1 Timoteo 2:1-15
2 Kanian manuna ed amin, ibilin ko a nagawa komon iray nanduruman paraan na pikekerew, saray pikakasi, pisasalamat, parad amin a klase na totoo,
2 parad arari tan amin a walad atagey a posisyon; ta pian makapantultuloy itayon manbilay a maligen tan mareen tekep na sigpot a maridios a debosyon tan inkasimoon.
3 Saya so maabig tan makapaliket ed imaton na Manangilaban tayo, say Dios,
4 a say linawa to et nilaban so amin a klase na totoo tan nawalaan ira na suston pikakabat ed katuaan.
5 Ta wala so saksakey a Dios, tan saksakey a manamegley ed baetan na Dios tan totoo, sakey a too, si Kristo Jesus,
6 ya inter toy inkasikato bilang kasimbangan a dondon parad amin—saya so natasian diad mismon panaon na saya.
7 Nipaakar ed sayan pantasi et aturo ak bilang sakey a managpulong tan sakey ya apostol—ibabagak so tua, agak mantitila—sakey ak a managbangat ed saray nasyon nipaakar ed pananisia tan katuaan.
8 Kanian, labay ko komon a diad amin a pasen et mantultuloy ed panagpikasi iray lalaki, ya itagey da iray lima ra tekep na katooran ed Dios, aliwan diad sanok tan pansasangsangan.
9 Labay ko met komon a saray bibii et manpaganggana diad panamegley na matukoy a panangawes, diad kasimpitan tan limpion kanonotan, aliwan diad nanduruman estilo na panaglapir na buek tan diad balitok tan saray perlas odino mabmablin kawes,
10 noagta diad paraan a manepeg ed saray bibii a mangibabagan igagalang day Dios, salanti, diad panamegley na maong iran gawa.
11 Komon ta say bii et manaral a mareen tan sigpot a manpasakop.
12 Agko abuloyan a say bii et manbangat, odino nawalaan na autoridad ed laki, noagta mandeen.
13 Ta si Adan so pinalsan unona, insan si Eva.
14 Ontan met, aliwan si Adan so apalikdo, noagta say bii so apalikdon maong tan nagmaliw a mananumlang.
15 Balet, sikatoy nasalimbengan diad pagmaliw ton sakey ya ina, daput no mantultuloy ed pananisia tan panangaro tan inkasanto tekep na limpion kanonotan.
