Musqukusqanmanta qipallamanmi Nabucodonosorqa qurimanta hatu-hatun taytachata ruwarachispan Dura sutiyuq pampapi sayarachirqa, hinaspam ancha riqsisqa runakunata huñururqa. Chaypitaqmi karqa Sadrac, Mesac hinaspa Abed-negopas. Nabucodonosormi nirqa: “Cornetata, arpata hinaspa tukuy rikchaq tocanakunata uyarispam taytachapa qayllanpi qunqurakunkichik. Mana qunquraqtaqa chaypunillam rupachkaq hornoman wischuykusaq”, nispa.

Tocasqankuta uyariruspankum llapallanku qunqurakurqaku. Sadrac, Mesac hinaspa Abed-negom ichaqa mana qunqurakurqakuchu, chaymi runakunaqa kamachiqman willarqaku: “Taytacha ruwachisqaykitam kay mozokuna mana yupaychankuchu”, nispa. Hinaptinmi mozokunata Nabucodonosor nirqa: “Kaqmanta mana qunqurakuptikichikqa rupachkaq hornomanmi wischusqaykichik. Manam pipas yanapasunkichikchu”, nispa. Mozokunañataqmi nirqaku: “Diosniyku mana yanapawaptinkupas manam taytachaykitaqa yupaychasaqkuchu”, nispa.

Nabucodonosormi piñasqallaña soldadonkunata nirqa: “¡Qanchis kutikamaraq hornota rupachispayá kay mozokunata wischumuychik!”, nispa. Chaymi llumpayta horno rupaptin soldadokunaqa wischusqankupi wañururqaku. Wischusqanku mozokunaqa manam ruparqakuchu, aswanmi tawaña rikurirurqaku.  Chaymi llumpayta mancharikuspan Nabucodonosorqa runankunata nirqa: “Kimsa runakunatam wischurqanchik ¿aw? Kunanqa tawatañam qawachkani. ¡Angelchusmi hukninqa!”, nispa.

Chaymi Nabucodonosorqa qaparispan nirqa: “¡Tayta Diospa runankuna hawaman lluqsimuychik!”, nispa. Mozokunaqa chukchankupas, pachankupas mana rupasqam lluqsiramurqaku, chaymi lliw runakuna qawarayarqaku.

Nabucodonosormi nirqa: “¡Sadracpa, Mesacpa, Abed-negopa Diosninyá hatunchasqa kachun! Paymi angelninta kachamurqa yanapaykunanpaq. Paykunapa Diosnin hinaqa manam kanchu”, nispa.

Imaña kaptinpas chay mozokunaqa Jehova Diosllatam kasukurqaku. Qampas, ¿paykuna hinachu kanki?

“Jehova Diosllaykitam yupaychanaykiqa, payllatataqmi servinaykipas” (Mateo 4:10).