Efeso 3:1-21
3 Kanian siak, si Pablo, so nipriso nisengeg ed si Kristo Jesus lapud sikayo, a totoo na saray nasyon.
2 Seguradon nadngel yo la a nimatalek ed siak so agnaparaan a kaabigan na Dios parad pakagunggonaan yo,
3 a niparungtal ed siak so sagradon sekreto, unong ya insulat ko la ed antikey.
4 Kanian, sano babasaen yo iya, naamtaan yo a natatalosan koy sagradon sekreto nipaakar ed Kristo.
5 Diad apalabas iran kailalakan et agnipaamta iyan sekreto ed saray totoo, aliwan singa natan a niparungtal la itan ed saray masanton apostol tan ed saray propeta na Dios diad panamegley na espiritu,
6 salanti, pian saray totoo na nasyon et magmaliw a kaiba tayon tomatawir tan kapara tayon kabiangan ed sakey a laman tan kaiba tayon mibiang ed sipan bilang nikasakey ed si Kristo Jesus diad panamegley na maong a balita.
7 Nagmaliw ak a ministro na saya lapud regalon agnaparaan a kaabigan na Dios ya inter to ed siak bilang panangipatnag na pakayari to.
8 Sayan agnaparaan a kaabigan et nipatnag ed siak, a toon sankaabebaan ed amin a masanto, pian iyabawag ko ed saray nasyon so maong a balita nipaakar ed agaylan karakel iran kayamanan na Kristo
9 tan ipanengneng ko ed saray totoo no panon ya imparungtal so sagradon sekreto ya abaybayag lan inyamot na Dios, ya amalsa ed amin a bengatla.
10 Agawa itan pian diad panamegley na kongregasyon et naamtaan na saray gobierno tan saray pakauley ed tawen so karunongan na Dios a napapatnagan ed dakel tan nanduruman paraan,
11 unong ed agmanganggan gagala ya inggapo to nipaakar ed Kristo, si Jesus a Katawan tayo,
12 a diad panamegley to et walay kawayangan tayon mansalita tan lapud pananisia tayo ed sikato et matalek itayon makaasingger ed sikato.
13 Kanian mikakasi ak ya agkayo komon onkakapuy lapud sarayan kairapan ko nisengeg ed sikayo, ta kigloriaan yo iraya.
14 Lapud saya et ontalimukor ak ed Ama,
15 a sikatoy angiter ed ngaran na balang pamilya ed tawen tan diad dalin,
16 ta pian diad panamegley na pakayari na espiritu to et napabiskeg so puso yo unong ed inkadaakan na gloria to,
17 pian diad panamegley na pananisia yo et manayam so Kristo ed kapusoan yo tekep na aro; pian nilamut tan niletneg kayo diad pundasyon,
18 ta pian sigpot yon natalosan so kaawang tan karukey tan kaatagey tan kaaralem, a singa say amin a masanto,
19 tan nakabatan yoy aro nen Kristo a napalumbasan toy pikakabat, ta pian nagamoran yo imay inkagnap ya iiter na Dios.
20 Natan, say Dios a nagawaan toy amin a bengatla a mas nagkalalo ni nen say nayarian tayon kerewen odino isipen, unong ed pakayari to a napapatnagan ed sikatayo,
21 sikato so nepeg a nigloria ed andi-anggaan diad panamegley na kongregasyon tan diad panamegley nen Kristo Jesus diad amin a kailalakan. Amen.
