Madian llaqtapim Moisesqa 40 wata yacharqa, hinaspam casarakuspan churiyuq karqa. Huk punchawmi Sinai urqupa hichpanpi michichkaspan tankar hina kichkata ratachkaqta rikururqa, ichaqa manam chay kichkaqa kañakurqachu. Qawaq asuykuptinmi chay kichkapa kasqanmanta Jehova Dios rimapayamurqa: “¡Moises! Ama llumpaytaqa asuykamuwaychu. Usutaykita hurqukuy, chay sayasqaykiqa ñuqapaq sapaqchasqaymi”, nispa.

Chaymi Moisesqa mancharikuspan uyanta tapakururqa. Paytam Dios kaqmanta rimapayamurqa: “Israel llaqtaytam ñakariqta rikuchkani. Paykunatam hurqumuspay sumaq allpaman pusasaq, chaymi Egiptomanta hurqumunaykipaq qamta akllayki”, nispa. ¿Ima nirqataq Moisesqa?

Tapurqam: “¿Ima nisaqtaq ‘pitaq kachamusurqanki’ niwaptinqa?”, nispa. Diosñataqmi nirqa: “Kaynatam ninki: ‘Abrahanpa, Isaacpa hinaspa Jacobpa Jehova Diosninmi qamkunaman kachamuwan’”, nispa. Moisesmi nirqa: “¿Paykuna mana kasuwaptinqa?”, nispa. Chaynata niptinmi Diosqa Moisesta nirqa tawnanta pampaman wischunanpaq, hinaptinmi tawnanqa culebrayarurqa. Chupanmanta hapiruptinñataqmi kaqlla makinpi tawna rikurirurqa. Chaywanmi Diosqa Moisesta qawachirqa yanapananmanta, hinaspapas nirqam: “Chaynata ruwaptikim yachanqaku ñuqa kachasqayta”, nispa.

Moisesmi ichaqa nirqa: “Runakunapa qayllanpiqa manam atillanichu rimayta”, nispa. Diosmi kallpanchaspan nirqa: “Ñuqam rimanaykipaq yachachisqayki, hinaspapas wawqiki Aaronmi rantikipi rimanqa”, nispa. Chaynapim Moisesqa Jehova Dios yanapananmanta yachaspan ayllunpiwan kaqlla Egiptoman kutirqa.

“Amayá llakikuychikchu imaynata utaq imamanta rimanaykichikmantapas, chaypunillam yachachisqa kankichik imam rimanaykichikpaqqa” (Mateo 10:19).