Abrahanqa churin Isaactam yachachirqa Diosta kuyananpaq hinaspa Diospi hapipakunanpaq. Ichaqa Isaac 25 watanpi kachkaptinmi Jehova Diosqa sasa ruwayta ruwananpaq Abrahanta nirqa. ¿Imata ruwanapaqmi nirqa?

Abrahantam nirqa: “Moria urquman kuyasqayki churikita pusay, hinaspa chaypi kañapamuway”, nispa. Diospa chayna nisqanmanta mana entiendespanpas Abrahanqa kasukurqam.

Chaymi tuta-tutaylla churin Isaacwan hinaspa iskay sirvientenkunawan rirqa, hinaspam kimsa punchawmanta Moria urquta rikuruspan sirvientenkunata nirqa: “Churiy Isaacllawanña Diospaq animalta kañapuq qispirusaqku”, nispa. Hinaspam Isaacta yantata qipichirqa, Abrahanñataqmi cuchillota aparqa. Isaacmi taytanta tapurqa: “¿Maytaq kañanapaq animalqa?”, nispa. Abrahanñataqmi nirqa: “Churilláy Diosmi quwasun”, nispa.

Moria urquman chayaruspankum altarta pirqarurqaku. Hinaspañataqmi chaypa hawanman churin Isaacta makintawan chakinta wataruspan siriykachirqa.

Abrahan cuchillota hapichkaptinmi qunqaymanta Diospa angelnin nimurqa: “¡Abrahan! ¡Ama imanaychu churikitaqa! Ñam yachaniña Dios kasukusqaykita, chullalla churikitapas kañanaykipaqmi mana harkakurqankichu”,  nispa. Chaymi Abrahanqa waqranmanta arwirayaq carnerota rikururqa, hinaspam Isaacpa rantinpi chay carnerotaña Diospaq kañapurqa.

Chay punchawmantam Jehova Dios Abrahanta aswanraq kuyarqa, ¿imanasqa? Sasa kaptinpas Diospa nisqanta tukuypi kasukusqanraykum.

Chaymi Jehova Diosqa kaqmanta Abrahanta nirqa: “Achka churiyuq kanaykipaqmi bendecisqayki”, nispa. Chaywanqa nichkarqam Abrahanpa mirayninwan allin runakunata Jehova Dios yanapananmanta.

“Diosqa ancha-anchatam runakunata kuyarqa chaymi sapallan churinta qumurqa haykam paypi iñiqqa mana wañuchisqa kanankupaq, aswanqa wiñay kawsayniyuq kanankupaq” (Juan 3:16).