Mapinda 30:1-33
30 Mazwi aacindame yano Aguli mwana Yake wanenyile Itiyeli na Uka.
2 Pa yantu yonsi nene ntamanya cimwi,+Nupya nsiiluka wakwe vino umuntu alinzile ukwiluka.
3 Ntasambilila ivya kuya na mano,Nupya ntamanya vino uwa muzilo sana wamanya.
4 Uzye a weni uwakwela ukwi yulu nu kwika?+
A weni uwalema umuza umu minwe yakwe?
A weni uwapomba manzi umu cakuzwala cakwe?+
A weni uwika impela zyonsi izya nsi?+
Uzye izina lyakwe a weni ni zina lya mwanakwe a weni? Neene ndi cakuti wamanya.
5 Vyonsi vino Leza akalanda i visanguluke.+
I cishangu kuli yayo aakafisama muli aliwe.+
6 Utalinzile ukulundako uku mazwi yakwe,+Pano alakusunda,Nupya ulazanwa ukuti wewe wa ufi.
7 Nkulenga ivintu viili kuli wewe.
Nupya utangima ivintu vivyo lino ntatala nafwa.
8 Fumya ufi nu kubepa muli nene.+
Utaleka inje umupiina nanti umukankala.
Leka indye sile ivyakulya vino nkulondekwa,+
9 Pakuti ntikuta nu kukukaana alino nu kuzya ukuti, “Uzye Yeova a weni?”+
Nupya utaleka inje umupiina nu kwiya nu kuzewanya izina lyakwe Leza wane.
10 Utaalanda iviipe pa muomvi ku musambazi wakwe,Pano angakutiipa nupya ungazanwa nu mulandu.+
11 Kwaya inkulo iikatiipwila isiNupya isipaala nyina.+
12 Kwaya inkulo iikailola ukuti iisanguluke+Lelo itasangululwa uku vikwi.
13 Kwaya inkulo iya cilumbaNupya iyakwata mataki!+
14 Kwaya inkulo iyakwata mino kwati ulupangaNupya iyakwata inzekete kwati imipeeni ya kufyulilako;Ikalya aasuulwe ya mu nsiNa apiina.+
15 Iminsundu yakwata ana akazyana yaili aakapunda yakuti, “Tupeelini! Tupeelini!”
Kwaya ivintu vitatu ivisiikuta,Ni vintu 4 ivisiti, “Casila!”
16 Ilindi*+ nu mwanaci ing’umba,Impanga iitaakwata manzi,Nu moto usilanda ukuti, “Casila!”
17 Ilinso ilikatumfya isi nu kukana ukuvwila nyina,+Ya mwankole ya mu mukonko yalalikompa,Na ya lyang’anda yalalilya.+
18 Kwaya ivintu vitatu ivikampezya sana mano,Nupya kwaya ivintu 4 vino nsiuvwikisha:
19 Vino lyang’anda akapapuka umwi yulu,Vino inzoka ikapita api we,Vino iciwato cikapita pali yemba,Ni mipitile ya monsi uku mukazyana.
20 Vikwene avino nu mwanaci umucende waya:
Akalya aipukuta na pa kanwa;Alino alanda ati: “Pasi ciipe icili consi cino incita.”+
21 Kwaya ivintu vitatu ivikalenga insi ukuteenkanaNi vintu 4 vino itanga izizimizye:
22 Lino umuzya waya umwene,+Lino umuwelewele wikutisha,
23 Lino umwanaci uwapatwa watwalwa,Na lino umuomvi umukazyana wapoka icifulo ca mwanaci wino akaombela.+
24 Kwaya ivintu 4 umu nsi ivyaya pa vintu ivicepeshe,Lelo vyakwata mano yacivyalilwa:+
25 Utunyelele tutakoma,Lelo tukapekanya ivyakulya umu nsita ya cisanya.+
26 Tupiimbi+ u tunyama ututakwata amaka,Nomba tukapanga umwa kwikala umu vimawe.+
27 Ya makanta+ yatakwata umwene,Lelo yonsi kwene yakapita yakuya uku nkoleelo umu maumba.+
28 Kamususwe+ kakwata makuulu aakalematila,Nupya kakaingila umwi sano lya mwene.
29 Kwaya ivintu vitatu ivikatampula ningo,Ni vintu 4 ivikauvwisha ningo lino vikupita:
30 Cisama uwakwatisha amaka pa vilyanyi,Asitiina ali wensi;+
31 Simbwa wa kulungilako; sawe;Nu mwene aali pamwi ni umba lya yasilika.
32 Ndi cakuti ukaitumika pa mulandu nu uwelewele+Nanti ukwelenganya ukucita vivyo,Waika ikasa lyako pa kanwa.+
33 Wakwe vino ukukumba umu mukaka kukalenga utimbeNu kutina impuno kukafumya uwazi,Avino nu kukatusha icipyu kukaleta ukulemanila.+
Mafutunoti
^ Nanti “Sheo.” Lolini Ulondolozi wa Mazwi.
