TABATA meymey di aña 1970. Mi tabata un soldaat di 20 aña y interna den Valley Forge General Hospital di Phoenixville, na Pennsylvania (Merca). Mi tabatin un infeccion grave. Cada mey ora, un broeder tabata coy mi presion, y cada biaha e presion tabata mas abou. E broeder tabata un par di aña mas grandi cu mi y tabata mustra hopi preocupa. M’a puntr’e: “Bo no a yega di mira un hende muri nunca, no?” Su cara a bira bleek, y el a contesta mi: “No, nunca.”

E tempo ey cos no tabata pinta mucho bon pa mi. Pero con bin mi tabata den hospital, casi pa muri? Wel, laga mi conta bo.

M’a bira malo durante e guera na Vietnam, tempo cu mi tabata traha como assistent di sala di operacion. Mi tabata gusta yuda hende malo y herida, y mi kier a bira ciruhano. M’a yega Vietnam na juli 1969. Como cu m’a caba di yega, m’a haya un siman pa asina mi por a adapta mi mes na e diferencia di ora y na e calor sofocante.

Poco despues cu m’a presenta pa traha na e hospital di cirugia na e base militar Dong Tam, den e delta di Riu Mekong, helicopternan a cuminsa yega un tras di otro cu soldaatnan herida y morto. Mi tabata hopi patriotico y tabata gusta traha, pues m’a cuminsa yuda mesora. Nos tabata prepara esnan herida y despues hiba nan pura pura na un di e containernan cu airco cu tabata fungi como sala di operacion. Den e espacio chikito ey, un ciruhano, un anestesista y dos broeder mester a haci nan best pa salba bida di mas tanto soldaat posibel. M’a ripara algun saco preto grandi cu nan no tabata baha for di e helicopternan. Nan a bisa mi cu den e saconan ey tabatin e restonan di soldaatnan cu bala of bom a spart for di otro. Esey tabata mi prome contacto cu guera.

Un par di aña prome cu mi a bay guera, mi tabatin contacto breve cu testigonan di Jehova. Mi mama stima a studia Bijbel cu nan, pero e no a batisa. Mi tabata gusta sinta hunto cu mi mama ora e tabata studia. Pero un biaha, m’a pasa dilanti di  un Salon di Reino hunto cu mi tata di crianza. Ora m’a puntr’e ta cua luga esey ta, e di cu mi: “No pensa mes di bay cerca e hendenan ey.” Mi tabata stima mi tata di crianza y a confi’e, pues m’a sigui su conseho. Asina m’a perde contacto cu testigonan di Jehova.

Despues cu m’a bin bek for di Vietnam, m’a sinti e necesidad di busca Dios. E mal recuerdonan di e guera a traha masha hopi riba mi. Tabata parce cu niun hende no tabata compronde kico realmente tabata pasando na Vietnam. Tabatin rumor cu soldaatnan Mericano tabata mata muchanan inocente den e guera ey. Mi ta corda cu durante marchanan di protesta e hendenan tabata yama e soldaatnan asesino di baby.

Pa satisface mi hamber spiritual, m’a cuminsa bishita varios iglesia. Semper mi tabatin un amor pa Dios, pero mi no tabata gusta loke mi tabata mira den e iglesianan. Finalmente, m’a bishita un Salon di Reino di testigonan di Jehova na Delray Beach (Florida). Mi ta corda cu tabata un diadomingo na februari 1971.

Ora m’a drenta e Salon di Reino, e discurso publico tabata cabando, y m’a keda pa e estudio di E Toren di Vigilancia. Mi no ta corda mas di kico nan a papia, pero loke si mi ta corda ta cu e muchanan chikito mes tabata busca e textonan di Bijbel. M’a keda asombra! M’a sinta keto scucha y observa. Ora mi tabata saliendo for di e Salon di Reino, un ruman homber di mas o menos 80 aña a acerca mi. Su nomber tabata Jim Gardner. E ruman stima aki a mustra mi e buki E berdad cu ta hiba na bida eterna y a puntra mi: “Mi por duna bo e buki aki?” Mesora nos a traha un afspraak pa studia diahuebs mainta.

Mi tabata traha den e sala di emergencia di un hospital priva na Boca Raton (Florida), y e diadomingo anochi ey mi mester a traha 11 pa 7. Como cu tabata un anochi trankil, m’a haya un bon chens di lesa e buki Berdad. Un verpleegster a acerca mi, ranca e buki fo’i mi man, wak e kaft y grita: “Bo no ta bay bira un di nan, no?” M’a ranca mi buki Berdad bek fo’i dje y mi di cu ne: “M’a lesa apenas mitar di e buki, pero manera cos ta pinta, casi sigur cu si.” El a bira bay laga mi, y e anochi ey mes m’a caba di lesa e buki.

