Silimo ni silimo, batu babañata-ñata bakolobezwanga, ili kutahisa kuli kopano yaluna itokwe miyaho yemiñata ya kuitusisa kulapela Jehova. Kabakaleo, ba Liluko Lelitalima Musebezi wa Kuyaha babafumaneha mwa lifasi kaufela nebalukisize kuyaha kamba kulukisa sinca miyaho ya kulapelela yefitelela 2,700 mwa silimo sa sebelezo sa 2020. a

 Ka bumai, butuku bobuyambukela bwa COVID-19 nebupalelisizwe kuli taba yeo ikonahale. Ba Katengo ka Bahatisi ka Sitopa Sesietelela nebalilimalisize buñata bwa misebezi ya kuyaha yeneezwa mwa lifasi kaufela ilikuli basileleze mizwale ni likaizeli baluna bane baeza misebezi yeo ni kuli bamamele milao yenetomilwe ki muuso. Nihakulicwalo, mwa silimo sa sebelezo sa 2020, miyaho ya kulapelela yefitelela 1,700 neiyahilwe kamba kulukiswa sinca pili butuku bwa COVID-19 busika kalisa kale. Kutuha fo, miyaho yeitusiswa ki liofisi za mutai yefitelela 100 neifelizwe kuyahiwa. Halunyakisiseñi mo mizwale baluna batuselizwe ki miyaho yemibeli yenefelizwe kuyahiwa.

 Mutai wa Cameroon. Mutai wakale ofumaneha mwa muleneñi wa Douala neli omunyinyani hahulu, mi libaka zeñata nelitokwa kulukiswa sinca. Ba Katengo ka Bahatisi nebanahanile za kulukisa sinca mutai wo, kono balemuha kuli kueza cwalo nekuka tula hahulu mane kufita ni teko yaona hane ukalekiswa. Hape nebanyakisisize za kuleka mubu ni kuyaha fateñi kamba kuleka muyaho ni kuulukisa feela, kono milelo yeo neipalile.

 Ka nako yeswana yeo, mizwale bautwa kuli kwa mutulo wa muleneñi wa Douala, muuso neubata kupanga mukwakwa, mi mukwakwa wo neukayo fita bukaufi ni yeñwi ya libaka zaluna za mikopano. Mukwakwa wo neuka tusa kuli kube bunolo kufita kwa Sibaka sa Mukopano seo ni kutusa kuli lika zecwale ka mezi, malaiti ni zeñwi lifumanehe fateñi. Lika zeo ki zona zeneka tokwahala fa ofisi ya mutai. Kacwalo, ba Sitopa Sesietelela balumeleza kuli kuyahiwe ofisi ya mutai yenca fa mubu oswana fone kuyahilwe Sibaka sa Mukopano.

 Musebezi wo neuezizwe ki Lipaki za Jehova ni bayahi babañwi bane balifilwe masheleñi, mi muezezo wo neutusize kuli musebezi ufele ka nako ni kuli kopano ibukeleze masheleñi. Mane masheleñi anaaitusisizwe kwa kuyaha ofisi ya mutai nesi amañata hahulu sina mone kulibelelelwa. Kopano neibukelelize masheleñi afitelela K41,000,000! Lubasi lwa Betele nelukonile kututela kwa mutai omunca nakonyana pili butuku bwa COVID-19 busika kalisa kale.

 Mizwale ni likaizeli ba fa Betele yenca yeo ya mwa Cameroon cwale sebapila ni kusebeleza mwa sibaka sesituna. Baanga mutai omunca wo sina mpo yezwa ku Jehova. Bo mutu ni musalaa hae babañwi nebabulezi kuli: “Lubata kusebeza ka taata ni kubonisa luli kuli lwaitebuha mpo ye.”

 Ofisi ya Toloko ya Sitojolabal (RTO) Kwa Mexico. Batoloki ba puo ya Sitojolabal sebabile fa mutai wa Central America ka lilimo zeñata, mi mutai wo ufumaneha bukaufi ni Muleneñi wa Mexico. Niteñi, buñata bwa batu bababulela Sitojolabal bapila mwa muleneñi wa Altamirano ni wa Las Margaritas—ibato ba likilomita ze 1,000 kuzwa fo! Kabakaleo, nekuli taata kuli batoloki batoloke hande kulikana ni mone icinceza puo ya Sitojolabal. Mi ofisi ya mutai neipalelwa kufumana mizwale ni likaizeli bane bapila bukaufi bane bakona kutusa kutoloka lihatiso ni kulukisa litaba za kuteeleza mwa Sitojolabal.

 Kabakaleo, ba Katengo ka Bañoli ka Sitopa Sesietelela nebabata kututiseza batoloki kwa sibaka kone ibulelwa puo ya Sitojolabal. Kacwalo, ofisi ya mutai yaleka muyaho ni kuulukisa sinca. Kueza cwalo nekucipile kufita kuyaha muyaho omunca kamba kutelela muyaho.

 Mutoloki yomuñwi naabulezi cwana ka za mwatuselizwe ki taba yeo: “Ka lilimo zelishumi zese nisebelelize fa ofisi ya mutai, nenisika kopana kale ni mutu yanaapila bukaufi ni mutai yanaabulela puo yaka. Ofisi ya toloko cwale ifumaneha mwa sibaka mosibulelwa hahulu Sitojolabal. Zazi ni zazi nikopananga ni batu bababulela Sitojolabal. Taba yeo initusize kuituta manzwi amanca amañata, mi senikona kueza hande musebezi waka.”

 Mwa silimo sa sebelezo sa 2021, kopano ilela kuyaha ni kulukisa Liofisi za Toloko (RTO) ni miyaho mokuezezwa likolo za Bibele ye 75 haiba miinelo ika lulumeleza. Misebezi ya kuyaha ni kulukisa miyaho ye 8 yeitusiswa ki mutai ukazwelapili, kukopanyeleza cwalo ni musebezi wa kuyaha ofisi yetuna yenca yezamaisa musebezi waluna mwa lifasi kaufela mwa Ramapo, kwa New York, hamohocwalo ni kututiswa kwa mutai wa Argentina ni wa Italy. Kutuha fo, Mandu A Mubuso amanca afitelela 1,000 atokwa kuyahiwa, libaka za mikopano zefitelela 6,000 zesweli kuitusiswa cwale seli zenyinyani hahulu mi sekutokwahala Mandu A Mubuso, mi hape Mandu A Mubuso a 4,000 atokwa kulukiswa sinca.

 Musebezi wa kuyaha ni wa kulukisa sinca miyaho ye ulifelwa cwañi? Muzwale Lázaro González, wa mwa Katengo ka Mutai wa Central America, naaalabile puzo ye hanaaambola za Ofisi ya Toloko ya Sitojolabal. Naabulezi kuli: “Mizwale ni likaizeli mwa naha yaluna ki babotana. Nelusike lwakona kuyaha liofisi za toloko mwa naha yahabo luna kusina kutusiwa ki mizwale ni likaizeli babañwi mwa lifasi kaufela. Linubu zezwelela kwa mizwale ni likaizeli mwa lifasi kaufela litusize kuli batoloki bakone kutolokela mwa libaka molibulelwa lipuo zebatoloka. Lufitisa buitumelo bwaluna bobutuna ku bona kabakala bufani bwabona.” Kaniti luli, misebezi ya buyahi ye ikonahaliswa ki linubu zemufanga kuli lizwisezepili musebezi wa mwa lifasi kaufela, mi buñata bwa linubu zeo lifiwanga ka kuitusisa donate.jw.org.