1 Timoteo 3:1-16
3 Napanmatalkan iyan salita.
No dadampoten na siopaman so betang na manangasikaso, maabig a kimey so pipilaleken to.
2 Say manangasikaso et nepeg sirin ya andian na pakabalawan, saksakey so asawa to, maadia ed saray kagagawa to, maabig so panagnonot to, mauksoy, maparawes, kualipikadon manbangat,
3 aliwan buanges, aliwan managduksa, noagta makatunongan, aliwan makolkol, aliwan maaro ed kuarta,
4 sakey a lakin maabig so panangidaulo to ed dilin sankaabungan to, walaan na ananak a matulok tan makalakal;
5 (no say siopaman et agto amta ya idaulo so dilin sankaabungan to, panon ton naasikaso so kongregasyon na Dios?)
6 aliwan balobalo a mananisia, ta ompan magmaliw a mapaatagey tan awaten to met so panangukom ya inawat na Diablo.
7 Niarum ni, nepeg met a maabig so reputasyon to ed saray totoo ed paway,* ta pian sikatoy agnabalaw tan agnakalotan na Diablo.
8 Ontan met, saray katulongan a lingkor et nepeg a seryoso, napanmatalkan so salita ra, aliwa ran mainum na alak, ag-ira maagum a manaanap na pinabangan da,
9 matoor ira ed sagradon sekreto na pananisia tekep na malinis a konsiensia.
10 Nepeg met a sikaray nasali nin unona no kasin manepeg ira, insan naabuloyan iran magmaliw a lingkor, no anggapoy pakaakusaan da.
11 Saray bibii et nepeg met a seryoso, aliwan managpauges, maadia ed saray kagagawa ra, matoor ed amin a bengatla.
12 Saray katulongan a lingkor et nepeg a saksakey so asawa ra, maabig so panangidaulo ra ed ananak da tan ed dilin sankaabungan da.
13 Ta saray lalakin maabig so panaglingkor da et maabig so reputasyon da tan bulobulos iran makapansalita nipaakar ed pananisia ed si Kristo Jesus.
14 Insulat ko iraya ed sika, anggano iilaloan ko a magano ak lan onla ed sika,
15 ta pian no bilang nabayagan ak, amtam no panon so ikiwas mo ed sankaabungan na Dios, say kongregasyon na mabilay a Dios, a saya so lusek tan seklang na katuaan.
16 On, say sagradon sekreto na sayan maridios a debosyon et abalbaleg: ‘Sikatoy niparungtal ed laman, niyabawag a matunong diad espiritu, pinmatnag ed saray anghel, nipulong ed saray nasyon, anisiaan diad mundo, maglorian inawat ed tawen.’
