Yaqa iskay killamantam Israel runakunaqa Sinai urqupi samarqaku. Chaypim Diosqa Moisesta urquman qayaruspan nirqa: “Ñuqam Egiptomanta Israel runakunata hurqumurqani. Kamachisqaykunata kasukuspankuqa akllakusqay runaykunam kanqa”, nispa. Chayna nimusqantam Moisesqa Israel runakunaman willarqa, hinaptinmi paykunaqa nirqaku: “Jehova Diospa imapas niwasqankutaqa ruwasaqkupunim”, nispa.

Chaymantam Moisesqa urquman kaqlla qispirurqa, chaypim Jehova Dios nirqa: “Kimsa punchawmantam paykunata rimapayasaq, amam Sinai urqumanqa qispimunqakuchu”, nispa. Chaymi Moisesqa Israel runakunaman willarqa Diospa econta uyarinankupaq.

Kimsa punchawmantam runakunaqa urqupi tutayay puyutawan wakrimuqta qawarqaku. Uyarirqakutaqmi tunrururumuq llipyakunata hinaspa cornetakunapa waqasqantapas. Urqupa hawanman Jehova Dios ninapi uraykamuptinmi urquta qusni taparurqa hinaspam mancharikuypaqta katkatatarqa. Cornetapa waqasqanpas aswanraqmi uyarikurqa. Chaymi Israel runakunaqa llumpa-llumpayta mancharikurqaku. Hinaptinmi Dios nirqa: “Ñuqallam Jehova Diosqa kani, amam huk dioskunataqa yupaychankichikchu”, nispa.

Kaqllamanta Moises urquman qispiruptinmi Jehova Diosqa imaynata yupaychanankupaq hinaspa imaynata kawsakunankupaq kamachikuykunata qurqa. Chaytam Moisesqa qillqaspan runakunapaq leepurqa. Paykunañataqmi nirqaku: “Jehova Diospa imapas niwasqankutaqa ruwasaqkupunim”, nispa. Chaynata nispankupas, ¿kasukurqakuchu?

“Jehova Diosnikitam kuyanayki tukuy sunquykiwan, tukuy vidaykiwan hinaspa tukuy yuyaynikiwan” (Mateo 22:37).