1 Pedro 3:1-22
3 Ontan met, sikayoran asawan bibii, manpasakop kayo ed kaasawaan yon dili, ta no bilang walaray ag-ontutulok ed salita, magmaliw iran matulok lapud ugali yo anggano agkayo mansalita,
2 ta nanenengneng da so masimpit ya ugali yo ya atekepan na aralem a panagrespeto.
3 Tan napatnagan komon so ganggana yo, aliwan diad panaglapir na buek tan panagsulong na saray alahas a balitok odino ilalatop iran kawes,
4 noagta diad inkatoo a walad dalem na puso ya asulongan na agnaderal a kawes, salanti, say mareen tan maulimek ya espiritu, a mabmabli ed imaton na Dios.
5 Ta ontan met so pampapaganggana nensaman na saray masanton bibii a maniilalo ed Dios, a nampasakop ira ed kaasawaan dan dili,
6 a singa si Sara a tinmulok ed si Abraham, a tinawag ton “katawan.” Tan ananak to kayo, daput no naynay kayon manggagawa na maong tan agyo aabuloyan so antokaman a manaktakot ed sikayo.
7 Ontan met, sikayoran asawan lalaki, mantultuloy kayon miamong ed kaasawaan yo unong ed pikakabat, tan pagalangan yo ra a singa panaalwar yo ed mipipisit a pananginan, lapud kaiba yo met iran manawir na agnaparaan a regalon bilay, ta pian agnaamper iray pikakasi yo.
8 Diad kaunoran, mankakasakey komon so nonot yon amin, ipatnag yoy pililikna, panangaro ed agagi, panangabagey, mapaabeban kanonotan,
9 agkayo ombabales no walay nanggawa ed sikayo na mauges odino no walay nanmudmora ed sikayo, noag ingen, mansalita kayo na maabig ed sikato, lapud atawag kayo ed sayan dalan ta pian makaawat kayo na panamendisyon.
10 Ta “samay mangaaro ed bilay tan manbibilay a maliket, et pokpokan to komon so dila to a mangibalikas na mauges tan saray bibil to a mansalitay panamalikdo,
11 tan arawian toy mauges tan gawaen toy maong; anapen to komon so kareenan tan pansiansiaen to itan.
12 Ta saray mata nen Jehova et onnenengneng ed saray matunong, tan saray layag to et onderengel ed masimoon a pikakasi ra; balet sumpa si Jehova* ed saramay manggagawa na mauges.”
13 On, wala ta’y toon mamasakit ed sikayo no maseseg kayon manggaway maong?
14 Balet anggano manirap kayo nisengeg ed inkatunong, manliket kayo. Anggaman ontan, agyo tatakotan imay tatakotan da, tan agkayo nagogonigon.
15 Ingen ta awat yo ed puso yo a say Kristo a Katawan et masanto, a naynay kayon akaparaan ya onebat ed amin a mantetepet ed sikayo nipaakar ed ilalo yo, balet gawa yo itan tekep na inkaulimek tan aralem a respeto.
16 Pansiansia yon malinis so konsiensia yo ta pian nabaingan iramay manleleglemew ed maong ya ugali yo nipaakar ed Kristo, antokaman so ibaga ra sumpad sikayo.
17 Ta no linawa na Dios a manirap kayo lapud manggagawa kayoy maong, magmaong ni itan nen say manirap kayo lapud manggagawa kayoy mauges.
18 On, anggan si Kristo et aminpinsan ya inatey parad saray kasalanan, sakey a matunong parad saray agmatunong, pian nitonton to kayo ed Dios; sikatoy pinatey ed laman, balet binilay ed espiritu.
19 Diad saya met a kipapasen, sikatoy linman nampulong* ed saramay niprison espiritu
20 ya agtinmulok sanen impatnag na Dios so panag-anos to diad panaon nen Noe, legan ya ipapaalagey so biong, ya akasalbaan ed delap na pigaran totoo, salanti, waloran kamarerwa.
21 Say ililitrato na satan ya agawa et mangisasalba met natan ed sikayo, salanti, say bautismo, (aliwan say pangekal ed dutak na laman, noagta say ikerew ed Dios na malinis a konsiensia,) diad panamegley na inkioli nen Jesu-Kristo.
22 Sikatoy linma ed tawen tan wala la natan ed nikawanan na Dios; tan saray anghel tan saray pakauley tan saray pakayari et impasakop ed sikato.
