Kaqmantam Israel runakunaqa taytacha-mamachakunata yupaychayta qallaykurqaku, chay taytacha-mamachakunaqa manam yanaparqachu Amon runakuna ñakarichiptinkuqa. Chaymi Israel runakunaqa Jehova Diosta mañakuspa nirqaku: “Ama hina kaspayá libraykullawayku”, nispa. Hinaspam taytacha-mamachankuta ñutuparuspa kaqmanta Jehova Diostaña yupaycharqaku. Hinaptinmi Diosqa llakipayaykurqa.

Chaymi Diosqa Israel runakunapa akllasqan Jeftey sutiyuq runata yanaparqa Amon runakunawan peleananpaq. Jefteyñataqmi Jehova Diosta kaynata mañakurqa: “Amon runakunata atipanaypaq makiyman churaykuptikiqa, wasiyman kutiptiy punta  lluqsimuqtam qusqayki”, nispa. Jehova Diosqa Jefteypa mañakusqanta uyariykuspam yanaparqa.

Wasinman Jeftey kutiruptinmi sapallan warmi churin tinyanwan tusustin puntata lluqsiramurqa. Jefteyqa Diosman nisqanta yuyariruspanmi nirqa: “¡Ay churilláy! Llumpay llakimanmi wichiykuni. Jehova Diostam nirqani ima ruwanaymanta, chaymi Silo llaqtapi kaq Diospa carpanpi servinaykipaq rinayki kanqa”, nispa. Churinñataqmi nirqa: “Taytáy nisqaykiman hinayá ruway, ichaqa sipasmasiykunawan iskay killa urqutaraq rinaypaqyá saqiykuway. Kutiramuspayqa Diospa carpanmanñam risaq”, nispa. Churinqa Diosman sunqu kasqanraykum wañukunankama Diospa carpanpi servirqa, sipasmasinkunapas sapa watam watukuqku.

“Pipas tayta-mamanta ñuqamanta aswan kuyaqqa manam qatiqniyqa kanmanchu” (Mateo 10:37).