¿Imaraykutaj Jehová kay librota Palabranpi churacherqa?

1. ¿Ima palabrastaj Joel libropi rikhurin, chanta imamanta parlanapajtaj oqharikun?

 ¿MAYQEN librotaj Bibliapi ‘Jehovaj pʼunchayninmanta’ ñaupaj kutirayku parlan? Ichapis Joel libro. Chaypeqa phishqa kutista oqharikun chay palabrasta (1:15; 2:1, 11, 31; 3:14). Bibliapeqa “Jehová Diospa pʼunchaynin” palabrasta oqharikun ima kutispichus Jehová sutinta jatuncharqa, enemigosnintapis castigarqa chay pʼunchaymanta parlanapaj. Jehovaqa munan tukuypis chaymanta yachakunanchejta, astawanqa pikunachus payta sirvinchej chaykuna. Joel libroj yanapanwantaj chayta ruwayta atinchej.

2. ¿Imaynatá Bibliamanta waj libros yanapawanchej Joel ‘Jehová Diospa pʼunchayninmanta’ parlasqanta entiendenapaj?

² Bibliaj waj librosnin yanapawanchej Joel ‘Jehová Diospa pʼunchayninmanta’ parlasqanta aswan sumajta entiendenapaj ( 29-A nisqa recuadrota qhawariy). Jeremiaswan Esdraswan parlarqanku caldeos chayri babilonios Jerusalenman yaykuykunankumanta. Chantá 607 watapi Jerusalén chinkachisqa kananmanta Jesús niraj jamushajtin. Ajinapi juntʼakorqa Joelpa willasqan. Payqa nerqa langostas Judaman juntʼaykuspa tukuy imata tukuchinankuta (Joe 1:6; 2:1, 8-11, 20, 25 versiculosta 2Cr 36:17, 19; Jer 32:43 versiculoswan kikinchay). May chhika watasninman Jesusqa sutʼincharqa Jehová sajra runasta aswan qhepaman juzgananta, Joel libropi rikhurin chayman rijchʼakoj palabrastataj oqharerqa (Joe 2:31; Mt 24:29, 30). Pedroqa nerqa Joelpa ujnin profecian juntʼakusqanta Pentecostés 33 watapi, Dios espíritu santonta tʼakaykamorqa chaypacha (Joe 2:28-32; Hch 2:16-21). Pedro nerqa jina chayqa pasarqa Judiospa ‘qhepa pʼunchaykunasninpi’, chay pʼunchaykunataj tukukorqa ‘Jehová Diospa pʼunchayninpi’, 70 watapi romanos Jerusalenta thuñiykorqanku chaypacha. Chantapis Pedrowan Pablowan nerqanku ‘Jehová Diospa pʼunchaynin’ waj kanallantataj, chayqa niyta munan Joelpa qhelqasqan aswan qhepamanraj tukuynin aswan sumajmanta juntʼakunanta (1Te 5:2-4; 2Pe 3:12, 13).

3. ¿Pikunatataj Jehová castiganan karqa, chanta imaraykutaj?

³ Jehovaqa castiganan karqa wakin llajtasmanta, nacionesmanta runasta llajtanta sufrichisqankurayku. Joel qhelqarqa: “Jehová Diospa pʼunchaynenqa [...] chayamonqaña”, nispa (3:2-6, 12, 14, 19). Joelqa willarqa kay nacionespa contranpi: Tiro, Sidón, Edom, Egipto, Filistea ima (Filisteaj ujnin rejsisqa llajtanqa Asdod karqa). Joel kay nacionespa contranpi willasqanqa Bibliapi waj profeciasman rijchʼakullantaj (Eze 29:14-18; Am 1:8; Mal 1:3, 4 versiculoswan kikinchay). Watasninmantaj chay profeciasqa juntʼakorqanku. Chaytaj creeyninchejta mayta sinchʼiyachin. Chayrayku mana iskayrayanchejchu Joel imatachus nisqan aswan qhepamanpis juntʼakunanmanta.

4. Joel libropi nisqanman jina, ¿imatá ruwananchej tiyan Jehová Diospa pʼunchayninpi mana chinkachisqa kanapaj?

⁴ Joel libropi yachakunchej imatachus ruwanata ‘Jehová Diospa pʼunchayninpi’ mana chinkachisqa kanapaj. Dios yuyaychasqanman jina profeta Joel nerqa: “Jehová Diospa sutinta tukuy oqharejkunaqa salvasqa kanqanku”, nispa (2:31, 32). Pabloqa Joelpa nisqanta oqharerqa, cristianosmantaj nerqa salvakunankupaj Jehová Diospa sutinta oqharinanku kasqanta. Chantapis nerqa chayta ruwaspaqa, paypi creesqanchejta rikuchisqanchejta (Ro 10:13, 14).

5. ¿Joel libro imatá Jehovamanta yachachiwanchej?

