1. Splica con un angel a bira Satanas.

UN TEMPO, e tabatin un bon relacion cu Jehova. Pero na dado momento, el a cuminsa desea pa hende ador’e. En bes di rechasa e mal deseo ey, el a laga esaki crece y esey a pon’e peca. (Sant. 1:14, 15) Ta di ken nos ta papiando? Di un angel cu a rebela contra Jehova y cu awe nos conoce como Satanas. Bijbel ta bisa cu “e no a keda firme den e berdad” y a bira “e tata di mentira.”—Juan 8:44.

2, 3. Kico e nombernan “Satanas”, “Diabel”, “colebra” y “dragon” ta revela tocante Jehova su enemigo di mas grandi?

² E angel rebelde aki ta e enemigo di mas grandi di Jehova y di humanidad. Bijbel ta dun’e varios titulo, y nan ta yuda nos mira con malbado e ta realmente. Por ehempel, Satanas ta nifica “Resistido” of Opositor. Y esey ta indica cu e angel malbado aki no ta somete su mes na e gobernacion di Dios, sino mas bien ta lucha contra dje cu tur su forsa. E deseo di mas grandi di Satanas ta di caba cu e gobernacion di Jehova.

³ Na Revelacion 12:9, nos ta haya mas nomber pa Satanas. Un di nan ta “Diabel”, cu ta nifica “Calumniado.” Esey ta pasobra Satanas a daña e reputacion di Jehova ora el a acusa  Dios di ta un mentiroso. E expresion “colebra original” ta laga nos corda e dia tristo cu e angel aki a uza un colebra pa gaña Eva. Y e expresion “dragon grandi” ta transmiti e idea di un monster spantoso. Esaki ta un bon descripcion di Diabel, pasobra e ta feroz, cruel y malbado. E kier pa e proposito di Jehova fracasa, y e kier caba cu e pueblo di Dios.

4. Kico nos lo analisa den e articulo aki?

⁴ Ta bisto anto cu Satanas ta hopi peligroso y e ta dicidido pa pone nos bira infiel na Dios. Ta pesey Bijbel ta spierta nos: “Mantene boso sano huicio y sea alerta. Boso adversario, Diabel, ta cana rond manera un leon cu ta [brul], buscando ken e por habraca.” (1 Ped. 5:8) E articulo aki lo analisa tres caracteristica di Satanas cu ta demostra dicon nos tin cu tene hopi cuidou cu ne.

5, 6. (a) Menciona algun ehempel cu ta mustra cu e angelnan ta hopi poderoso. (b) Den ki sentido Diabel tin “e medio pa causa morto”?

⁵ E angelnan ta criaturanan spiritual hopi poderoso. (Sal. 103:20) Nan ta hopi mas fuerte y inteligente cu nos. Ta claro cu e angelnan fiel ta uza nan poder pa haci bon. Por ehempel, un biaha un angel di Jehova a haci algo cu lo tabata imposibel pa un hende haci: el a mata 185.000 soldaat enemigo di Israel; un tarea dificil hasta pa henter un ehercito. (2 Rey. 19:35) Na un otro ocasion, un angel a uza su habilidad y poder sobrehumano pa saca e apostelnan di Hesus for di prizon. Aunke tabatin wardador di preso para na porta, nan no a ripara mes cu un angel a habri e portanan di prizon, saca e apostelnan afo y despues bolbe cera e portanan na yabi.—Echo. 5:18-23.

⁶ Pues, mientras cu angelnan fiel ta uza nan poder pa haci bon, Satanas ta uza su poder pa haci malo. Anto ta basta poder y influencia e tin. Bijbel ta yam’e “e gobernante di e mundo aki” y “e dios di e mundo aki.” (Juan 12:31; 2 Cor. 4:4) Satanas e Diabel hasta tin “e medio pa causa morto.” (Heb. 2:14) Esaki no ta nifica cu e ta mata tur hende directamente. Kico esaki ta nifica anto? Wel, ta Satanas a gaña Eva y pone cu Adam a desobedece Dios, y como resultado pica y morto a pasa pa tur hende. (Rom. 5:12) Ademas, e ta esun cu a sembra odio y violencia den e mundo aki. Den e sentido ey, Diabel tabatin “e medio pa causa morto.” Manera Hesus a bisa, e ta “un matado.” (Juan 8:44) Sin duda, e ta un enemigo poderoso.

