Ne Ni Fumani Tuso Ye Ne Ni Si ka Libelela Mwa Magazini Ya Mu Zuhe!

MUÑOLI WA MU ZUHE! WA KWA BENIN

▪ Noël wa lilimo ze 23 ha na ikatulezi ku tuhela sikolo ni ku ba sikombwa wa nako ye tezi wa Lipaki za Jehova, bahabo yena ne ba ikalezwi kuli u ka nyanda maswe. Ki niti, ne ku mu bezi t’ata ku fumana mubeleko o ne u ka mu konisanga ku fumana nako ya ku ya mwa bukombwa. Kacwalo mwa magazini ya Mu Zuhe! ha ne ku hatisizwe taba ye tusa ye li “Linzila Ze Ketalizoho Za Mwa ku Fumanela Musebezi,” Noël na kuta-kutezi ku i bala ka tokomelo. * Kana ne i mu tusize? Eni, kono isiñi ka mwa na libelela.

Muzamaisi wa sikolo se si si sa muuso na boni Noël inze a kutaza fa ndu ni ndu mi a mu buza haiba ne li yo muñwi wa Lipaki za Jehova. Muzamaisi wa sikolo yo na tokwa muluti yo muñwi, mi bakeñisa kuli na lemuhile kuli Lipaki za Jehova ba ziba ku luta ka bukwala, a buza Noël haiba na ziba mutu ya na ka itatela musebezi wo. Noël ha na alabile kuli ha ku na ya na ziba, muzamaisi yo a mu buza kuli: “Wena bo?”

Noël a li ku ba a sebeze sina muluti, mi fokuñwi na kukumanga. Ne ku mu bezi t’ata kakuli mwa Benin mulao wa tuto ne u tokwa kuli baluti ba tatubiwe pili kuli ba lemuhiwe kuli ha ba kukumi. Muzamaisi a mu sepisa kuli: “U nge liñolo la bupaki mi u ka fumana musebezi.”

Noël na eza hande mwa Sikolo sa Bukombwa sa Teokratiki, ili sikolo se si lukiselizwe ku tusa batu ku ba ni buikoneli bwa ku bulela fapil’a nyangela mi si zamaiswanga sunda ni sunda mwa liputeho za Lipaki za Jehova. Mane na fanga lingambolo za nyangela mwa puteho ya habo. Kono na ikalezwi hahulu ha na ile ku yo tatubiwa.

Mutatubi a mu fa magazini ni ku mu kupa kuli a bale ka ku tiisa paragilafu ye ne lalilwe ka bufubelu. Noël a lutula meto ha na boni taba ye li: “Linzila Ze Ketalizoho Za Mwa ku Fumanela Musebezi.” Na balile paragilafu a sa kukumi mi a fiwa liñolo la bupaki.

Hasamulaho, mutatubi a mu taluseza kuli a balange limagazini za Lipaki za Jehova nako kaufela. Muzamaisi a talusa kuli: “Limagazini ze li na ni litaba ze luta mi li ñozwi hande mi kona ze ni itusisanga nako kaufela mwa litatubo.”

Noël a kalisa ku luta, mi muzamaisi wa sikolo na bata kuli a zwelepili ku luta ni mwa silimo se ne si tatama, kono Noël na na ni milelo i sili. Na memilwe ku yo sebeleza fa ofisi ya mutai ya Lipaki za Jehova, ili fona fa sebeleza cwale.

[Litaluso za kwatasi]