¿Imaraykutaj Jehová kay librota Palabranpi churacherqa?

1. ¿Oseas libropi imatataj Jehovamanta yachakunchej, chanta ima kikinchaywantaj chayta sutʼinchan?

 ¿IMAYNA kamachejtaj Jehová? ¿Runasta munakunchu? ¿Kamachisninmanta interesakunchu? Arí, Oseas librotaj chayta rikuchin. Chaypeqa astawan parlan Jehová khuyakuyniyoj kasqanmanta. Uj runa arrepientekusqanta manaraj rikuchejtinpis Jehovaqa khuyakuyninta rikuchiyta munan. Chayta sutʼita rikuchinanpajtaj Oseasmanta wasanchaj warminmantawan parlarqa (3:1). Chay tʼukuna kikinchaywan Jehovaqa sutʼita rikucherqa “mana tanqasqa jinallachu” llajtanta munakusqanta, llajtan contranta oqharikojtinpis (14:1-4).

2. ¿Oseas libropi imastawantaj Jehovamanta yachakunchej?

² Oseas libropi yachakullanchejtaj Jehová kamachisninta mana saqerparisqanta, pacienciayoj kasqanta ima (2:19, 20). Israelitasqa Jehovata sapa kuti saqerpaj kanku waj diosesta yupaychanankupaj, jinapis payqa “munakuy waskhaswan” paykunata aysamullarqapuni (11:1-4). Chaywanpis Jehovaj paciencianqa tukukuyniyoj, mana wiñaypaj sajra imasta qhawakullanchu (10:9-12). Jehovaqa chejnikun payta yupaychani nishaspa sajra imasta ruwajkunata. Chayrayku payta kusichiyta munanchej chayqa, payta kasukuna, munakusqanchejraykutaj sirvina (6:4, 6; 10:1, 2).

3. ¿Ima sumaj yachachiytaj Oseas libropi tiyan?

³ Oseas libropeqa Jehová uj sumaj imata yachachiwanchej: ‘Jehová Diospa ñankunasninta’ puriy aswan sumajpuni kasqanta (14:9). Israelmanta a kajkunaqa yuyaj kanku waj nacionespi, diosesninkupipis confiay aswan sumaj kasqanta (7:11; 9:10; 12:1). Jinapis chay nacionesqa israelitasta wasanchanankupajña kasharqanku, chay diosesninkutaj mana imatapis ruwankumanchu karqa paykunata yanapanankupaj (8:8, 9; 10:5). Jehovatajrí paykunata cuidarqapuni, kasukojtinkutaj aswan qhepaman bendecinanta nerqa (2:8, 18).

4. ¿Oseas libropi ima sumaj willaytaj cristianospaj kan?

⁴ Oseas libroqa ñaupa tiempomanta cristianospaj may sumaj karqa, noqanchejpajpis may sumajllataj. Oseaspa qhelqasqanmantaqa Griego Qhelqasqaspi Jesuspis wajkunapis parlarqanku, chantapis Oseaspa profeciasnin juntʼakorqanku ( 28-A nisqa recuadrota qhawariy). Jehová Mesiasmanta nerqa: “Wawayta wajyarqani Egiptomanta llojsimunanpaj”, nispa (11:1). Chayqa juntʼakorqa Jesusta tatasnin Egiptoman apajtinku, Herodes wañupojtintaj Israelman kutinpojtinku (Mt 2:14, 15). Apóstol Pabloqa sutʼincharqa Oseaspa wakin profeciasnin niyta munasqanta mana israelitas kajkunapis Jehovata sirvinankuta, “kausaj Diospa wawasnin” kanankuta ima (1:10; 2:23). Ajinamantataj paykuna Cristowan gobernamunankuta (Ro 9:25, 26 versiculosta 1Pe 2:9, 10 versiculoswan kikinchay).

Oseas libromanta astawan yachakuy

5. ¿Imastataj yachanchej profeta Oseasmanta?

⁵ Qhelqaj: Oseas suteqa pisi letrasllapi kashan, Hosaya niytataj munan. Hosaya sutitaj niyta munan “Jahpa salvasqan, Jah salvan” (1:1, sutʼinchaynin). Oseaspa wakin profeciasnenqa Judapaj karqa, sur ladopi kaj gobiernopaj. Pero casi tukuynin profeciasqa Israelpaj karqa, norte ladopi kaj gobiernopaj. Oseasqa profeta jina willarqa por lo menos 804 watamantapacha 745 wata pasaykama Jesús niraj jamushajtin, nisunman 59 watasta jina. Chay tiempopi Amoswan Odedwan Israelpi profetas karqanku, Judapitaj Isaiaswan Miqueaswan. Oseasqa ichapis libronta qhelqayta tukucharqa 745 watamanta 740 watakama. b

