan-mean mak Maromak halo imi sai livre*+ husi imi-nia dalan moris nian neʼebé folin-laek, neʼebé imi simu husi imi-nia beiʼala sira.* 19  Maibé nia salva imi ho Kristu+ nia raan neʼebé folin-boot,+ neʼebé hanesan raan husi bibi-malae oan neʼebé la iha aat ida no la foʼer.+ 20  Loos duni, Maromak hili ona Kristu antes mundu hahú,*+ maibé Maromak hatudu sai nia iha tempu neʼe nia rohan tanba imi-nia diʼak.+ 21  Liuhusi nia mak agora imi fiar Maromak,+ neʼebé halo nia moris hiʼas husi mate+ no fó glória ba nia,+ atu nuneʼe imi bele tau fiar no esperansa iha Maromak. 22  Agora imi hamoos tiha ona imi-nia an* hodi halo tuir lia-loos no rezultadu mak imi iha domin neʼebé la laran-makerek ba malu hanesan maun-alin,+ tan neʼe hadomi malu tebetebes bá husi laran.+ 23  Tanba imi moris fali dala ida tan,+ laʼós ho fini neʼebé sei dodok, maibé ho fini neʼebé labele dodok,*+ liuhusi liafuan husi Maromak neʼebé moris no la iha rohan.+ 24  Tanba “ema hotu* mak hanesan duʼut, no sira-nia glória hotu mak hanesan ai-funan iha rai-luan; duʼut sai namlaek, no ai-funan mós monu, 25  maibé Jeová* nia liafuan sei hela ba nafatin”.+ No “liafuan” neʼe mak liafuan diʼak neʼebé haklaken ona ba imi.+

Nota-rodapé

Ka “hamoos”.
Orj., “Maromak sosa fali imi”.
Ka “imi-nia tradisaun”.
Neʼe refere ba tempu neʼebé Adão no Eva nia oan sira moris.
Neʼe katak fini neʼebé bele fó fuan.
Orj., “isin hotu”.
Haree Ap. A5.