Génesis 20:1-18
-
Sara ta ser librá di Abímelèk (1-18)
20 Anto Ábraham a muda su kampamentu for di kaminda e tabata,+ i el a bai biba na Néguèv.* El a bai biba entre Kádes+ i Shur.+ Miéntras e tabata biba* na Gérar,+
2 e tabata bisa tur hende ku Sara ta su ruman muhé.+ Anto Abímelèk, rei di Gérar, a manda su sirbidónan trese Sara serka dje.+
3 Un anochi, Dios a papia ku Abímelèk den un soño i bis’é: “Bo ta bai muri sigur pa motibu di e muhé ku bo a manda buska,+ pasobra e ta kasá, i e ta pertenesé na un otro hòmber.”+
4 Pero Abímelèk no a mishi kuné.* P’esei, el a kontestá: “Yehova, bo ta bai mata henter un pueblo maske nan ta inosente?*
5 No ta Ábraham mes a bisa mi ku Sara ta su ruman muhé? No ta Sara mes a bisa ku Ábraham ta su ruman hòmber? Mi a aktua di buena fe i sin mal intenshon.”*
6 Anto e Dios berdadero a bis’é den e soño: “Mi sa ku bo a aktua di buena fe. Ta p’esei mi no a laga bo mishi kuné, pasobra lo bo a peka kontra mi.
7 Awor, hib’é bèk serka su kasá, pasobra su kasá ta un profeta,+ i lo e hasi orashon pa bo+ i lo bo keda na bida. Pero si bo no hib’é bèk, lo bo muri sigur, sí, abo i tur bo hendenan.”
8 Abímelèk a lanta mainta trempan, yama tur su sirbidónan i konta nan su soño, i nan a haña masha miedu.
9 Despues, Abímelèk a manda yama Ábraham i bis’é: “Dikon bo a hasi asina ku nos? Pa bo motibu, ami ku mi reino a hera di kometé un piká serio. Dikon? Ki malu mi a hasi bo? Loke bo a hasi ku mi no ta bon.”
10 Abímelèk a sigui bisa Ábraham: “Dikon bo a hasi e kos ei?”+
11 Ábraham a kontest’é: “Ta pasobra mi a bisa den mi mes: ‘Kasi sigur e hendenan di e lugá akí no tin rèspèt pa Dios.* Nan lo mata mi pa keda ku mi kasá.’+
12 I fuera di esei, di bèrdat e ta mi ruman muhé. E ta yu di mi tata pero no di mi mama, i e ta mi kasá tambe.+
13 Pues, ora Dios a manda mi sali for di kas di mi tata pa mi biaha di un lugá pa otro,+ mi a bisa Sara: ‘Asin’akí lo bo demostrá ku bo ta fiel* na mi: Unda ku nos bai, bisa e hendenan ku mi ta bo ruman.’”+
14 Anto Abímelèk a regalá Ábraham karné, baka, sirbidó hòmber i sirbidó muhé. Anto el a entreg’é su kasá Sara bèk.
15 Ademas, Abímelèk a bisa Ábraham: “Mi pais ta na bo òrdu. Bai biba kaminda bo ke.”
16 El a bisa Sara: “Mi ta duna bo ruman hòmber 1.000 pida plata.+ Esei ta un prueba pa tur bo hendenan i pa tur otro hende ku bo no a hasi nada malu. Bo ta liber di akusashon.”
17 Anto Ábraham a hasi orashon na e Dios berdadero pa Abímelèk. I Dios a kura tantu Abímelèk komo su esposa i su esklabonan muhé, i nan a kuminsá haña yu atrobe,
18 pasobra pa motibu di Sara, kasá di Ábraham,+ Yehova a pone ku niun hende muhé di kas di Abímelèk no por a haña yu.*
