Nebukadenezare hanaaisa manduna ba Juda kwa Babilona, naabeile sikombwa yabizwa Ashepenazi kuba muzamaisi wabona. Nebukadenezare abulelela Ashepenazi kufumana mitangana bane banani buiketo bobunde ili baba butali mwahalaa bona. Mitangana bao nebaka lutiwa ka lilimo zetaalu. Tuto yene baka amuhela neika batusa kuba likombwa za butokwa mwa Babilona. Mitangana nebaka lutiwa kubala, kuñola, ni kubulela puo ya Siakadi ya mwa Babilona. Hape nebaswanela kucanga lico zeswana ni zanaacanga mulena ni likombwa zahae. Mabizo a mitangana bao neli Daniele, Hanania, Mishaele, ni Azaria. Ashepenazi abafa mabizo amanca a Sibabilona, ili: Beliteshazare, Shadrake, Meshaki, ni Abedinego. Kana tuto yeo neika tahisa kuli batuhele kusebeleza Jehova?

 Mitangana babane ba nebaikatulezi kuutwa Jehova. Nebaziba kuli habaswaneli kuca lico za mulena kakuli Mulao wa Jehova neubonisa kuli lico zeñwi zahae nelisika kena. Kacwalo, kihaa bali ku Ashepenazi: ‘Shangwe usike waluhapeleza kuca lico za mulena.’ Ashepenazi ababulelela kuli: ‘Haiba hamuci mi mulena alemuha kuli mwakula, uka nibulaya!’

Daniele naanani mubonelo omuñwi. Abulelela sikombwa sabona kuli: ‘Shangwe ulufange feela miloho ni mezi ka mazazi a 10. Kihona uka lubapanya kwa mitangana babacanga lico za mulena.’ Sikombwa alumela akalezo yeo.

Hamulaho wa kubalika ka mazazi a 10, Daniele ni balikani bahae babalaalu babonahala kuba ni mibili yeiketile luli kufita mitangana babañwi kaufela. Jehova naatabile bakeñisa kuli neba muutwile. Mane naafile Daniele butali bwa kuutwisisa taluso ya lipono ni litolo.

Hase bafelize kulutiwa, Ashepenazi aisa mitangana ku Nebukadenezare. Mulena aambola ni bona mi alemuha kuli Daniele, Hanania, Mishaele, ni Azaria nebanani hahulu zibo ni butali kufita mitangana babañwi kaufela. Aketa mitangana babane bao kusebeleza mwa ndu yahae ya bulena. Mulena hañata naakupanga tuso ku bona kuli bakone kumueleza fa litaba za butokwa. Jehova naabatusize kuba ni butali bobutuna kufita baana ba mulena bababutali ni ba mabibo.

Nihaike kuli nebapila mwa naha yenesi yabona, Daniele, Hanania, Mishaele, ni Azaria nebasika libala kuli neli batu ba Jehova. Kana ni mina mukahupula Jehova, nihaikaba kuli hamuyo hamoho ni bashemi bamina?