Hosea 2:1-23
2 Taigi den brada fu unu: ’Unu na mi pipel!’*
Taigi den s’sa fu unu: ’Gado o sori sar’ati gi unu!’*
2 Tyari un m’ma go na fesi krutu èn meki den krutu en,bika en a no mi frow èn mi a no en masra.
Meki a tapu nanga a huru di a e huruèn no meki a waka moro gi en masra.
3 Noso mi o puru ala en krosi na en skin èn mi o meki a de nanga sososkin neleki fa a ben de di en m’ma meki en.Mi o meki a kon de leki wan sabanaèn leki wan presi pe watra no de.Mi o meki watra kiri en teleki a dede.
4 Mi no o abi sar’ati gi den manpkin fu en,fu di a kisi den nanga wan tra man.
5 A m’ma fu den huru.
Na uma di tyari den na ini en bere, du syen sani. A taki:’Mi wani go na den lobi fu midi e gi mi mi brede nanga mi watra,mi krosi fu skapu-w’wiri nanga mi linnen krosi, mi oli nanga tra sani fu mi dringi.’
6 Mi o meki wan skotu fu makabon na en lontu fu tapu pasi gi en.Mi o meki wan ston skotu gi en,so taki a no man gwe.
7 A o lon go na baka den lobi fu en, ma a no o kisi den.A o suku den, ma a no o feni den.
Dan a o taki: ’Mi o drai go baka na mi masra, a fosi man fu mi,bika drape mi ben abi en moro bun leki now.’
8 Ma a frow disi no ben e si mi leki a sma di ben gi en aleisi, nyun win nanga oli.Na mi ben e gi en bun furu solfru nanga gowtu.Ma a gebroiki dati gi Bâal.
9 ’Dati meki mi o libi tra fasi nanga en now. Te a kotiten doro, mi no o gi en aleisi.Te a ten doro fu masi droifi fu meki win, mi no o gi en nyun win moro.Den krosi fu skapu-w’wiri èn den krosi fu linnen di mi ben gi en fu weri, mi o hari puru na en skin, so taki a de nanga sososkin.
10 Now mi o meki den lobi fu en si en syenpresi.Nowan man o man puru en na mi anu.
11 Mi no o meki a prisiri moro.Mi no o meki a hori nowan fesa moro, nowan Nyunmun-fesa, nowan Sabat èn nowan fu den fesa di e hori ibri yari.
12 A ben taki fu den droifibon nanga den figabon fu en:
„Na den lobi fu mi gi mi den bon disi.”Ma mi o pori den bon.Mi o meki den tron busbusi èn den busmeti o nyan den.
13 Mi o aksi en frantwortu fu den ofrandi di a ben e tyari gi den Bâal-popki.A ben e moi ensrefi nanga linga èn tra moimoi sani èn a ben e go na den lobi fu en.Ma na a ten dati a fergiti mi’, na so Yehovah taki.
14 ’Fu dati ede mi o taki nanga enso taki mi kan tyari en go na ini a sabana.Mi o taki nanga en fu wini en ati.
15 Na a ten dati mi o gi en den droifidyari fu en bakaèn mi o meki a psa Akor-lagipresi di o de leki wan portu fu howpu.Dan a o piki mi neleki fa a ben e du di a ben yongu eteèn di a ben kmoto na Egepte.
16 Yehovah taki: ’Na a dei dati,yu o kari mi yu trowmasra. Yu no o kari mi yu basi* moro.’
17 ’Mi no o meki a kari den nen fu den Bâal-popki moroèn a no o memre den nen fu den gado disi moro.
18 Na a ten dati mi o meki wan ferbontu gi mi pipel,so taki den busmeti, den fowru di e frei na loktu èn den meti di e kroipi na gron no du den noti.Mi o puru ala bo, fet’owru nanga feti na ini a kondre.Mi o meki den libi sondro brok’ede.*
19 Mi o teki yu leki mi trow-uma èn mi o tan nanga yu ala ten.Mi o pramisi fu libi bun nanga yu èn fu du san reti gi yu.Mi o lobi* yu èn mi o sori yu sar’ati.
20 Te mi o trow nanga yu, dan mi o tan nanga yu ala ten.Yu o sabi Yehovah trutru.’
21 Yehovah taki: ’Na a dei dati,mi o du san hemel aksi,èn hemel o du san grontapu aksi.
22 Dan grontapu o du san na aleisi, a nyun win nanga na oli aksi,èn den sani disi o du san Yisreyel* aksi.
23 Mi o sai en leki siri na grontapu.Mi o abi sar’ati gi na uma disi aladi sma no ben sori sar’ati gi en.*Mi o taigi den sma di no de mi pipel:* „Unu na mi pipel.”
Dan den o taki: „Yu na wi Gado.”’”