7. Con e demoñonan a demostra cu nan ta poderoso?

⁷ Ora nos ta opone Satanas, nos ta opone tambe tur esnan cu ta apoy’e y cu ta rebela contra e gobernacion di Dios. Esey ta inclui un grupo grandi di angel rebelde cu Bijbel ta yama demoño. (Rev. 12:3, 4) Hopi biaha, e demoñonan a uza nan forsa sobrehumano pa tormenta hende y pa pone nan sufri. (Mat. 8:28-32; Mar. 5:1-5) No lubida nunca con poderoso e angelnan malbado ey y nan gobernante, Diabel, ta. (Mat. 9:34) Sin e yudansa di Jehova, hamas nos lo por gana e bataya contra Satanas.

8. (a) Kico ta e “plato principal” di Satanas? (Wak e prome plachi.) (b) For di loke bo mes a mira, con e mundo aki ta refleha e spirito cruel y malicioso di Satanas?

⁸ Apostel Pedro a bisa cu Satanas ta manera “un leon cu ta [brul].” Segun un buki di consulta, e palabra Griego traduci como  “[brul]” ta transmiti e idea di “un bestia hopi hambra.” Esaki ta un bon descripcion di e actitud cruel y malicioso di Diabel, pasobra aunke e tin henter e mundo den su gara, e ta sigui purba di habraca mas hende; nunca e ta keda satisfecho. (1 Juan 5:19) Den su bista, e mundo ta simplemente e “aperitivo.” Su “plato principal” ta e unginan cu ta riba Tera y nan compañeronan, esta, e “otro carne[nan].” (Juan 10:16; Rev. 12:17) Satanas ta dicidido pa caba cu e pueblo di Dios. E atakenan di persecucion cu el a lansa contra cristiannan berdadero for di e prome siglo te cu awe ta demostra con cruel y malicioso Satanas ta.

9, 10. (a) Con Satanas a ataca e antiguo nacion di Israel? (Duna algun ehempel.) (b) Dicon Satanas tabatin un motibo special pa ataca Israel? (c) Con bo ta kere Satanas ta sintie cada biaha cu un sirbidor di Jehova comete un pica serio?

⁹ Diabel a demostra na un otro manera con cruel e ta. Un leon hambra no ta sinti niun tiki duele di su prooi. E ta mat’e sin compasion y no ta sinti niun remordimento despues. Di igual manera, Satanas no tin niun tiki duele di e personanan cu e ta ataca. Con bo ta kere Satanas lo a sinti ora e tabata wak e Israelitanan cay den pica manera inmoralidad sexual y golosidad? Ora cu Zimri a comete un acto inmoral y Gehazi a haci coy golos, nan dos a sufri consecuencianan amargo. Imagina bo con Satanas manera un leon tabata brul di goso ora el a mira esey.—Num. 25:6-8, 14, 15; 2 Rey. 5:20-27.

¹⁰ Satanas tabatin un motibo special pa ataca e nacion di Israel: ta den e nacion ey e Mesias lo a nace, esun cu lo a aplast’e y demostra cu Jehova tin e derecho di goberna. (Gen. 3:15) Satanas no tabata kier pa e Israelitanan tin e aprobacion di Dios, pues el a haci tur loke e tabata por pa contamina nan cu pica. No kere cu e tabatin duele di David ora cu el a comete adulterio ni cu el a sinti duele di Moises ora cu e profeta a perde e oportunidad di drenta e Tera Priminti. Al contrario! Satanas ta gosa un mundo cada biaha cu e mira un sirbidor di  Dios comete un pica serio. Ademas, e ta uza e victorianan ey pa haci bofon di Jehova.—Prov. 27:11.

