Karta pa e Efesionan 1:1-23
1 Esaki ta un karta di ami, Pablo. Tabata Dios su boluntat pa mi sirbi komo apòstel di Kristu Hesus. Mi ta skirbiendo e karta akí pa e rumannan santu* na Efeso+ ku ta fiel disipel di* Kristu Hesus.
2 Mi ta deseá pa boso haña bondat inmeresí* i pas ku ta bini di Dios, nos Tata, i di nos Señor Hesukristu.
3 Alabá sea e Dios i Tata di nos Señor Hesukristu. Pasobra Dios a bendishoná nos ku tur tipo di bendishon den shelu* komo ku nos ta disipel di Kristu,+ sí, tur tipo di bendishon ku ta bini for di spiritu santu.
4 De echo, Dios a skohe nos promé ku mundu a ser fundá* pa nos ta den union ku Kristu. Dios a hasi esei pa nos mustra amor, pa nos ta santu i pa nos ta sin defekto+ su dilanti.
5 Dios a disidí di antemano ku nos+ lo ser adoptá komo su yunan+ pa medio di Hesukristu. Esei tabata kuadra ku loke ta agrad’é i ku su boluntat.+
6 Dios a disidí esei di antemano pa asina hende por alab’é pasobra, na un manera bondadoso, el a usa su Yu stimá+ pa demostrá nos su gran bondat inmeresí.+
7 Pa medio di e sanger di su Yu, e reskate a ser pagá i nos a ser librá di piká;*+ sí, nos ta haña pordon di nos pikánan.+ En bèrdat Dios su bondat inmeresí ta masha grandi!
8 Generosamente, Dios a demostrá nos e bondat inmeresí ei, i el a duna nos sabiduria i komprondementu* den tur asuntu
9 ora el a laga nos konosé e sekreto sagrado+ di su boluntat. E sekreto sagrado ei ta kuadra ku loke ta agrad’é i ku su propósito.
10 E sekreto sagrado ei ta enserá ku lo establesé un manera pa manehá kos ora e tempu stipulá yega. Dios lo usa e maneho ei pa reuní tur kos pa nan ta den union ku Kristu, e kosnan den shelu i e kosnan riba tera.+ Sí, tur kos lo ser reuní pa nan ta den union ku Kristu.
11 Nos ta den union ku Kristu, i huntu kuné Dios a skohe nos pa ta heredero.+ El a disidí esei di antemano segun su propósito. Sí, e ta hasi tur kos manera e disidí di akuerdo ku su boluntat.
12 Nos ta e promé hendenan ku a pone konfiansa* den Kristu, i Dios a disidí di antemano ku nos lo alabá Dios pasobra e ta asina maravioso.
13 Pero boso tambe a pone konfiansa den dje despues ku boso a tende e palabranan di bèrdat, esta, e bon notisianan tokante boso salbashon. Despues ku boso a kere den Kristu, Dios a seya boso+ tambe ku e spiritu santu ku el a primintí. El a usa Kristu pa hasi esei.
14 Spiritu santu ta sirbi komo garantia di e regalo ku Dios lo duna nos.+ Dios a seya nos pa asina e por libra su pueblo+ pa medio di un reskate,+ i esei lo resultá den gran gloria i alabansa pa Dios.
15 P’esei, for di dia ku mi a tende di boso fe den Señor Hesus i di e amor ku boso ta demostrá na tur e rumannan santu,
16 mi no a stòp di gradisí Dios pa boso. Mi ta sigui hasi orashon pa boso.
17 Mi ta pidi pa Dios, e Tata glorioso, esta, e Dios di nos Señor Hesukristu, duna boso sabiduria i yuda boso komprondé e kosnan ku e ta revelá, pa asina boso haña konosementu eksakto di dje.+
18 Dios a habri boso mente pa boso mira* i pa boso sa ki speransa el a duna boso ora ku el a yama boso. Sí, el a habri boso mente pa boso por sa kiko ta e bendishonnan glorioso ku lo e duna komo rekompensa na e personanan santu*+
19 i pa boso por sa kon sobresaliente Dios su gran poder ta ku el a demostrá na nos ku ta kreyente.+ E gran poder ei tabata bisto
20 ora Dios a lanta Kristu for di morto i dun’é un lugá di sinta na su man drechi+ den e lugánan selestial.
21 Kristu ta muchu mas haltu ku tur gobièrnu, outoridat, poder, lider i kualke persona ku tin un título importante,+ no solamente den e tempu* akí, sino tambe den futuro.
22 Ademas, Dios a pone tur kos bou di Kristu su kontrol,*+ i Dios a hasié kabes riba tur kos ku tin di haber ku e kongregashon.+
23 E kongregashon ta e kurpa di Kristu,+ i e kongregashon tin un abundansia di tur Kristu su kualidatnan. Kristu ta duna e kongregashon tur loke ta nesesario pa e ta kompleto.
Nota
^ Òf: “ku ta den union ku.”
^ Aki Pablo ta bisa ku e kristiannan ungí a risibí kaba “tur tipo di bendishon den shelu,” aunke nan tabata riba tera ainda.
^ Aparentemente, esaki ta referí na e tempu ku Ádam ku Eva a kuminsá haña yu.
^ Òf: “Nos a ser librá di piká pa medio di e pago ku a ser hasí ku e sanger di su Yu.”
^ Òf: “i sano huisio.”
^ Òf: “speransa.”
^ Lit.: “e santunan.”
^ Lit.: “a iluminá e wowonan di boso kurason.”
^ Lit.: “pia.”
