Zacariaspa chaynataq Elisabetpa churi-wawanku Juanqa Diosmanta willakuqmi karqa, paymi Jehova Diospa akllasqan runa hamunanmanta willakurqa. Juanqa manam Diosta yupaychana wasikunapichu nitaq llaqtakunapichu willakurqa, aswanqa chunniqpim. Chaymi Jerusalenpi hinaspa Judeapi yachaq runakunapas Juanpa willakusqanta uyariq riqku. Paykunatam Juan yachachirqa mana allin ruwaykunata saqispa Diostaña kusichinankupaq. Hinaptinmi huchankumanta wanakuspa Jordan mayupi Juanwan bautizachikurqaku.

Juanqa camellopa qarallanwanmi pachakuq, mikurqapas aqarway urutawan abejapa añankunallatam. Huk punchawmi hatun tukuq fariseo hinaspa saduceo runakuna Juanman rirqaku, hinaptinmi Juanqa paykunata nirqa: “Sunqumantam wanakunaykichik, manam Abrahanpa churinkuna kasqaykichikraykullachu Jehova Diospa churinkunaqa kankichik”, nispa.

Chaymi achka runakuna Juanta tapurqaku: “¿Imatataq ruwaymanku Jehova Dios chaskiwanankupaq?”, nispa. Juanñataqmi nirqa runamasinkuta kuyanankupaq, chaynapi paykunata Jehova Dios churinkunata hina chaskinanpaq.

Impuesto mañaqkunatawan soldadokunatapas nirqam: “Amam pitapas llullakunkichikchu nitaq suwakunkichikpaschu”, nispa.

Chaymantam sacerdotekunawan Leviy runakunapas Juanta nirqaku: “Lliw runakunam qanmanta yachayta munachkanku”, nispa. Juanñataqmi paykunata nirqa: “Isaiaspa willakusqanman hinaqa  ñuqam chunniqpi Diosmanta willakuchkani, chaynapi Diosman asuykunaykichikpaq”, nispa.

Runakunañataqmi piensarqaku Juanqa Diospa akllasqan runa kasqanmanta, chaymi Juanqa paykunata nirqa: “Diospa akllasqan runaqa ñuqamantapas aswan atiyniyuqmi. Ñuqaqa manam usutallantapas hurqunaypaq hinachu kani. Qamkunataqa yakullawanmi bautizaykichik, paymi ichaqa chuya espirituwan bautizasunkichik”, nispa.