Moisesmi faraonta nirqa: “Manañam yapatawanqa qayllaykiman hamusaqñachu”, nispa. Nirqataqmi: “Chawpi tutatam Egipto nacionpi lliw piwikuna wañunqa, faraonpa piwi churinmanta qallaykuspa sirvientepa piwinkama”, nispa.

Chaymantam Israel runakunata Jehova Dios nirqa: “Kunan tutam mikunkichik kankasqa aychata, mikunkichiktaqmi mana qunchuyuq tantatapas. Sapakamataqmi huk watayuq malta carnerota utaq malta chivatota nakankichik, hinaspam yawarninwan punkupa sayaqnin qirunta llusinkichik. Kunan tutam hurqusqaykichik, chaymi illanapaq hina pachasqallaña listo kanaykichik, usutaykichikpas sumaq watasqam kanan”, nispa. ¡Anchatachá Israel runakunaqa kusikurqaku!

Chawpi tutatam Diospa angelnin lliw piwi kaqkunata apupatapas wakchapatapas wañurachirqa, haykam punkunkuta yawarwan mana llusiqkunapata. Israel runakunapa piwi churinkutam ichaqa mana wañuchirqachu.

Faraonpa piwi churinpas wañuruptinmi llakisqallaña Moisestawan Aaronta nirqa: “¡Kaymanta pasawaychik, hinaspayá Diosnikichikta yupaychamuychik! ¡Qatiychik animalnikichiktapas!”, nispa.

Chay tutam Israel runakunaqa lluqsirqaku puqusqa killapi, aylluntin hinaspa  castantin. Qarikunam yaqa 600.000 karqaku, warmikunawan wawakunaqa manam yupasqachu karqaku. Mana Israel casta runakunapas Jehova Diosta yupaychanankupaqmi qatikurqaku. ¡Chayraqmi Israel runakunaqa kacharisqa karqaku!

Kacharisqa kasqankumanta yuyarinankupaqmi sapa wata pascua mikuyta ruwananku karqa.

“Qamtaqa hinallam kawsachirqayki qamnintakama atiyniyta qawachinaypaq hinaspa enteron pachapi sutiy willasqa kananpaq” (Romanos 9:17).