Lazaroqa panin Mariawan hinaspa panin Martawanmi Betania llaqtapi yacharqaku. Paykunaqa Jesuspa amistadninkunam karqaku. Huk punchawmi Martawan Mariaqa Jesusman Jordan mayupa wak lawninpi kachkaptin kaynata willachirqaku: “Ama hina kaspa hamuy. Lazarom unquchkan”, nispa. Ichaqa iskay punchawña pasaruptinmi Jesusqa apostolninkunata nirqa: “Lazarom puñuchkan, hakuchik rikchachimunaypaq”, nispa. Apostolninkunaqa piensarqakum Lazaroqa puñuylla-puñusqanta, chaymi Jesusqa entiendenankupaq nirqa: “Lazaroqa wañukunñam”, nispa.

Betania llaqtaman Jesus chayaruptinqa tawa punchawñam Lazaropa pampakusqanqa karqa. Achka runakunapas Martapatawan Mariapa sunqunku tiyaykachiqmi rirqaku. Jesus chayaykuptinmi Martaqa chaylla kallpaspan nirqa: “Señor, kaypi kaptikiqa manam turiyqa wañukunmanchu karqa”, nispa. Jesusñataqmi nirqa: “Turikiqa kawsarimunqam”, nispa. Martaqa piensarqam hamuq tiempopiña kawsarimunanta, hinaptinmi Jesus nirqa: “Ñuqam kani kawsarichiqpas hinaspa kawsakuy quqpas”, nispa.

Chaymi Martaqa ñañanman Jesus chayaramusqanmanta willananpaq rirqa. Mariañataqmi kallpaspan Jesuspa chakinman urmaykurqa, hinaspam llumpayta waqaspan nirqa: “Señor, kaypi kaptikiqa manam turiykuqa wañukunmanchu karqa”, nispa. Jesusqa llumpay llakisqata qawaykuspam paypas waqakururqa. Mariata qatiq runakunapas Jesus waqaptinmi nirqaku: “Llumpaytam Jesusqa Lazarota kuyasqa”, nispa. Wakinmi ichaqa nirqaku: “¿Imanasqataq amistadnintaqa mana hampiykurqachu?”, nispa.

Jesusqa Lazaropa pampakusqanman riykuspanmi qawaykurqa hatun rumiwan tapasqata, hinaspam nirqa: “Wak rumita hurquychik”, nispa. Martañataqmi nirqa: “Asnarirunñach, ñam tawa punchawniyuqña”, nispa. Chaywanpas rumita hurquruptinkum Jesusqa taytanta mañakuykurqa: “Taytáy uyariykuwasqaykimantam agradecekuyki.  Kunanmi qam kachamuwasqaykita kaypi kaq runakuna yachanankupaq mañakamuchkayki”, nispa. Hinaspam qaparispan nirqa: “¡Lazaro, lluqsimuy!”, nispa. Chaymi Lazaroqa yuraq telawan wankusqa lluqsiramurqa. Jesusñataqmi nirqa: “Purinanpaq paskaychik”, nispa.

Chayta qawaykuspam achka runakuna Jesusta qatirqaku, wakinkuñataqmi fariseokunaman willaq rirqaku. Hinaptinmi chay fariseokunaqa tantearurqaku Jesustawan Lazarota wañuchinankupaq. Jesuspa apostolnin Judas Iscarioteñataqmi fariseokunaman rirurqa, hinaspam Jesusta qipanchananpaq 30 qullqita chaskikururqa.

‘Pitapas salvaykuqqa Diosnillanchikmi. Pitapas wañuymanta libraykuqqa señor Diosnillanchikmi’ (Salmo 68:20).