Unay watam Israel runakunaqa juezkunapa yanapasqan karqaku. Chaymi wakin nacionkuna hina kamachiqniyuq kayta munaspanku Diosmanta willakuq Samuelta kaynata nirqaku: “Kamachiwaqniyku kanantam munaniku”, nispa. Samuelpaqqa manam allinchu karqa chayna mañakusqankuqa, chaymi Diosqa Samuelta nirqa: “Paykunaqa ñuqatam qipanchawachkan manam qamtachu. Niyyá kamachiqninku kananmanta, ichaqa kamachiqninkumanmi tukuy mañakusqanta qunqaku”, nispa. Chaywanpas hinallam hikutakurqaku kamachiqninku kananpaq.

Hinaptinmi Jehova Diosqa Samuelman willarqa Saul kamachiq kananmanta. Chaymi Samuelqa Rama llaqtapi kachkaspan Saulpa umanman aceiteta tallirqa kamachiq kananpaq.

Chaymantam Samuelqa Israel runakunata huñururqa kamachiqninku runata riqsichinanpaq. Saulmi ichaqa manchakusqanrayku pakakururqa. Hinaptinmi tariruspanku Saultaqa llapallan runakunaman riqsichirqaku. Saulqa hatunkaray kuyayllapaq rikchayniyuqmi karqa. Samuelmi nirqa: “¡Qawaychik, Saultam Jehova Dios akllarun!”, nispa. Runakunañataqmi qaparispa nirqaku: “¡Kawsachun kamachiwaqninchik!”, nispa.

Chayllaraq kamachiyta Saul qallaykuspanqa Jehova Diostawan Samueltam kasukurqa, ichaqa chaymantam hatun tukururqa. Huk kutipim Samuelqa Jehova Diospaq animalta kañapunan karqa, Saulñataqmi Samuelta mana suyaspan Diospaq animalta kañarurqa, payqa manamá chaytaqa ruwananchu karqa. Chaymi Samuel nirqa: “Jehova Diostam mana kasukurqankichu”, nispa. Chaynata niptinpas hinallam mana kasukurqachu.

Chaymantapas Saulqa llapallan Amalec runakunatam wañuchinan karqa. Ichaqa mana kasukuspam Amalec runakunapa kamachiqnin Agagta mana wañuchirqachu. Chaymi Jehova Diosqa Samuelta nirqa: “Saulqa manañam kasuwanñachu”, nispa. Hinaptinmi Samuelqa  llakisqallaña Saulta nirqa: “Mana kasukusqaykiraykum Diosqa huk kamachiqtaña akllanqa”, nispa. Chaymi Saulqa Samuelpa pachanta chutaspan llikirurqa, hinaptinmi Samuel nirqa: “Chaynatam Jehova Diospas kamachiq kasqaykita llikirunqa”, nispa. Chaywanqa nichkarqam huk kaqnin kasukuq runataña kamachiq kananpaq Dios akllananmanta.