Hosea 1:1-11
1 Na a ten di Usia, Yotam, Akas nanga Heskia ben e tiri leki kownu fu Yuda, Yehovah ben e taki nanga Hosea,* a manpkin fu Beri. Na a srefi ten dati Yerobeyam, a manpkin fu Yoas, ben e tiri leki kownu fu Israel.
2 Di Yehovah bigin gi Hosea boskopu, Yehovah taigi en: „Go trow nanga wan uma di o waka gi yu èn teki den pkin di a o meki nanga tra man. Bika den sma fu a kondre de leki huruman fu di den drai baka gi Yehovah krinkrin.”
3 Dati meki Hosea go trow nanga Gomer, na umapkin fu Diblayim. Ne Gomer kon de nanga bere èn bakaten a kisi wan boi gi Hosea.
4 Yehovah taigi Hosea: „Kari en Yisreyel,* bika a no o teki langa moro fosi mi strafu a famiri fu Yehu fu di den kiri sma na Yisreyel. Mi o sorgu taki Israel no abi nowan kownu moro.
5 Na a ten dati mi o broko a bo fu Israel na Yisreyel-lagipresi.”
6 Dan Gomer kon de nanga bere baka èn a kisi wan meisje. Gado taigi Hosea: „Kari en Lo-Rukama,* bika mi no o sori sar’ati moro gi den sma na ini Israel. Mi musu fu yagi den gwe.
7 Ma mi o sori sar’ati gi den sma na ini Yuda. Na mi Yehovah, a Gado fu den, o ferlusu den. Ma mi no o ferlusu den nanga bo, fet’owru, asi, noso srudati di e rèi na tapu asi. Mi no o go na feti tu fu ferlusu den.”
8 Bakaten Gomer puru Lo-Rukama na bobi. Ne a kon de nanga bere baka èn a kisi wan boi.
9 Dati meki Gado taigi Hosea: „Kari en Lo-Ami,* bika unu no de mi pipel èn mi no de un Gado.
10 Ma bakaten den Israelsma* o kon furu leki den aisanti na sesyoro. Den o de so furu, taki sma no o man teri den. Na a presi pe mi ben taigi den: ’Unu no de mi pipel’, na drape mi o taki dati den na ’manpkin fu a libilibi Gado’.
11 Dan mi o tyari a pipel fu Yuda nanga Israel kon na wán. Mi o gi den wán edeman èn mi o meki den kmoto na ini a kondre. A o de wan bigi dei gi Yisreyel.
