Sama jo njore omonjo kamoro, inyalo penjori penjo kaka, ‘Be Nyasaye dewo dhano kuom adier? Ang’o momiyo gik ma kamago timorega? Be timbe mag njore a chieng’ norum? Ere kaka anyalo nyagora maber gi luoro ma an-go?’ Muma chiwo dwoko mowinjore mag penjogo.

 Nyasaye osin gi timbe njore kod gero. (Zaburi 11:5; Ngeche 6:16, 17) Kinde moro ka ne jopuonjre Yesu otiyo gi gige lweny e kedo gi jowasikgi, Yesu nosiemogi matek. Nowuoyo e lo Nyasaye. (Mathayo 26:50-52) Kata obedo ni nitie joma monjoga jowetegi ka giwacho ni gitimo kamano ne Nyasaye, adiera en ni Nyasaye ok oyie gi joma kamago. Ok owinjga kata lamogi.​—Isaya 1:15.

 Nyasaye dewo dhano duto ma sandore, moriwo nyaka joma timbe mag njore osekelonegi chandruoge e yo moro. (Zaburi 31:7; 1 Petro 5:7) Muma nyisowa ni Nyasaye biro tieko timbe duto mag njore.​—Isaya 60:18.

 Muma miyowa dwoko mar penjono. Owacho niya: “Loch dhano . . . en loch ma kelo mana hinyruok.” (Eklesiastes 8:9) Kuom higni mang’eny, joma nie loch osetiyo gi timbe njore e sando ji. Moko kuom joma isandogo bende osedonjo e timbe mag njore mondo gichulgo kuor.​—Eklesiastes 7:7.

 Nyasaye singo ni obiro golo timbe gero kod gik ma miyo dhano luoro, kendo ni obiro kelo kuwe madier e piny. (Isaya 32:18; Mika 4:3, 4) Obiro:

•   Golo joma miyo ji timoga timbe mag njore. Nyasaye biro golo sirkende duto mag dhano kendo sirkande kende e ma biro locho e wi piny ngima. Yesu Kristo ma en Ruodh Pinyruodh Nyasaye biro ng’ado ne ji bura makare, obiro golo ne dhano gik ma diyogi, kendo tieko timbe duto mag mahundu. (Zaburi 72:2, 14) E kindego, onge ng’ato ang’ata ma biro paro timo timbe njore. Dhano duto biro bedo “mamor ahinya nikech ginidag gi kuwe.”​—Zaburi 37:10, 11.

•   Golo chandruoge duto ma timbe njore osekelo. Nyasaye biro chango hinyruok duto ma timbe njore osekelo, bed ni gin hinyruok mag del kata mag paro. (Isaya 65:17; Fweny 21:3, 4) Bende, osingo ni obiro chiero jomotho mondo gibi gidag e piny mopong’ gi kuwe.​—Johana 5:28, 29.

 Muma nyisowa gik momiyo onego wabed gadier ni Nyasaye biro chopo singogo mapiyo. Kata kamano, samoro inyalo penjori ni, ‘Ang’o momiyo Nyasaye pok otieko timbe mag njore?’ Mondo iyud dwoko mar penjono, ne vidio ma wacho ni Ang’o Momiyo Nyasaye Oweyo Chandruok Mondo Obedie?