Hamulaho kuetelela batu ba Jehova ka lilimo zeñata, Joshua ashwa inze anani lilimo ze 110. Maisilaele nebalapela Jehova, Joshua inze asapila. Kono hamulaho wa lifu lahae, bakala kulapela milimu ya maswaniso sina mone baezeza Makanana. Bakeñisa kuli Maisilaele nebasika zwelapili kulatelela milao yahae, Jehova alumeleza mulena wa Mukanana yabizwa Jabini kubanyandisa maswe. Batu bakupa tuso ku Jehova. Kacwalo, Jehova abafa mueteleli yomunca, yabizwa Baraki. Naaka tusa batu kukutela ku Jehova.

Debora, mupolofita wamusali aluma numwana ku Baraki. Naabata kumutaluseza lushango loluzwa ku Jehova lone lubulela kuli: ‘Uunge baana ba 10,000, mi uyo kopana ni mpi ya Jabini kwa nukana ya Kishoni. Teñi ko, ukayo tula Sisera, muzamaisi wa mpi ya Jabini.’ Baraki kihaa li ku Debora: ‘Nikaya kono konji haiba uya ni na.’ Mi Debora ali: ‘Nikaya ni wena. Kono uzibe kuli haki wena yaka bulaya Sisera. Jehova ubulezi kuli musali ki yena yaka mubulaya.’

Debora aya ni Baraki ni mpi yahae kwa Lilundu la Tabore kuyo itukiseza ndwa. Sisera asautwa feela ka za taba yeo, akopanya likoloi  zahae za ndwa ni masole mwa musindi wa kwatasi. Debora kihaa li ku Baraki: ‘Kacenu, Jehova uka kutusa kutula mwa ndwa.’ Baraki ni baana bahae ba 10,000, bashetumukela fa lilundu kuyo lwana ni mpi yemaata hahulu ya Sisera.

Cwale Jehova atahisa kuli kanukana ka Kishoni katale mezi amañata. Mi likoloi za ndwa za Sisera zatotobela mwa sileze. Sisera asiya koloi yahae mi amata. Baraki ni masole bahae batula mpi ya Sisera, kono Sisera naabalehile! Amata mi ayo ipata mwa tende ya musali yabizwa Jaele. Amufa mabisi kuli anwe mi amukwahela kubo. Ndwalume yo alobala kakuli naakatezi. Mi Jaele amunanalela ni kumukokotela mapo mwa toho. Sisera ashwa

Baraki ataha inze abata Sisera. Jaele azwela kwande a tende yahae, mi ali: ‘Kena mwahali. Nikubonise muuna yeubata.’ Baraki akena mwahali mi afumana Sisera inze ashwile. Baraki ni Debora balumbeka Jehova ka kuopela pina kabakala kutusa Maisilaele kutula lila zabona. Maisilaele nebabile ni kozo mwa lilimo ze 40 zenelatelezi.