Yachachikuypa kasqanman rinapaq

Yachachikuyman rinapaq

 34 KAQ YACHACHIKUY

Enemigonkunata Gedeon atipasqanmanta

Enemigonkunata Gedeon atipasqanmanta

Kaqmantam Israel runakunaqa taytacha-mamachakunata yupaycharqaku, chaymi 7 watata Madian runakunaqa Israel runakunapa animalninkuta suwaspanku kawsayninkutapas tukuqku. Hinaptinmi Israel runakunaqa machaykunapi chaynataq urqukunapi pakakuqku. Jehova Diosñataqmi qayakusqankuta uyariykuspan Gedeon sutiyuq mozota akllarqa Israel llaqtanta librananpaq. Gedeonñataqmi nirqa: “Manachusmi ñuqaqa librayta atiymanchu”, nispa.

Hinaptinqa, ¿imatam Gedeonqa ruwarqa akllasqa kasqanmanta yachananpaq? Pampaman millwata churaykuspanmi Jehova Diosta nirqa: “Sichum paqarin sulla millwata nuyuruptin, allpañataq chakilla kaptinqa yachasaqmi akllawasqaykita”, nispa. Paqarinnintintam millwaqa nuyurusqa, allpañataqmi mana. Chaymi Gedeonqa kaqmanta Diosta nirqa paqarinnintin allpaña nuyusqa kananpaq, millwañataq chakilla kananpaq. Chay kutipipas chayna kaptinmi Gedeonqa manaña iskayrayarqachu akllasqa kasqanmanta, chaynapim runankunata huñurqa Madian runakunawan peleanankupaq.

 Diosmi Gedeonta nirqa: “Israel runakunataqa yanapasaqmi, soldadoykikunam ichaqa achkallaña kachkan. Yanqañataq ninmanku achka kasqankurayku kikillanku librakurusqankumanta. Chayraykuyá manchakuqkunaqa wasinkuman kutichun”, nispa. Chaymi 22.000 qarikuna kutikurqaku, hinaspa 10.000 qarikunallaña qiparurqaku. Diosqa nirqaraqmi: “Achkaraqmi kachkanku. Yakupa kasqanmanyá pusay, chaypim enemigonkunamanta qawan-qawanlla yaku tomaqkunata akllanki”, nispa. Chaymi 300 qarikunalla qawan-qawanlla yakuta tomarqaku. Jehova Diosmi nirqa paykunalla 135.000 Madian runakunata wañuchinankupaq.

Chay tutam Gedeonta Dios nirqa Madian runakunawan peleananpaq. Chaymi Gedeonqa sapa soldadonkunaman qurqa cornetata hinaspa mecheroyuq puyñuta, hinaspam nirqa: “Ñuqapa ruwasqayta hinam qamkunapas ruwankichik”, nispa. Hinaspam Gedeonqa cornetata tocaspan apasqan puyñuta pakirurqa, chaymantapas achkita huqarispam kayman-wakman kuyuchispan kallpawan nirqa: “¡Jehova Diosrayku hinaspa Gedeonraykum peleaniku!”, nispa. Chaynallatam 300 qarikunapas ruwarqaku, chaymi Madian runakunaqa mancharisqallaña ayqikuspanku kikinkupurallaña wañuchinakurqaku. Kaqmantam Jehova Diosqa Israel runakunata libraykurqa.

‘Hatu-hatun atiyqa [...] manam ñuqaykumantachu hamun aswanqa Diosmantam’ (2 Corintios 4:7).