11. Dicon probablemente Satanas a ataca Sara?

¹¹ Prome cu e nacion di Israel a ser forma tabatin un famia cu Satanas a odia specialmente: e famia di Abraham, ya cu ta for di su liña di descendencia e Mesias lo a bin. Laga nos wak un suceso cu ta demostra esey. Dios a priminti Abraham cu lo el a bira “un nacion grandi.” (Gen. 12:1-3) Poco despues, mientras Abraham cu Sara tabata biba na Egipto, Farao su bista a cay riba Sara y el a duna ordo pa trece Sara na su palacio p’e por a casa cu ne. Afortunadamente, Jehova a interveni na tempo y a scapa Sara di e situacion dificil ey. (Gen. 12:14-20, NW) Un poco prome cu Isaak a nace, casi e mesun cos a bolbe pasa cu Sara den e stad di Gerar. (Gen. 20:1-7) Ta Satanas lo tabata tras di e situacionnan ey? Corda cu Sara a bandona e stad rico di Ur pa bay biba den tent. Kisas Satanas a pensa cu lo e por a lag’e cay den tentacion cu e palacionan luhoso di Farao y Abimelek? Podise Satanas a kere cu Sara lo a traiciona su casa—y Jehova—y comete adulterio? Bijbel no ta bisa; loke si nos sa ta cu e Diabel lo a keda hopi contento si e por a stroba Sara di bira parti di e liña di descendencia di e Mesias. Satanas lo no a sinti niun tiki duele si e por a caba cu Sara su bon reputacion, su matrimonio y su relacion cu Jehova. Esta cruel y malicioso Satanas ta!

12, 13. (a) Con Satanas a demostra despues cu Hesus a nace cu e ta cruel y malicioso? (b) Kico bo ta kere Satanas ta pensa di mucha- y hobennan cu ta stima Jehova y ta haci nan best pa sirbie awe?

¹² Hesus a nace siglonan despues di Abraham. Bo ta kere cu Satanas a pensa cu esaki si tabata un baby tutu cu e tabatin gana di carga den su brasa? Claro cu no! E tabata sa cu e baby aki lo a crece y bira e Mesias priminti. Ademas, Hesus tabata e parti principal di e descendencia di Abraham, esun cu despues lo “destrui e obranan di Diabel.” (1 Juan 3:8) Acaso Satanas lo a rasona cu lo ta mucho cruel pa mata un mucha indefenso? No, Satanas ta sin escrupulo; e no ta worry cu loke ta bon of malo. Y den caso di e mucha Hesus no tabatin excepcion. Con asina?

¹³ Rey Herodes a rabia masha hopi ora cu astrologonan a bin puntra pa e “rey di e Hudiunan”, y e kier a mata e baby. (Mat. 2:1-3, 13) Pa haci sigur cu e ta logra su meta, el a manda mata tur mucha homber di dos aña di edad bay abou na Betlehem y den henter e region ey banda. (Lesa Mateo 2:13-18.) Afortunadamente, Hesus a sobrevivi e matanza teribel ey. Pero kico esaki ta siña nos di nos enemigo Satanas? Nos bida no ta bal nada den bista di Diabel. Ni cu mucha e no tin compasion. Di berdad e ta “un leon” cu ta busca hende pa habraca. Nos no mester descuida nunca, pasobra Diabel ta masha peligroso y cruel mes.

14, 15. Con Satanas “a ciega mente di esnan cu no ta creyente”?

¹⁴ E unico manera cu Satanas por aleha hende for di nos Dios stima, Jehova, ta si e logra gaña nan. (1 Juan 4:8) Satanas ta gaña hende di tal manera cu nan no ta “consciente di nan necesidad spiritual”, es decir, nan no ta realisa cu nan tin mester di Dios. (Mat. 5:3) Diabel “a ciega mente di esnan cu no ta creyente” pa “luz di e glorioso bon noticia tocante Cristo, kende ta e imagen di Dios, no briya riba nan.”—2 Cor. 4:4.