⁵ Joel libroqa yuyarichiwanchej Jehová “khuyakuyniyoj, pacienciayoj, may jina munakuyniyojtaj” kasqanta (Joe 2:13; Éx 34:6). Jehovaqa paymanta karunchakojkunata perdonayta, bendeciyta munan, chayrayku may munakuywan kutinpunankuta nin (2:12-14, 21). Chantapis Jehovaqa cheqan kajta ruwan, payqa juchankumanta mana arrepientekojkunata, llajtanta sufrichejkunatapis mana iskayrayaspa castigan (1:15; 3:19).

Joel libromanta astawan yachakuy

6. Yachakusqanman jina, ¿maypitaj, chanta maykʼajtaj Joel profeta jina willarqa?

⁶ Qhelqaj: Joelmantaqa may pisillata yachanchej. Sutenqa niyta munan “Jehovamin Diosqa”. Payqa ichapis Jerusalenpi tiyakorqa, Judapitaj profeta jina willarqa. Imajtinchus payqa qhelqarqa Judamanta, Jerusalenmanta, templomanta ima (1:9, 14; 2:17, 32; 3:1, 2, 16-20). Hebreo parlaypi kaj Bibliapeqa Joel libroqa Oseas, Amós libros chaupipi kashan. Chayqa ichapis niyta munan Joel profeta jina willasqanta 900-801 watas chaynejta Jesús niraj jamushajtin, Oseas, Amós willarqanku chaypachasllataj. Chantapis Amosqa Joelpa nisqantasina oqharerqa, paytaj libronta qhelqayta tukucharqa 804 wata chayta (Joe 3:16; Am 1:1, 2). Chayrayku nisunman Joelqa Amosmanta aswan ñaupajta libronta qhelqasqanta, ichapis 820 wata chayta. Joelqa Jonás willarqa chaypachallataj Jehovaj nisqasninta willarqa.

7. ¿Imatataj Joel runasman nerqa, chanta imaynatataj libronta qhelqarqa?

⁷ ¿Imastaj pasarqa kay libro qhelqakushajtin? 820 watapi Jesús niraj jamushajtin, Judamanta reyqa Uzías karqa (ujnin sutenqa Azarías karqa). “Uziasqa Jehová Diospa qhawayninpi allin imasta ruwarqa”, chayrayku Judaqa ashkha maqanakuykunata atiparqa, qhapajtaj karqa (2Cr 26:3-14). Jinapis ashkhas llulla diosesta yupaychaypi urmarqanku (2Re 15:1-4). Chayrayku Joelpa willasqanqa allinpuni karqa. Payqa runasman nerqa arrepientekunankuta, Jehovatataj watejmanta yupaychanankuta (2:1, 12). Joelqa libronta qhelqashaspa sumaj palabrasta ajllarqa Jehová imatachus yuyasqanta, imaynachus sientekusqantapis willananpaj. Payqa wakin palabrasta kutin kutita oqharerqa, kikinchaykunasta ima churarqa, chaytataj sutʼita reparanchej langostas Judaman juntʼaykusqankumanta parlasqanpi (1:4, 6; 2:7). Joel castigosmanta parlajtinpis, paypa qhelqasqanqa kallpachawanchej. Imajtinchus Joel libropi reparanchej Jehová enemigosninta castigajtinpunipis, kamachisnintaqa jarkʼasqanta.

¿Imasmantá parlan?

8. Joel willasqanman jina, ¿imastataj langostas ruwaykunku?

 ⁸ May chhika langostas jallpʼapi tukuy imata mikhukapunku (1:1–2:11). Joelqa mancharinapaj jina may chhika langostasta rikun, chay langostastaj tukuy imata mikhukapunku. Manaña mikhuna kasqanraykutaj manaña templopi jaywanasta jaywankuchu. Langostasqa ninakunku uj jatun nacionwan, “mana yupay atina runasniyoj” nacionwan. Chay nacionpa soldadosnintaj Jehovaj nisqanta ruwanku ‘Jehová Diospa pʼunchayninpi’ (1:6; 2:11;  29-B nisqa recuadrota qhawariy).

9. ¿Imatataj Jehová mana kasukoj llajtanman nin?

⁹ Jehovaqa llajtanta nin arrepientekunanta, paymantaj kutinanta (2:12–32). Payman kutejtinkoqa khuyakunanta nin, manañataj castigota apachimunanta. Payqa nin perdonananta, bendecinanta, espirituntataj qonanta.

10. ¿Imatataj Jehová ruwanqa llajtanta sufrichejkunawan?

¹⁰ Jehovaqa nacionesta juzganqa llajtanta sufrichisqankurayku (3:1-21). Payqa nin preso apasqa kajkunata Judaman, Jerusalenman kutichimunanta. Chantá nacionesta tantaykonqa, juzganqataj ‘Jehosafat ura pampapi’ chayri “Juzgana ura pampapi” (3:12, 14). Joel libroj tukukuyninpi nin: “Jehová Diostaj Sionpi tiyakonqa”, nispa (3:21). Chayqa rikuchin Jehová llajtanta jarkʼanantapuni, bendecinantapunitaj.