6. Oseaspa tiemponpi, ¿imayná Israelpi kausay karqa?

⁶ ¿Imastaj pasarqa kay libro qhelqakushajtin? Israelpi Jehovata mana sirviyta munajtinkupis, ashkha problemas kajtinpis, Oseasqa ashkha watasta Jehovata sirverqa, nitaj wasancharqachu. Profeta jina willayta qallarishajtintaj, sajra rey Jeroboán II kamachisharqa. Chay rey sajra kajtinpis Israelqa ashkha guerrasta atiparqa, maytataj qhapajyarqa (2Re 14:24-28). Runasqa yuyaj kanku Baalpa yanapayninwan tukuy imapis allin kasqanta. Llulla dios Baalta yupaychanankupajtaj machaykoj kanku, Baalpa templosninpi kaj khuchi warmiswantaj khuchichakoj kanku. Paykunaqa maytapuni Jehovamanta karunchakorqanku (4:11-13). Jeroboán wañupusqantawan runasqa gobiernorayku maqanakorqanku, wañuchinakorqankutaj (2Re 15:8-20). Jeroboanpa qhepanpi kaj reyesqa Egiptowan Asiriawan ujchaykukuyta munarqanku, nitaj mayqenninkupis Jehovapi confiarqankuchu.

7. ¿Imatataj Jehová israelitasman Oseasnejta nerqa?

⁷ Jehovaqa profeta Oseasnejta Israel nacionpa contranpi quejanta rejsicherqa. Payqa israelitasman reparacherqa may chhika juchasta ruwashasqankuta, chayraykutaj sufrinankuta (4:1, 2, 9). Chantapis yuyaricherqa khuyakuyniyoj kasqanta, perdonananpajtaj wakichisqa kasqanta. Jehovaqa chay kutillatawanña arrepientekunankuta nerqa. Chantá saqerqa Asiria Samariata japʼikapunanta.

8. ¿Imayna qhelqasqataj kashan Oseas libro?

⁸ Waj imastawan yachakuy: Oseasqa casi tukuynin libronta uj yarawita jina qhelqarqa, nisunman uj takiyta jina, ashkha kikinchaykunatataj churarqa (4:16; 5:13, 14; 6:3,4). Oseasqa sinchʼi palabrasta oqharerqa israelitas sajra imasta ruwashasqankuta ninanpaj. Jinapis kʼacha palabrasta oqharerqa israelitas Jehovaman kutinpunankuta ninanpaj (10:1; 14:1, 2).

¿Imasmantá parlan?

9. Oseasmanta valekuspa, ¿imaynatá Jehová rikucherqa khuyakuyniyoj kasqanta?

⁹ Jehovaqa Oseasmanta, wasanchaj warminmantawan parlan israelitasman khuyakuyniyoj kasqanta entiendechinanpaj (1:1–3:5). Jehovaqa Oseasman nin ‘qhenchachakonqa’ chay warmiwan casarakunanta (1:2). Chayrayku Oseasqa Gomerwan casarakun, uj wawayojtaj kanku. Chantá Gomerqa iskay wawasta nacechikun, chay wawasqa manasina Oseaspajchu karqanku. c Jehová kinsantin wawasman sutita churan. Chay kinsa wawaspa sutisninku imachus niyta munasqanqa rikuchin Jehová Israelta juzgananta, qhesachanantataj. 2 capitulopi Diosqa nin israelitasta castigaytawan khuyakunanta, paymantaj kutichimunanta. Jehová maykamachus perdonayta atisqanta israelitasta entiendenankupajqa, Jehovaqa Oseasman nin: “Qhenchachakuspa purishan chay warmiykiwan kutinakanpuy”, nispa (3:1).

10, 11. ¿Imatataj israelitas Jehovaj contranpi ruwarqanku?

¹⁰ Jehovaqa nin israelitasta castigananta (4:1–13:16). Oseasqa Jehovaj quejanta Israelpa contranpi rejsichin, israelitas may chhika juchasta ruwasqankutataj ujmanta uj nin (4:1, 2). Chantapis Judaj juchasninmanta parlallantaj (5:5). Oseas israelitasta nin Jehovaman kutinpunankuta (6:1). Jinapis israelitasqa waj nacionespa yanapayninkuta mañakunku (7:11). Israelitasqa juchankurayku llakiypi rikukonqanku (8:7-10). Jehová paykunata castiganqa, qhesachanqataj (9:17; 10:15).

¹¹ Jehovaqa israelitasta yuyarichin paykunata munakusqantapuni (11:1-3). Jinapis paykunaqa mana Jehovata munakorqankuchu (11:7; 12:1). Jehovaj contranpi oqharikorqanku, chayrayku Israelpa capitalnin Samaria thuñisqa karqa (13:16).

12. ¿Imataj kanman karqa israelitas Jehovaman kutejtinku?

¹² Jehovaqa israelitasta nin payta watejmanta sirvinankuta (14:1-9). Jehovaqa israelitasta mayta rogakun payman kutinankupaj, payman kutejtinkoqa khuyakunanta, munakuyninta rikuchinanta ima nin.