Karta pa e Efesionan 2:1-22
2 Ademas, debí na boso fayonan i boso pikánan ta komo si fuera boso tabata morto, pero Dios a duna boso bida.+
2 Un tempu, boso tabata biba manera* e hendenan di e mundu* akí,+ i boso tabata hasi e kosnan ku e gobernante di e mundu akí tabata ke.+ Ta é ta dominá e manera di pensa*+ ku ta influensiá hende desobediente, i e manera di pensa ei ta plamá tur kaminda meskos ku airu.
3 Sí, un tempu nos tur tabata komportá nos mes meskos ku nan, siguiendo e deseonan di nos kurpa.+ Nos tabata hasi loke nos kurpa i nos mente tabata deseá.+ I for di ora nos a nase, nos tabata hende ku a meresé e rabia di Dios*+ meskos ku tur otro hende.
4 Pero Dios ta masha miserikòrdioso.+ Anto debí na su gran amor pa nos,+
5 el a duna nos bida i el a uni nos ku Kristu, maske nos tabata morto debí na nos pikánan.+ Ta danki na Dios su bondat inmeresí, boso a ser salbá.
6 Ademas, Dios a duna nos bida,* i el a duna nos un lugá di sinta den shelu pasobra nos ta disipel di* Kristu Hesus.+
7 Dios a hasi e kosnan ei pa asina e por demostrá su gran* bondat inmeresí den e mundu* nobo ku ta bini. Dios ta bai demostrá su bondat inmeresí ora e hasi bon kos pa nos ku ta disipel di Kristu Hesus.
8 Boso ku tin fe a ser salbá danki na Dios su gran bondat inmeresí+ i no debí na algu ku boso a hasi. E areglo ei ta un regalo di Dios.
9 Ke men, boso no a ser salbá pa motibu di boso bon obranan.+ Di manera ku niun hende no tin motibu pa broma.
10 Nos ta obra di Dios su man; komo ku nos ta disipel di Kristu Hesus,+ Dios a krea nos+ pa hasi e bon obranan ku el a disidí di antemano ku nos lo hasi.
11 P’esei, kòrda ku boso di nasementu tabata hende di e nashonnan.* Anto un tempu, e hendenan ku a ser sirkunsidá* pa hende tabata yama boso “hende ku no a ser sirkunsidá.”
12 E tempu ei, boso no tabata konosé Kristu, i boso no tabatin nada di haber ku* e nashon di Israel; pues, boso no tabata forma parti di e paktonan basá riba e promesa di Dios.+ Boso no tabatin speransa, i boso tabata biba den mundu sin konosé Dios.+
13 Pero awor, boso ta disipel di Kristu Hesus. Sí, boso ku un tempu tabata leu for di Dios a yega serka Dios pa medio di e sanger di Kristu.
14 Bon mirá, ta Kristu a sòru pa nos tin pas;+ el a hasi e dos gruponan ei un solo grupo,+ i el a tumba e muraya* ku tabata separá e dos gruponan ei.+
15 Kristu a sakrifiká su kurpa, i asina el a pone fin na loke tabata kousa enemistat entre e dos gruponan, esta, Lei di Moises, ku tabata konsistí di mandamentu i lei. For di e dos gruponan ei ku ta disipel di Kristu, Kristu a forma un solo pueblo nobo.*+ I el a trese pas entre nan.
16 Ademas, pa medio di Kristu su morto riba e staka di tormento,*+ Kristu a yuda e dos gruponan ei drecha nan relashon* ku Dios i bira un solo pueblo.* Pues, pa medio di su morto, el a kaba ku e enemistat ku tabatin.+
17 Kristu a bini i prediká bon notisia di pas tantu na boso ku tabata leu for di Dios komo na e hendenan ku tabata serka di Dios.
18 Pues, ta pa medio di Kristu su sakrifisio, nos, esta, e dos gruponan ei, por aserká e Tata libremente debí ku nos tur ta haña e mesun spiritu santu.
19 Pues, awor boso no ta estranhero mas ni siudadano di otro pais.+ Mas bien, boso ta siudadano+ huntu ku* tur e otro rumannan santu,* i boso ta parti di e famia di Dios.+
20 Boso a ser trahá manera un edifisio riba fundeshi di e apòstelnan i di e profetanan,*+ i Kristu Hesus ta e piedra di mas importante di e fundeshi.+
21 E edifisio i tur su partinan ta bon hinká den otro; sí, nan ta uní.+ Komo ku e edifisio ta den union ku Kristu, e ta birando mas i mas grandi te ora e ta un tèmpel santu pa Yehova.*+
22 Den union ku Kristu, Dios ta formando boso huntu ku e otro hendenan pa bira un kas kaminda Dios ta biba, pasobra su spiritu santu ta einan.+
Nota
^ Òf: “tabata sigui e rumbo di.”
^ Lit.: “tabata yu di rabia.”
^ Lit.: “el a lanta nos.”
^ Òf: “ta den union ku.”
^ Lit.: “e rikesa sobresaliente di su.”
^ Lit.: “boso tabata separá di.”
^ Pablo ta referí indirektamente na e muraya di partishon ku tabatin den e kompleho di tèmpel i ku a stroba hende ku no tabata hudiu di yega na e plenchinan kaminda hudiu so tabatin mag di drenta.
^ Lit.: “un hende nobo.”
^ Òf: “rekonsiliá.”
^ Lit.: “un kurpa.”
^ Lit.: “e santunan.”
^ Òf: “ta kosiudadano di.”
^ Esaki probablemente ta referí na profeta kristian.
