1 Timoteo 1:1-20
1 Siak, si Pablo, ya apostol nen Kristo Jesus diad ganggan na Dios a Manangilaban tayo tan si Kristo Jesus, ya ilalo tayo,
2 so nansulat ed sika, Timoteo, a peteg ya anak ed pananisia:
Nawalaan ka komon na agnaparaan a kaabigan, panangasi, deen a manlalapu ed Dios ya Ama tan ed si Kristo Jesus a Katawan tayo.
3 No panon a pinaseseg ta kan mansiansia ed Efeso sanen onla ak la ed Macedonia, papasesegen ta ka natan, ya iganggan mo so arum ya agda ibabangat so duman doktrina,
4 tan agda iimanoen iray palson istorya tan saray kapolian, a saraya et anggapon balot so pansumpalan, ta mamapawala iya na tepetepet a sukimaten imbes a mangitarya na antokaman a manlapud Dios nipaakar ed pananisia.
5 On, say gagala na sayan panamilin et pian nawalaan itayoy aro a manlalapud malinis a puso tan maabig a konsiensia tan pananisia ya anggapoy pansimpisimpitan.
6 Impulisay na arum irayan bengatla tan akibiang ira ed andi-kabaliksan a pantotongtong,
7 a labay day magmaliw a managbangat na ganggan, balet agda natatalosan iray bengatlan ibabaga ra odino saray bengatlan ipapasoot da.
8 Natan amta tayo a say Ganggan et maabig daput no ikana itan na sakey diad manepeg a paraan
9 unong a kabat tayo la a say ganggan et inter, aliwan parad matunong a too, noagta parad totoon mauges tan agnapatulok, agmaridios tan managkasalanan, andian na maaron-kaabigan, tan agmanrerespeto ed bengatlan masanto, managpatey na kaamaan tan kainaan, tan saramay mamapatey na arum a totoo,
10 managlawan, lalakin miaakdol ed lalaki, manag-ala na too, matitila, agmatoor ed sinambaan, tan antokaman niran bengatla a sumlang ed suston bangat
11 unong ed maglorian maong a balita na maliket a Dios, a saya so nimatalek ed siak.
12 Misalsalamat ak ed si Kristo Jesus a Katawan tayo, ya amabiskeg ed siak, lapud impasen to ak a matoor diad impanuro to ed siak diad sakey a ministeryo,
13 anggano sakey ak nensaman a manag-ayew tan managpasegsegang tan agmangikabkabilangan a too. Balet, kinasian to ak lapud anggapoy pikakabat ko tan kinmiwas ak ya andian na pananisia.
14 Balet lalon dinmaak so agnaparaan a kaabigan na Katawan tayo pati say pananisia tan panangaro nipaakar ed si Kristo Jesus.
15 Matua tan manepeg a panisiaan so salita a si Kristo Jesus et linma ed mundo pian ilaban to iray managkasalanan. Diad saraya et siak so sankamanunaan.
16 Anggaman ontan, say rason no akin a kinasian to ak et pian diad panamegley ko a sankamanunaan a managkasalanan et sigpot a nipanengneng nen Kristo Jesus so andukey a panag-anos to bilang alimbawa ed saramay manisia ed sikato parad bilay ya andi-anggaan.
17 Natan say Ari ed andi-anggaan, ya agbalot ompatey, agnanengneng, say alenleneg a Dios, so nigalang tan nigloria komon lawas ed andi-anggaan. Amen.
18 Ana’kon Timoteo, imatalek ko ed sika iyan ganggan unong ed saray nipasakbay a manutukoy ed sika, pian diad panamegley na saraya et makapantultuloy ka ed maabig a pilalaban;
19 a pansiansiam so pananisiam tan maabig a konsiensia, ya impulisay na arum kanian aderal so pananisia ra a singa sakey a barkon nakneb.
20 Kabiangan ed saraya si Himeneo tan Alejandro, tan inyawat ko ra ed si Satanas ta pian diad panamegley na disiplina et nabangatan ira ya agmangayew.
