Josey carcelpi kachkaptinmi Egipto nacionta kamachiq faraon musqukururqa. Musqukusqanmantaqa manam pipas ima ninan kasqanta yachayta atirqachu. Faraonpa sirvientenñataqmi nirqa chay musqukusqantaqa Josey willaykunanmanta, chaymi Joseyta chaylla qayachirqa.

Musqukusqanmanta Joseyta faraon tapuptinmi, payñataq nirqa: “Egiptopim 7 wata kawsaykuna kakunqa, 7 watañataqmi muchuy kanqa. Chaynaqa allin yachayniyuq runata akllay kawsaykunata huñunanpaq, chaynapi runakunapas mana wañunankupaq”, nispa. Chaynata niptinmi faraonqa nirqa: “Qanmi lliw runaykunata kamachinki, ichaqa qanmanta aswan autoridadniyuqqa ñuqallam kasaq”, nispa. Joseyqa Diospa yanapakuyninwanmi chay musquymanta yacharqa.

Chaymi Joseyqa 7 wata kawsaykunata huñurqa. Nisqanman hinataqmi muchuypas karqa, chaymi runakuna tukuy lawmanta hamuspan kawsayta rantiqku. Taytan Jacobpas Egiptopi kawsaykuna kasqanta yacharuspanmi 10 churinkunata kacharqa rantimunankupaq.

Paykuna chayaruptinkum Joseyqa wawqinkuna kasqanta chaylla riqsirurqa, wawqinkunam ichaqa mana. Hinaspam warmallaraq kaspan musqukusqanman hina wawqinkunaqa ñawpaqninpi kumuykurqaku. Joseyñataqmi wawqinkuna hinalla chiqnisqankuta yachananpaq nirqa: “Qamkunaqa watiqaqkunam kankichik”, nispa.  Paykunañataqmi nirqaku: “¡Manam watiqanikuchu! 12 wawqintinmi Canaan lawmanta kaniku. Hukniykuqa wañukunñam, sullkaykuñataqmi taytaykuwan kachkan”, nispa. Joseyñataqmi nirqa: “Chaynaqa sullkaykichikta pusamuwaychik”, nispa. Chaymi wawqinkunaqa taytankuman kutirqaku.

Jacobqa mikunankupaq mana kaptinmi kaqmanta sullka churin Benjamintawanña Egiptoman kacharqa. Joseyñataqmi wawqinkunapa sunqunta yachananrayku, Benjaminpa wayqanman chaninniyuq vasonta hinarachispan suwapaq tumparqa. Benjaminpa wayqanpi tariruptinkum wawqinkuna llumpayta llakikuspanku Joseyta nirqaku: “¡Benjaminta castiganaykimantaqa ñuqaykuta castigawayku!”, nispa.

Chaywanmi Joseyqa musyakururqa wawqinkuna allin sunquyuqña kasqankuta, hinaspam waqaspan willaykurqa: “Wawqikichik Joseymi kani, ¿kawsakuchkanraqchu taytanchik?”, nispa. Wawqinkunañataqmi imanakuytapas mana atirqakuchu, chaymi Josey nirqa: “Rantikuwasqaykichikmantaqa ama llakikuychikchu. Diosmi qamkunata yanapanaypaq kayman pusamuwarqa, utqaymanyá taytanchikta pusamuychik”, nispa.

Chaynapim wawqinkunaqa taytankuta Egiptoman pusarqaku, chaymi Joseyqa unay watamantaña taytanwan tupaykurqa.

“Mana allin ruwasusqaykichikta mana pampachaptikichikmi ichaqa, qamkunapa pantasqaykichiktapas taytaykichikqa mana pampachasunkichikchu” (Mateo 6:15).