Prome cos cu m’a puntra Ruman Gardner ora el a bin studia cu mi tabata: “Kico nos ta bay studia?” El a contesta: “E buki cu m’a duna bo.” Mi di cu ne: “M’a les’e caba.” Ruman Gardner a contesta mi na un manera suave: “Wel, laga nos considera djis e prome capitulo.” M’a keda sorprendi ora m’a ripara cuanto cos mi no a capta ora mi so a les’e. El a laga mi busca masha hopi texto den mi Bijbel, cu tabata un King James Version. Porfin mi a cuminsa siña ken ta e Dios berdadero, Jehova. E mainta ey, m’a studia tres capitulo di e buki Berdad cu Ruman Gardner, kende cariñosamente mi tabata yama Jim. Despues di esey, nos a keda studia tres capitulo tur diahuebs mainta. Mi tabata gusta e estudio masha hopi. Esta un gran privilegio e tabata di por a haya les cerca un ruman  homber ungi cu a conoce Charles T. Russell personalmente!

Dentro di algun siman m’a bira un publicador di e bon noticia. Na principio, Jim tabata un gran yudansa pa mi, pasobra mi tabata bira hopi nervioso, specialmente ora nos tabata bay di cas pa cas. (Echo. 20:20) Pero m’a sigui traha den sirbishi cu Jim, y despues m’a cuminsa gusta e trabou di predica. Te awe mi ta considera sirbishi di veld e privilegio di mas grandi cu mi tin. No tin nada mas dushi cu ser un compañero di trabou di Dios.—1 Cor. 3:9.

Awor, laga mi conta bo tocante un asunto hopi personal: mi prome amor pa Jehova. (Rev. 2:4) E amor ey a yuda mi supera e recuerdonan doloroso di guera y hopi otro dificultad.—Isa. 65:17.

Tin un dia cu hamas mi por lubida. Tabata na aña 1971. Mi tabata pasando den un periodo dificil. Poco prome, mi tata di crianza a saca mi for di e edificio caminda el a permiti mi biba. E no tabata kier pa niun testigo di Jehova biba den su propiedad. Mi no tabatin mucho placa, ya cu e hospital tabata paga pa kinsena y m’a caba di gasta casi henter mi salario na paña pa sali den sirbishi pasobra mi kier a representa Jehova na un manera digno. Mi tabatin algun placa gespaar, pero esey tabata na un banco na Michigan, te ariba den noord di Merca, caminda mi a lanta. Pues, no a keda mi nada otro cu biba algun dia den mi auto. Mi tabata feita y limpia mi curpa den bañonan di gasolin stacion.

Un di e dianan ey, m’a yega Salon di Reino un par di ora prome cu e grupo a reuni pa sali den sirbishi di veld. M’a caba di baha warda. Mi a  parkeer patras di e Salon di Reino caminda niun hende no por a mira mi. Diripiente, e mal recuerdonan di Vietnam a podera di mi: e holo di carni di hende kima y e escenanan sangriento. Mi por a tende y mira cla cla con e soldaatnan jong tabata roga mi: “Mi ta scapa? Mi ta scapa?” Mi tabata sa cu nan ta bay muri, pero toch mi tabata purba di trankilisa nan lo mihor cu mi tabata por, mientras cu mi tabata bringa pa mi cara no reda mi. Sinta eynan, mi gemoed a yena.

M’a cuminsa haci oracion y awa tabata basha fo’i mi wowo. (Sal. 56:8) M’a cuminsa medita riba e speransa di resureccion. Diripiente m’a realisa un cos: Jehova Dios lo uza e resureccion pa elimina tur e atrocidadnan cu m’a mira y cura e dolor emocional cu asina tanto di nos a sufri. Dios lo lanta e hobennan ey for di morto y duna nan e oportunidad di siña conoc’e. (Echo. 24:15) E momento ey mi a haya un gran amor pa Jehova, un amor cu a yega te den fondo di mi alma. Te awe, e dia ey tin un luga hopi special den mi curason. Djey padilanti m’a haci mi best pa mi no perde mi prome amor pa Jehova, specialmente ora di prueba y dificultad.

Den tempo di guera, hende ta haci cosnan teribel, y ami no tabata un excepcion. Pero loke a yuda mi supera mi sintimentonan di culpa ta cu m’a medita riba dos di mi textonan faborito. E prome ta Revelacion 12:10 y 11, cu ta bisa cu Diabel a ser venci no solamente pa medio di e mensahe cu nos ta proclama sino tambe pa medio di e sanger di e Lamchi. E di dos texto ta Galationan 2:20. E versiculo ey a siña mi cu Cristo Hesus a muri “pa mi.” Jehova ta mira ami a traves di e sanger di Hesus y a pordona mi pa loke m’a haci. Unabes m’a compronde e punto ey, esaki a yuda mi cu mi por tabatin un consenshi limpi y a motiva mi pa haci tur loke ta posibel pa yuda otro hende siña conoce e berdad tocante nos Dios misericordioso, Jehova.—Heb. 9:14.

Ora mi wak bek riba mi bida, mi ta aprecia cu Jehova semper a cuida mi. Por ehempel, asina cu Jim a haya sa cu mi tabata biba den mi auto, mesora el a pone mi den contacto cu un ruman muher cu tabata huur camber. Mi ta kere sinceramente cu Jehova a uza Jim y e ruman muher stima ey pa duna mi un luga comodo caminda cu mi por a keda. Jehova ta hopi bondadoso. E ta cuida su fiel sirbidornan hopi bon.

