Ninive llaqtapim mana allin runakuna yacharqaku, chay llaqtaqa karqa Asiria nacionpim. Jehova Diosmi munarqa chay runakuna mana allin ruwayninkuta saqinankuta, chaymi yupaychaqnin Jonasta kacharqa. Jonasmi ichaqa mana kasukuspan buqueman qispiruspa Tarsis lawman ripukurqa.

Buquepi richkaptinmi lamar quchapi llumpa-llumpay wayra-para qallaykurqa. Hinaptinmi chaypi kaqkuna llumpayta mancharikuspanku sapakama yupaychasqanku taytachankuta qayakurqaku, hinaspam ninakurqaku: “¿Imanasqataq kayna llakipi tarikunchik?”, nispa. Chaymi paykunata Jonas niykurqa: “Ñuqam huchayuqqa kani, Jehova Diosta mana kasukuspaymi ayqikuchkani. Chayraykuyá lamar quchaman wischuykuwaychik”, nispa. Chaymi wischuykuptinku wayra-paraqa manaña karqachu.

Jonasqa wañunantaña piensaspanmi Jehova Diosta mañakurqa, hinaptinmi hatu-hatun challwa Jonasta millpururqa. Jonasqa challwapa wiksanpim Jehova Diosta nirqa: “Kunanmantaqa kasukullasqaykim”, nispa. Chaymi Jehova Dios llakipayaykuptin challwaqa kimsa punchawmanta Jonasta chaki allpaman aqtururqa.

Hinaptinmi Jonasqa Jehova Diosta kasukuspaña Ninive llaqtaman chayarurqa, hinaspanmi chay llaqtapi runakunata nirqa: “40 punchawmantam  Ninive llaqtaqa chinkachisqa kanqa”, nispa. Chaymi runakunaqa mana allin ruwasqankuta saqirurqaku, chay llaqtapi kamachiqpas nirqam: “Tukuy sunquykichikwan Diosta mañakuspayá mana allin ruwasqaykichikmanta wanakuychik, icharaqpas kawsanchikman”, nispa. Chaymi wanakusqankurayku mana wañurqakuchu.

¿Jonasqa kusikurqachu Ninive llaqtayuq runakunapa wanakusqankuwan? Manam. Aswanmi piñakuspan llaqtamanta lluqsiruspan higuerilla plantapa sikinpi tiyaykurqa. Chayllam chay higuerillaqa chakirurqa, hinaptinmi Jonasqa llumpayta piñakururqa. Chaymi Jehova Dios nirqa: “Qamqa chay higuerilla plantamantam astawanqa llakikurqanki. Chaynam ñuqapas Ninive llaqtapi yachaqkunata llakipayaykuspay mana castigarqanichu”, nispa. Chaynata nispam Jonasman yachachichkarqa runakuna ima plantamantapas aswan allin kasqanta.

“Jehova Diosqa [...] qamkunawanmi pacienciakuchkan pipas chinkarunanta mana munaspan, payqa munachkan llapallan runakuna huchankumanta wanakunankutam” (2 Pedro 3:9).