1 Pedro 5:1-14

5  Kanian, onia so ibilin ko ed saray mamasiken* ed limog yo, ta siak met et kapara ran masiken tan atasian ko iray impanirap nen Kristo, tan minabang ak met ed gloria a niparungtal:  Pastolan yo so pulok na Dios a walad panangasikaso yo, ya agkayo napapasootan, noagta mabulbulos kayo; tan agkayo manaanap na napinabangan yo, noagta akaparaan kayon naynay;  tan agkayo pakakatawan ed saramay kayarian na Dios, noagta magmaliw kayon ehemplo ed pulok.  Tan sano nipatnag lay manunan managpastol, awaten yoy maglorian korona ya ag-onkupas.  Ontan met, sikayoran malangwer a lalaki, manpasakop kayo ed saray mamasiken. Balet mapaabeba kayo komon ya amin diad pidedeneng yo ed sakey tan sakey, lapud kabusol na Dios iray mapaatagey, balet iiter toy agnaparaan a kaabigan ed saray mapaabeba.  Manpaabeba kayo sirin ed silong na mabiskeg a lima na Dios, ta pian iyatagey to kayo ed manepeg a panaon;  tan ipaawit yo met ed sikato so amin a kapagaan yo, lapud iyaansakit to kayo.  Mantultuloy kayon manlikas tan manbantay. Ta say Diablo a kabusol yo et siber-siber a singa managlem a leon, a manaanap na buagen to.  Balet ontalindeg kayo sumpad sikato, a pabiskeg yoy pananisia yo, lapud amta yo a nagagawa met iray onian ir-irap ed amin ya agagi yo diad interon mundo. 10  Balet kayari na panirap yon magano, say Dios na amin ya agnaparaan a kaabigan, ya anawag ed sikayo diad andi-anggaan a gloria to diad panamegley nen Kristo, et sumpalen toy pangipapasal to ed sikayo, a gawaen to kayon mapekder tan pabiskegen to kayo. 11  Say pakapanyari et walad sikato diad andi-anggaan. Amen. 12  Diad panamegley nen Silvano,* ya ipapasen kon matoor ya agi, sinulatan ta kayo na antikey pian pasesegen ta kayo tan masimoon kon tasian a saya so tuan agnaparaan a kaabigan na Dios; diad saya et makatalindeg kayo. 13  Manpapakomusta ed sikayo imay bii* a walad Babilonia, a pinili a singa sikayo, ontan met nen Marcos ya ana’ko. 14  Ibano yo so sakey tan sakey diad panamegley na angob na aro. Niwala komon so deen ed sikayon amin ya akikasakey ed si Kristo.

Paimanod leksab

1Pe 5:1 * Odino, “mamatatken ed kongregasyon.”
1Pe 5:12 * Odino, “Silas.”
1Pe 5:13 * Nayarin sakey a kongregasyon so tutukoyen to.