 ¹⁵ Un di e medionan principal cu Satanas ta uza pa gaña hende ta religion falso. E sa cu Jehova ta e Dios cu ta exigi devocion exclusivo; e “no ta tolerá ningun otro dios.” (Exo. 20:5, BPK) Pues, nos por imagina nos cu Satanas ta keda hopi contento ora e mira cuanto hende ta adora antepasado, naturaleza, bestia of cualkier otro persona of cos cu no ta Jehova. Tambe e ta laga hopi hende kere cu nan ta adorando Dios manera mester ta, mientras cu en realidad e tin nan sclavisa na doctrinanan falso y ritonan cu no ta yuda cu nada. Nan ta den e mesun situacion lamentabel cu e Israelitanan den tempo di Isaias. Jehova a suplica nan: “Pakico boso ta gasta placa na loke no ta pan, y ta gasta boso sueldo na loke no ta satisface? Scucha mi bon y come loke ta bon, y laga boso alma gosa den abundancia.”—Isa. 55:2.

16, 17. (a) Dicon Hesus a bisa Pedro: “Kita for di mi dilanti, Satanas”? (b) Kico Satanas ta haci awe pa pone nos lubida cu e tempo ta urgente?

¹⁶ Satanas por gaña hasta un sirbidor celoso di Jehova. Por ehempel, wak kico a pasa ora cu Hesus a bisa su discipelnan cu pronto hende lo a mat’e. Pedro a hala Hesus un banda y, cu tur su bon intencion, a bis’e: “Sea bondadoso cu bo mes, Señor; esey sigur lo no pasa cu bo.” Pero Hesus a contesta Pedro cu firmeza: “Kita for di mi dilanti, Satanas!” (Mat. 16:22, 23) Dicon Hesus a bisa Pedro esey? Pasobra Hesus tabata sa cu e tabata acercando un di e momentonan di mas importante den historia. E tabata a punto di sacrifica su bida como rescate y demostra cu Diabel ta un mentiroso. No tabata e momento pa e ta “bondadoso” cu su mes. Pero esey ta loke Satanas lo tabata kier. Esta feliz lo el a sintie si Hesus lo tabata menos alerta y a bay tras di Pedro!

¹⁷ Nos tambe ta biba den un tempo critico: fin di e mundo aki ta cerca. Satanas lo kier pa nos ta menos alerta—“[ser] bondadoso” cu nos mes—y trata di tin un bida mas comodo posibel den e mundo aki. E kier pa nos lubida con urgente e tempo aki ta. Pero no dun’e e satisfaccion ey. Al contrario, haci loke Hesus a manda: “Keda vigila.” (Mat. 24:42) No kere e mentira di Diabel cu e fin ta leu ainda of cu e fin lo no yega nunca.

18, 19. (a) Satanas ta purba di convence nos di kico? (b) Con Jehova ta yuda nos mantene nos sano huicio y keda alerta?

¹⁸ Satanas ta uza un otro engaño mas cu ta dun’e bon resultado. E ta purba di convence nos cu Dios no stima nos y cu nos picanan ta imperdonabel. Pero eseynan ta mentira di Satanas. Si nos pensa bon, ken ta esun cu en realidad no merece e amor di Jehova? Ta Satanas. Y ken ta esun cu en realidad no merece pordon? Ta Satanas. En cambio, Bijbel ta duna nos e siguransa: “Dios no ta inhusto pa lubida boso trabou y e amor cu boso a mustra pa su nomber.” (Heb. 6:10) Jehova ta aprecia e esfuerso cu nos ta haci pa agrad’e, y nos sirbishi no ta envano. (Lesa 1 Corintionan 15:58.) Pesey, no laga e mentiranan di Satanas gaña bo.

¹⁹ Pues, manera nos a mira, Satanas ta poderoso, cruel y engañoso. Con nos por gana e bataya contra un enemigo asina teribel? Solamente cu e yudansa di Jehova. Su Palabra ta siña nos tocante e metodonan di Satanas, y debi na esey “su trikinan no ta desconoci pa nos.” (2 Cor. 2:11) Ora nos ta compronde con Satanas ta ataca, ta mas facil pa nos mantene nos sano huicio y keda alerta. Pero djis conoce su trikinan no ta suficiente. Bijbel ta bisa: “Opone Diabel, y lo e huy for di boso.” (Sant. 4:7) E siguiente articulo lo trata tres area den cua nos por gana e bataya contra Satanas.