Jehova Diosmi Eden sutiyuq huertata suma-sumaqta ruwarqa. Chay kuyayllapaq huertapim tukuy rikchaq waytakuna, sachakuna hinaspa animalkuna karqa. Chaymantam Adan sutiyuq punta kaq qarita allpamanta ruwarqa, sinqanta pukuykuptinmi Adanqa kawsaq runaña rikurirurqa. Jehova Diosqa Adantam nirqa Eden huertata sumaqyachinanpaq hinaspa lliw animalkunaman sutintapas churananpaq.

Hinaspapas Jehova Diosqa Adantam kamachirqa kaynata nispan: “Llapallan sachapa ruruntaqa mikuwaqmi, chullalla sachapa ruruntam ichaqa ama mikunkichu. Mikuruspaykiqa wañurunkim”, nispa.

Chaymanta qipamanmi Jehova Diosqa Adanta puñurachispan huknin costillanmanta Eva sutiyuq warmita ruwarqa, chaynapim paykunamanta runakuna mirarqanchik. Eva sutiyuq warminta chayllaraq  rikuykuspanmi Adanqa anchata kusikurqa, hinaspam nirqa: “¡Paytaqa costillaymantam Jehova Diosqa ruwarun! ¡Kayqaya ñuqaman rikchakuqqa!”, nispa.

Jehova Diosqa munarqam Adanwan Eva churi-wawayuq kanankuta. Paykunaqa enteron allpa pachata kuyayllapaqta huertayachispankum kusisqa kawsakunanku karqa, ichaqa manam chaynachu karqa. ¿Imanasqa? Qatiqnin yachachikuypim chaymanta yachasun.

‘Diosqa qallariymantapacham qaritawan warmita unancharqa’ (Mateo 19:4).