1 Pedro 2:1-25
2 Kanian, ekal yo so amin a kaugsan tan amin a panagpalikdo tan pansimpisimpitan tan ib-ibeg tan amin a klase na panagpauges,
2 tan singa saray kapangiyanak ya ugugaw, nawalaan kayo komon na pampilalek ed ag-alaokan a gatas a manlalapud salita na Dios, pian ombaleg kayo parad kilalaban,
3 daput no asali yo la a mapangasi so Katawan.
4 Diad iyaasingger yo ed sikato bilang sakey a mabilay a bato, a peteg ya impulisay na totoo, balet pinili tan mabmabli ed Dios,
5 sikayo met a mismo ya ipapasen a mabilay iran bato et nipapaalagey bilang espiritual ya abung pian magmaliw a masanto iran saserdote, a mangiyapay na makapaliket iran espiritual a bagat ed Dios diad panamegley nen Jesu-Kristo.
6 Ta walad Kasulatan: “Nia! Iletneg ko ed Sion so sakey a bato a pinili, say pinagkapundasyon a bato ed suyok tan mabmabli; tan agbalot nadismaya so amin a mangipapatnag na pananisia ed satan.”
7 Kanian, sikatoy mabmabli ed sikayo lapud mananisia kayo; balet diad saramay agmanisia, “sayan mismon bato ya impulisay na saray managpaalagey et nagmaliw a manunan bato ed suyok,”*
8 tan “sakey a baton pakatiroran tan sakey a baton-dampay a pakatumbaan.” Natitiror iraya lapud ag-ira ontutulok ed salita. Saya so panganggaan a manaalagar met ed sikara.
9 Balet sikayo so “pinilin kapolian, saray saserdote a manari, say masanton nasyon, totoo a magmaliw a kayarian na Dios, pian iyabawag yo ed amin a pasen iray alay abig a kualidad” na samay anawag ed sikayo manlapud kabilungetan tan angawat ed sikayo ed makapakelaw a liwawa to.
10 Ta aliwa kayon totoo na Dios nensaman, balet natan et totoo to kayo la; sikayo iramay agkinasian na Dios nensaman, balet natan et kinasian to kayo la.
11 Inad-arok iran agagi, a sangkaili tan miaayam ed sayan mundo, bilinen ta kayo a paliisan yo iray pilalek na laman, a sarayan mismo et milalaban ed kamarerwa.
12 Pansiansia yon maabig so ugali yo ed limog na saray totoo ed mundo, ta anggano ibabaga ran manggagawa kayoy mauges, igloria ran mismo so Dios diad agew na panusisa to lapud nanenengneng da iray maabig a gawa yo.
13 Nisengeg ed Katawan, manpasakop kayo ed amin a totoon walad pakauley: balanglan diad sakey ya ari bilang atagtagey
14 odino ed saray gobernador ya imbaki ton manusa ed saray manggagaway mauges ingen ta mangirarayew ed saray manggagaway maong.
15 Ta linawa na Dios itan, pian diad panggawa yoy kamaongan et napatunda yoy makulangkulang a pansasalita na saray totoon agmakatunongan.
16 Manbilay kayo bilang bulos a totoo, ingen ta pansiansia yo so kawayangan yo, aliwan bilang bulag ed kaugsan, noagta bilang ariripen na Dios.
17 Igalang yo so amin a klase na totoo, aro yo so amin ya agagi yo, ontakot kayo ed Dios, igalang yo so ari.
18 Manpasakop komon iray lingkor diad saray amo ra tan ipatnag day manepeg a takot ed sikara, aliwa labat a diad saramay maong tan makatunongan, noag pati diad saramay mairap a paliketen.
19 Ta no say sakey et mantetepel ed makapaermen iran bengatla tan agmakatunongan a maniirap lapud konsiensia to ed arap na Dios, saya so makapaliket.
20 Ta antoy kakanaan na pantetepel yo no natatampal kayo lapud pankakasalanan yo? Balet no itetepel yoy irap lapud panggagawa yoy maong, makapaliket iya ed Dios.
21 Diad tua et atawag kayo ed saya, ta anggan si Kristo et nanirap parad sikayo, tan angitilak na ehemplo ed sikayo pian tumboken yon maapit iray bakat to.
22 Anggapoy ginawa ton kasalanan, tan anggapon balot so imbaga ton panamalikdo.
23 Sanen sikatoy mumudmoraen da, agto ra minudmora. Sanen papairapen da, agto pinagyaw iramay amairap ed sikato, balet inmatalek toy inkasikato ed samay matunong ya ukom.
24 Inako to iray kasalanan tayo diad panamegley na laman ton dili ya impasak ed kiew, ta pian naliktar itayo ed saray kasalanan tan manbilay itayon matunong. Tan “apaabig kayo diad panamegley na saray sugat to.”
25 Ta sikayo nensaman et singa karneron nababalang; balet natan et akapawil kayo la ed managpastol tan manangasikaso na saray kamarerwa yo.

