1 Timoteo 4:1-16
4 Anggaman ontan, ibabaga na impuyan a salita a seguradon diad kaunoran iran panaon et walaray onsian ed pananisia, ya iimanoen da so makapalikdo iran impuyan a salita tan bangabangat na saray demonyo,
2 lapud pansimpisimpitan na saray totoon mansasalita na katilaan, a say konsiensia ra et agmakalikna a singa baog ya apoolan na balatyang a panagtatak;
3 isesebel da so pangasawa, tan igaganggan da ya agnepeg a kanen iray naakan a pinalsa na Dios, a saraya et nepeg a kanen tan pisalamatan na saramay walaan na pananisia tan suston akapikabat ed katuaan.
4 Say makasengeg ed saya et maabig ya amin so pinalsa na Dios, tan anggapoy nepeg ya ipulisay no inawat itan tekep na pisasalamat,
5 ta apasanto itan ed panamegley na salitay Dios tan diad impangipikasi ed satan.
6 Diad pangiter mo ed sarayan bilin ed saray agagi, magmaliw kan maong a ministro nen Kristo Jesus, a napapabiskeg ed saray salita na pananisia tan maabig a bangat a tutumboken mon maong.
7 Balet agmo papanisiaan iray palson istorya a mamapabanday ed bengatlan masanto tan saraya so ibabaga na akukulaw. Ingen, ipasal moy inkasika, a say gagalam et pian nipatnag moy maridios a debosyon.
8 Ta say panangipasal ed laman et makagunggona na daiset; balet say maridios a debosyon et makagunggona ed amin a bengatla, lapud isisipan na satan so bilay natan tan diad arapen.
9 Sayan salita et napanmatalkan tan manepeg a panisiaan.
10 Kanian, mansasagpot tan manseseet itayo lapud inteen tayo lay ilalo tayo ed mabilay a Dios, a Manangilaban ed amin a klase na totoo, nagkalalo la ed saray matoor.
11 Itultuloy mo irayan iganggan tan ibangat.
12 Anggapo komon so manleglemew ed inkaugaw mo. Balet, magmaliw kan ehemplo ed saray matoor diad panagsalita, diad ugali, diad panangaro, diad pananisia, diad kasimpitan.
13 Itultuloy moy manseet ed panagbasa diad publiko, panamilin, tan panagbangat, anggad isabik ditan.
14 Agmo papaulyanan so langkap a niiter ed sika diad panamegley na sakey a propesiya tan sanen intapew na ulop na mamasiken iray lima ra ed sika.
15 Morekdek mo irayan bengatla; saraya so iyulom, pian nanengneng na amin a totoo so iyaaligwas mo.
16 Imanom a naynay so inkasika tan say ibabangat mo. Mansiansia ka ed sarayan bengatla, ta diad panggawam ed saya et nilaban mo so inkasika tan saramay ondengel ed sika.
