Efeso 2:1-22
2 Niarum ni, sikayo so binilay na Dios anggano inatey kayo lapud saray impakalingo tan saray kasalanan yo,
2 a saratan a bengatla so gagawaen yo nensaman unong ed sistema na sayan mundo, unong ed say manuley na autoridad na dagem, say espiritu ya ipapatnag natan na saray agmatulok.
3 On, diad limog da et nambilay itayon amin nensaman unong ed saray pilalek na laman tayo, a gagawaen tayo iray bengatlan labalabay na laman tan saray kanonotan, tan sikatayoy sipor lan ananak na sanok a singa met ed arum.
4 Balet say Dios et daakan so panangasi to tan lapud baleg a panangaro to ed sikatayo,
5 binilay to itayo pian makapikasakey ed Kristo, anggano inatey itayo lapud saray impakalingo tayo (nilaban kayo diad agnaparaan a kaabigan)
6 tan binilay to itayon mankakaiba tan pinayurong to itayon mankakaiba ed tawen bilang nikasakey ed si Kristo Jesus,
7 ta pian diad arapen iran sistema na mundo et nipanengneng toy mayamyaman ya agnaparaan a kaabigan to lapud kaabigay-linawa to ed sikatayoran nikasakey ed si Kristo Jesus.
8 On, diad sayan agnaparaan a kaabigan et nilaban kayo ed panamegley na pananisia; tan aliwa iyan lapud sikayo, noagta saya so regalo na Dios.
9 Andi, aliwa itan a lapud saray gawa, ta pian anggapoy toon nawalaan na sengegan pian manpasirayew.
10 Ta ginawa itayo na Dios tan pinalsa to itayo a nikasakey ed si Kristo Jesus parad maabig iran gawa, ya asakbay lan imparaan to pian makapankurang itayo ed saratan.
11 Nodnonoten yo sirin a sikayo nensaman et totoo na saray nasyon nipaakar ed laman; “ag-asegat” so impanawag ed sikayo na saramay tatawagen ya “asegat” ed laman diad panamegley na saray lima—
12 ta diad saman a panaon et agyo kabat so Kristo, a nisian kayo ed nasyon na Israel tan agkayo kabiangan ed saray paknaan ya unong ed sipan na Dios, tan diad mundo et anggapo so ilalo yo tan agyo kabat so Dios.
13 Balet natan ta nikasakey kayo la ed si Kristo Jesus, akaasingger kayo la ed panamegley na dala na Kristo anggaman arawrawi kayo nensaman.
14 Ta sikato so amawala na deen ed sikatayo, ya impankasakey toy duaran grupo tan tinebag toy padir a walad baetan da.
15 Diad panamegley na laman to et pinaandi toy gulaan, say Ganggan a tibukelen na saray bilibilin tan totontonen, pian nagawa ton sakey a balon too so duaran grupo a nikasakey ed sikato tan napawala toy deen;
16 tan sigpot ton natulongan so duaran grupo bilang sakey a laman pian makapikareenan ira ed Dios diad panamegley na panamairapan a kiew,* lapud inekal to lay gulaan diad panamegley to.
17 Tan sikatoy sinmabi tan inyabawag toy maong a balita na kareenan ed sikayoran walad arawi, tan ed saramay walad asingger,
18 ta lapud sikato et makaasingger itayo ed Ama bilang duaran grupo diad panamegley na sakey ya espiritu.
19 Kanian sirin, aliwa kayo lan sangkaili tan dayo, noagta kabaleyan kayo na saray masanto tan kabiangan kayo na sankaabungan na Dios,
20 tan akaletneg kayo ed pundasyon na saray apostol tan saray propeta, tan si Kristo Jesus so pinagkapundasyon a bato ed suyok.
21 Bilang nikasakey ed sikato, say interon paalagey so niletneg pian magmaliw a masanton templo parad si Jehova lapud malmalet ya atuop so amin a kabiangan na satan.
22 Bilang nikasakey ed sikato, nipapaalagey kayo met a sankakaiba pian magmaliw a sakey a pasen a panayaman na Dios diad panamegley na espiritu.