Na mei 1971, mi mester a bay Michigan pa atende algun asunto. Pero prome cu m’a bay laga e congregacion di Delray Beach, m’a yena mi bahul cu literatura y bay rumbo pa noord riba e highway cu nan ta yama I-75. E bahul a bira bashi prome cu m’a yega na mitar di caminda. Tur caminda mi tabata para pa predica e bon noticia di Reino cu hopi entusiasmo. M’a predica na varios prizon, y hasta m’a laga tratado cu hombernan den baño na e paradanan di descanso. Tin biaha mi ta puntra mi mes si algun di e simianan cu m’a planta a duna fruta.—1 Cor. 3:6, 7.

Pero mi tin cu admiti cu na principio ora cu m’a haya e berdad mi no tabatin mucho tacto, specialmente ora mi tabata papia cu mi famia. Mi prome amor pa Jehova tabata asina ferviente cu mi tabata papia cu curashi, pero na mes momento mi tabata hopi bot cu nan. Mi ta stima mi dos rumannan, John y Ron, masha hopi, y esey a pone cu mi tabata purba di convence nan di e berdad cu palabranan fuerte. Claro cu despues mi mester a pidi nan despensa pa e manera sin tacto cu mi a papia. Pero asina mes, mi no ta stop di pidi den oracion pa un dia nan acepta e berdad. Entre tanto, Jehova a siña mi pa uza mas tacto ora mi ta predica y siña otro hende.—Col. 4:6.

Tur momento mi ta corda riba mi amor pa Jehova, pero mi no ta lubida e otro amornan den mi bida. Mi di dos amor ta mi kerido casa Susan. Semper mi tabata kier un compañera cu lo a yuda mi den e trabou di Reino. Susan ta un muher spiritualmente fuerte. Mi ta corda bon cla un dia cu m’a bay bishit’e, tempo nos tabata enamora. E tabata sinta den balcon na cas di su mayornan na Cranston (Rhode Island) ta lesa E Toren di Vigilancia hunto cu su Bijbel. Loke mas a impresiona mi ta cu e tabata lesando un articulo secundario y busca tur e textonan di Bijbel. M’a pensa den mi mes: Esta un mucha muher spiritual! Nos a casa na december 1971, y el a keda semper na mi lado y a apoya mi, algo cu mi ta hopi agradecido p’e. Loke mas mi ta gusta di dje ta cu e stima mi hopi, pero e stima Jehova mas.

Jehova a bendiciona ami cu Susan cu dos yiu homber, Jesse y Paul. Segun cu nan tabata crece, Jehova tabata cu nan. (1 Sam. 3:19) Y como cu nan a haci e berdad di nan mes, nan a trece honor pa ami cu Susan. Nan a sigui sirbi Jehova pasobra nan no a lubida e prome amor cu nan a sinti p’e. Tur dos tin mas cu 20 aña den sirbishi di tempo completo. Mi ta orguyoso tambe di mi dos bunita nueranan, Stephanie cu Racquel, cu ta manera mi yiu muhernan. Jesse y Paul a casa cu  mucha muhernan spiritual cu stima Jehova Dios cu henter nan alma y curason.—Efe. 6:6.

Despues cu m’a batisa, m’a sirbi pa 16 aña na Rhode Island, caminda m’a haya bon amigonan. Mi tin bunita recuerdo di e ancianonan excelente cu mi a traha cu ne. Tambe mi ta hopi agradecido pa e superintendentenan di circuito cu a bishita nos y cu tabatin un bon influencia riba mi. Esta un gran privilegio di por traha hunto cu hombernan cu a keda cu nan prome amor pa Jehova! Na 1987 nos a bay biba na Noord Carolina pa sirbi caminda tabatin mas necesidad den e trabou di predica, y eynan tambe nos a haya bon amigonan. *

Na augustus 2002, ami cu Susan a acepta e invitacion pa forma parti di e famia di Betel na Patterson (Merca). Mi tabata traha den e Departamento di Sirbishi, y Susan den laundry. E tabata stima su trabou. Despues, na augustus 2005, m’a ricibi e privilegio di sirbi como un miembro di Cuerpo Gobernante. Mi no a sinti mi digno di tal asignacion. Na prome instante, mi casa stima a sinti cu e responsabilidad, trabou y biahamento envolvi lo tabata mucho p’e. Ademas, Susan nunca tabata gusta bula den avion, y awor, na moda di papia, nos ta mas den laira cu riba tera. Susan ta bisa cu e animacion amoroso cu el a haya cerca e esposanan di otro miembronan di Cuerpo Gobernante a yud’e hopi. Ami por bisa cu el a apoya mi hopi bon mes, y esaki ta laga mi stim’e mas ainda.

Den mi oficina, mi ta rondona pa hopi potret cu ta nifica hopi pa mi. Nan ta corda mi cu mi tabatin un bida maraviyoso. Ya caba m’a haya recompensanan extraordinario pa e echo cu mi no a lubida mi prome amor pa Jehova.