MATEO 3:1-12 MARCOS 1:1-8 LUCAS 3:1-18 JUAN 1:6-8, 15-28

  • JUANMI DIOSMANTA WILLAKUSPAN WANAKUQKUNATA BAUTIZARQA

  • ACHKA RUNATA BAUTIZAPTINPAS MANAM LLIWCHU BAUTIZAKURQAKU

Diospa wasinpi yachaysapa runakunawan Jesus kasqanmanta 17 wata pasaytam Jesuspa ayllun Juan Diosmanta willakustin purirqa Jordan mayu lawpi. Chayraykum Juanqa riqsisqaña rikurirurqa. Chayqa karqa 29 kaq watapiñam.

Runakunaqa qawarayaqkum Juanpa imayna kasqanta hinaspa imayna rimasqanta. Payqa camellopa pelonmanta pachayuqmi karqa, wiqaw watakunanpas qaramantam karqa, mikunanñataqmi aqaruway urukuna hinaspa purun abejapa miskinkuna karqa. Chaymantapas Diosmanta willakuspam nirqa: “Hanaq pacha Diospa munaychakuynin hichparamusqanraykuyá huchaykichikmanta wanakuychik”, nispa (Mateo 3:2).

Juanpa chayna willakusqanqa runakunapa sunqunmanmi chayaykurqa. Chaymi musyakurqaku huchankumanta wanakuspa allin kaqtaña ruwanankumanta. Juanmanqa lliw Judeamanta hinaspa Jordan mayupa chimpankunamantam runakunaqa rirqaku (Mateo 3:5). Hinaptinmi huchankumanta achka runakuna wanakuptinku Jordan mayupi Juan bautizarqa.

Paykunaqa Moisespa chaskisqan kamachikuykunatam mana kasukurqakuchu, chaymi wanakuspa bautizakunanku karqa (Hechos 19:4). Ichaqa manam lliwchu wanakurqaku. Chaymi Juanqa fariseokunawan saduceokuna asuykuptin nirqa: “Venenoyuq culebrapa mirayninkuna”, nispa. Hinaspapas nirqam: “Ruwasqaykichikwanyá qawachiychik huchaykichikmanta wanakusqaykichikta. Amayá sunquykichikpiqa niychikchu ‘Abrahanmi taytayku’ nispaqa. Diosqa kay rumikunamantapas Abrahanpa churinkunataqa hatarirachinmanmi. Hachaqa ñam sachakunapa sapinman churasqaña kachkan. Chaymi lliw mana allin ruruq sachaqa kuchusqa kaspan ninaman wischusqa kanqa”, nispa (Mateo 3:7-10).

Juanqa riqsisqa kaytañam qallarichkarqa Diosmanta willakusqanrayku hinaspa achka runakunataña bautizasqanrayku. Chaymi judiokunaqa sacerdotekunatawan Leviy casta runakunata kacharqaku pi kasqanta tapumunankupaq.

Hinaptinmi Juanqa nirqa: “Manam ñuqachu kani Cristoqa”, nispa.

Paykunañataqmi nirqaku: “¿Pitaq chaynaqa kanki? ¿Eliaschu?”, nispa.

Juanñataqmi nirqa: “Manataqmi Eliaschu kani”, nispa.

Nirqakutaqmi: “Hamunanmi karqa Diosmanta willakuq ¿chay willakuqchu kanki?”, nispapas (Deuteronomio 18:15, 18).

Payñataqmi nirqa: “Manam”, nispa.

Chaywanpas hinallaraq tapuspam nirqaku: “Hinaptinqa, ¿pitaq kanki?, kachamuwaqniykuman ninaykupaq. ¿Ima ninkitaq kikikimanta?”, nispanku. Hinaptinmi Juanqa nirqa: “Ñuqaqa kani Diosmanta willakuq Isaiaspa nisqanman hina, ‘Jehova Diospa ñannintayá allichaychik’ nispa chunniqpi qayakuqllam”, nispa (Juan 1:19-23).

Chaywanpas hinallaraqmi tapurqaku: “Manataq chay willakuqchu kanki, manataq Cristochu nitaq Eliaschu. Hinachkaspaqa, ¿imanasqataq bautizanki?”, nispa. Juanñataqmi nirqa: “Ñuqaqa yakupim bautizani. Qamkunapa chawpikichikpim kachkan mana riqsisqaykichik runa, payqa qipay hamuqmi”, nispa (Juan 1:25-27).

Chaywanmi Juanqa qawachirqa Diospa kachamusqan runa hamuptin runakuna chaskinanpaq yanapaqllan kasqanmanta. Chaymi nirqa: “Qipay hamuqmi ichaqa ñuqamantapas aswan  atiyniyuq, manam usutallantapas hurqunaypaq hinachu kani”, nispa (Mateo 3:11). Hinaspapas nirqam: “Ñuqapa qipayta hamuqmi ñawparuwan, payqariki manaraq ñuqa kachkaptiymi karqaña”, nispa (Juan 1:15).

Kusallañam karqa Juanpa “hanaq pacha Diospa munaychakuynin hichparamusqanraykuyá huchaykichikmanta wanakuychik” nispa willakusqanqa. Chaywanmi qawachirqa Jesusqa Diosmanta willakuyta qallarinanpaqña kasqanmanta (Mateo 3:2).