Josueyqa Jehova Diospa llaqtantam unay wataña pusarqa, hinaspam 110 watanpi wañukurqa. Pay kawsakuchkaptinqa Israel runakunam Jehova Diosta yupaycharqaku. Wañukuptinqa Canaan runakuna hinañam taytacha-mamachakunataña yupaycharqaku. Chaynapim Diosqa saqirqa Canaan allpamanta kaq kamachiq Jabin ñakarichinanpaq. Israel runakuna yanapakuyta mañakuptinñataqmi, Diosqa Baracta yanapananpaq kacharqa. Chaynapim Jehova Diosta kaqmanta yupaycharqaku.

Chaymi Jehova Diosqa paymanta willakuq Debora warmiwan Baracman kaynata willachirqa: “10.000 runakunawan Cison mayuman riy. Chaypim Jabinpa tropankunawan peleankichik, chay tropankunapa jefen Sisarapas wañunqam”, nispa. Baracmi Deborata nirqa: “Riysiwaptikiqa risaqmi”, nispa. Deborañataqmi nirqa: “Riysisaykim, Jehova Diosmi ichaqa nirqa Sisarata warmi wañuchinanmanta”, nispa.

Chaymi Baracqa tropankunawan hinaspa Deborawan Tabor urquman qispirqaku. Chayta yacharuspam Sisarapas tropankunawan  Cison wayquman rirqaku. Hinaptinmi Deboraqa Baracta nirqa: “Kunanmi Jehova Dios yanapasunki”, nispa. Chaymi Baracqa tropankunawan Tabor urqumanta uraykamurqaku Sisaratawan tropankunata wañuchinankupaq.

Jehova Diosñataqmi Cison wayquman lluqllata kachaykurqa, chaymi Sisarapa carronkuna mitupi kikñakuruptin Baracwan tropankuna Sisarapa runankunata wañurachirqaku. Sisaram ichaqa chakillawan ayqikuspa Jael sutiyuq warmipa wasinpi pakakururqa. Jaelñataqmi lecheta tomaykachispan qataykurqa, Sisaraqa pisipasqa kasqanraykum chaylla puñururqa. Chaymi Jaelqa upallalla asuykuspan estacawan umanpi takaruspa wañurachirqa.

Baracñataqmi Jaelpa wasinpi wañusqataña Sisarata tarirurqa. Chayraykum Baracwan Deboraqa Jehova Diospaq kusikuyllawanña takirqaku, takirqakuqa yanapakuyninwan ñakarichiqninkuta wañurachisqankuraykum. Israel runakunapas 40 watam hawkayaypi kawsakurqaku.

“Allin rimariytaqa achkallaña warmikunam willakurqaku” (Salmo 68:11, Chuya Qellqa 2012).