Yachachikuypa kasqanman rinapaq

Yachachikuyman rinapaq

 90 KAQ YACHACHIKUY

Golgota lawpi Jesus wañukusqanmanta

Golgota lawpi Jesus wañukusqanmanta

Kamachiq Pilatomanmi riqsisqa sacerdotekuna Jesusta pusarurqaku, chaymi Pilato paykunata tapurqa: “¿Imatataq kay runa ruwarun?”, nispa. Paykunañataqmi nirqaku: “Kamachiqnikichikmi kani niwankum”, nispa. Hinaptinmi Jesusta Pilato tapurqa: “¿Judiokunapa kamachiqninchu kanki?”, nispa. Jesusñataqmi nirqa: “Munaychakuyniyqa manam kay pachamantachu”, nispa.

Chaymantam Pilatoqa Galilea llaqta kamachiq Herodesman Jesusta pusachirqa. Herodespas Jesus mana huchayuq kaptinmi yapamanta Pilatoman kutichirqa, chaymi Pilatoqa runakunata nirqa: “Ñuqapaqpas Herodespaqpas Jesusqa mana huchayuqmi. Chaymi kacharisaq”, nispa. Runakunam ichaqa qaparispa nirqaku: “¡Wañuchiy!”, nispa. Chaymi soldadokuna Jesusta waqtarqaku, tuqarqaku hinaspa maqarqaku. Chaymantapas kichkamanta coronata umanman hinaykuspankum asikurqaku. Yapamantam Pilatoqa runakunata nirqa: “Manam ima huchantapas Jesuspataqa tarinichu”, nispa. Chaywanpas runakunam nirqaku: “¡Qirupiyá wañuchun!”, nispanku. Chaymi Pilatoqa runakunaman Jesusta quykurqa wañuchinankupaq.

Hinaptinmi runakunaqa Golgota lawman Jesusta pusarurqaku, hinaspam qirupi clavowan takaruspanku warkururqaku. Jesusñataqmi taytanta mañakuspan nirqa: “Taytáy, pampachaykuy mana yachastin ruwasqankumanta”, nispa. Runakunañataqmi asikuspa nirqaku: “¡Diospa churin kaspaykiqa librakuyá!”, nispa.

Jesuspa waqtanpi warkusqa mana allin ruwaq runañataqmi nirqa: “Kamachiqña kaspaykimá yuyarillawanki”, nispa. Hinaptinmi Jesus nirqa: “Ñuqawanmi sumaq huertapi kanki”, nispa. Tardenñataqmi kimsa hora tutayarurqa. Jesuspa wakin qatiqninkunawan maman Mariapas Jesusta qawaspankum qiparurqaku. Chaypim apostolnin Juanta Jesus mañakurqa mamanta hina Mariata qawananpaq.

Wañukunanpaqñam Jesus nirqa: “¡Ñam ruwasqaña!”, nispa. Hinaspam umanta kumuykachispan wañukurqa. Hinaptinmi allpapas kuyukuykurqa. Diospa wasinpi chuya sutiyuq cuartotawan chuyay-chuyay  cuartota rakinaq rakta telapas chawpimantam llikikururqa. Chaymi soldadokunata kamachiqpas nirqa: “¡Diospa churinmiki kasqa!”, nispa.

“Diospa rimasqankunaqa haykaña kaspanpas lliwmi Cristopi cumplikun” (2 Corintios 1:20).