Efeso 5:1-33
5 Kanian, alig yo so Dios, bilang inad-aro ton ananak,
2 tan mantultuloy kayon mankurang ed aro, no panon a say Kristo et angaro met ed sikayo tan nisengeg ed sikayo et inter toy inkasikato bilang sakey ya apay tan sakey a bagat ya ambalbalingit ed Dios.
3 Say pilalawanan* tan amin a klase na karutakan odino inkaagum et agkomon anggan nabitla ed limog yo, ta ontan so matukoy ed masanton totoo;
4 anggan say makapabaing a kondukta odino makulangkulang a panagsalita odino mabanday a panaglurey, ta ag-iraya manepeg, noagta say nepeg ya ibalikas et pisasalamat ed Dios.
5 Ta amta yo, on, kabkabat yo, a say managlawan odino agmalinis a too odino maagum a too—a mankabaliksan a sakey a managdayew ed idolo—et agbalot makatawir ed panarian na Kristo tan say Dios.
6 Anggapo komon so mamalikdo ed sikayo ed panamegley na saray salitan andi-kakanaan, ta lapud saray asalambit la et onsabi so sanok na Dios ed saray agmatulok.
7 Kanian agkayo mibibiang ed sikara;
8 ta nensaman et kabilungetan kayo, balet natan et liwawa kayo la nipaakar ed Katawan. Mantultuloy kayon mankurang bilang ananak na liwawa,
9 ta say bunga na liwawa et napatnagan ed amin a klase na kamaongan tan inkatunong tan katuaan.
10 Seguroen yon naynay no antoy makapaliket ed Katawan;
11 tan agkayo la mibibiang ed sikara diad saray inatey a gawa na kabilungetan, noag ingen busol yo iratan,
12 ta saray gagawaen da ed maamot et makapabaing iratan a salitaen.
13 Natan, amin a bengatlan bubusolen et napapatnagan lapud liwawa, ta say amin a bengatlan nipapatnag et liwawa.
14 Kanian oniay nikuan: “Liing ka, O sikan nanaugip, tan bangon ka manlapud inaatey, tan onsinag ed sika so Kristo.”
15 Kanian manalwar kayon maong pian say panagkurang yo et aliwan bilang agmarunong a totoo noagta marunong a totoo,
16 ya anamot yo so kada pankanawnawa,* lapud mauges so panaon.
17 Nisengeg ed saya, agkayo la komon magmaliw ya agmakatunongan, noagta tebeken yo no anto so linawa nen Jehova.
18 Ontan met, agkayo manbuabuanges, ta mansumpal itan ed inkaalablabas, noagta napano kayo komon a naynay na masanton espiritu,
19 a mangansion kayo na saray salmo tan panangidayew ed Dios tan saray maespiritual a kanta, a mangansion kayon impapuso tan mantogtog kayo parad si Jehova,
20 diad ngaran na Katawan tayon Jesu-Kristo et naynay kayon misalamat ed Dios tan Ama tayo lapud amin a bengatla.
21 Manpasakop kayo ed sakey tan sakey lapud takot ed si Kristo.
22 Komon ta manpasakop iray asawan bibii ed kaasawaan da a singa pampapasakop da met ed Katawan,
23 lapud say asawan laki et ulo na asawa to a singa say Kristo et ulo na kongregasyon, ta sikato so manangilaban ed sayan laman.
24 Diad tua, no panon a say kongregasyon et manpapasakop ed Kristo, ontan met komon iray asawan bibii ed kaasawaan da diad amin a bengatla.
25 Asawan lalaki, itultuloy yon aroen so kaasawaan yo, no panon a say Kristo et inaro to met so kongregasyon tan inter toy inkasikato parad satan,
26 pian napasanto to itan, a lilinisan tan uurasan toy danum na salita na Dios,
27 pian nipresenta to ed inkasikato so karakpan na kongregasyon, ya andian itan na mantsa odino kumanet odino anggan dinan ed saratan a bengatla, noagta masanto tan andian na pakabalawan.
28 Ontan met, nepeg ya aroen na asawan lalaki so kaasawaan da a singa laman dan dili. Samay mangaaro ed asawa to et mangaaro ed laman ton dili,
29 ta anggapoy toon bubusolen toy laman ton dili; noag ingen papakanen tan papablien to itan, a singa met ed gagawaen na Kristo ed kongregasyon,
30 lapud kabiangan itayo na laman to.
31 “Nisengeg ed saya et taynan na laki so ama to tan ina to tan iyamong* toy asawa to, tan sikaran dua et magmaliw a sakey a laman.”
32 Importante iyan sagradon sekreto. Mansasalita ak natan nipaakar ed si Kristo tan say kongregasyon.
33 Anggaman ontan, komon ta aroen a maong na kada sakey ed sikayo so asawa to a singa ed pangaaro to ed laman ton dili; balet, say asawan bii et nepeg a walaan na aralem a respeto ed asawa to.
