1 Timoteo 5:1-25
5 Agmo pansasalitaan na ansakit so sakey a masiken. Balet, mikasi ka ed sikato a singa amam, saray mas malangwer a lalaki a singa ra agagim,
2 saray akukulaw a singa ra inam, saray mas malangwer a bibii a singa ra agagim diad masimsimpit a paraan.
3 Igalang mo iray balo a bibii a peteg a mankaukolan.
4 Balet no say sakey a balo a bii et walaray anak odino apo to, nepeg ya aralen nin unona na saraya so pangipatnag na maridios a debosyon diad sankaabungan dan dili tan itultuloy dan iter no antoy manepeg parad saray ateng da tan saray laki tan bai ra, ta makapaliket iya ed imaton na Dios.
5 Natan, say balo a bii a peteg a mankaukolan tan anggapon balot so manlegpet ed sikato et samay maniilalo ed Dios tan masimoon ya onkekerew tan manpipikasi ed agew tan labi.
6 Balet samay mamepenek ed pilalek na laman to et inatey anggaman mabilay.
7 Kanian itultuloy mon iganggan iraya, pian andian iray pakabalawan.
8 Balet no walay siopaman ya agto tataryaan iramay walad pudir to, tan nagkalalo la iramay membro na pamilya to, impulisay to lay pananisia tan mauges ni nen say too ya andian na pananisia.
9 Iyan mo ed listaan so siopaman a balo a bii a mantaon lay ag-onkulang ed anemaplo, a saksakey so akiasawaan to,
10 a nanenengneng ed sikato iray maabig a gawa, no inasikaso to iray anak to, no pinarawes to iray sangkaili, no inurasan to iray sali na saray masanto, no tinulongan to iramay maniirap, no maseet ton sinumpal so amin a maong a gawa.
11 Balet, agnepeg ya ipila ed listaan iramay mas malangwer a balo a bibii, ta no saray pilalek da ed sekso et magmaliw lan babeng ed relasyon da ed Kristo, labay day miasawa lamet,
12 kanian naukom ira lapud agda tinoor so inmunan imbalikas dan pananisia.
13 Ontan met, apasalan da lan anggapoy gagawaen da, ya oonla ra ed kaabungan; on, aliwa labat ya anggapoy gagawaen da, noagta mantatalabutob ira tan mibabali ra ed gagawaen na arum a totoo, ya itotongtong da iray bengatlan agda nepeg ya itongtong.
14 Kanian labay ko komon a saray mas malangwer a balo a bibii et miasawa ra, mananak ira, asikasoen day sankaabungan da, tan ag-ira manggagawa na antokaman a sengegay pangayew na samay onsusumpa.
15 Diad tua et sinmian la so arum pian ontumbok ed si Satanas.
16 No say sakey a biin mananisia et walaray kanayon ton abalo, tulongan to ra tan agto ipapasakbat itan ed kongregasyon. Diad ontan et natulongan na kongregasyon iramay balo a bibii a peteg a mankaukolan.
17 Komon ta saray mamasiken a maabig so panangidaulo ra et ipasen a makanepegan na doblin galang, nagkalalo la iramay mansasagpot ed panagsalita tan panagbangat.
18 Ta inkuan na kasulatan: “Agmo nepeg a balungosan so baka sano maniilik itan”; ontan met: “Say mankikimey et makanepegan ed saray upa to.”
19 Agmo aawaten so sakey a dalem a sumpad sakey a masiken, nilikud labat no walay ebidensia na duara odino taloran tasi.
20 Baat mo ed arap na amin a makakanengneng iray totoon manggagawa na kasalanan, pian ontakot met iray arum.
21 Igaganggan ta ka diad arap na Dios tan si Kristo Jesus tan saray apilin anghel a sumpal mo irayan bengatla ya agka manguukom a tampol, tan agkan balot manggagawa na antokaman a walay panaglabi.
22 Agka bengatbengat a manuturo* na anggan siopa parad sakey a responsabilidad; agka met mibibiang ed saray kasalanan na arum; pansiansiam a malinis so inkasika.
23 Agka la oniinum na danum, balet inum kay daiset ya alak parad lusok mo tan parad mabetbet a pansasakit mo.
24 Saray kasalanan na pigaran totoo et amta na amin, a mansumpal a tampol ed kaukom, balet saray kasalanan met na arum a totoo et naamtaan ed saginonor.
25 Mipadpara, saray maabig a gawa et nanenengneng na amin tan saramay agnanengneng et agmansiansian akaamot.
