Zasoneka Yoane 8:12-59
8 12 I bosi, Yesu ubasamunuini diaka vo: “Mono i ntemo a nza.+ Konso ona okundanda ke kangadila nkutu mu tombe ko, ntemo+ a moyo kaka kekala wau.”
13 Afarisi bamvovese vo: “Ngeye kibeni okuyisilanga umbangi; umbangi waku ke waludi ko.”
14 Yesu ubavutwidi vo: “Kanele vo, ikuyisilanga kimbangi, e kimbangi kiame kialudi, e kuma kadi, nzeye ko kuna yatuka ye kuna ikwenda.+ Kansi oyeno ke nuzeye ko ko kuna yatuka, ngatu kuna ikwenda.
15 Oyeno nufundisilanga muna ngindu za wantu;+ omono kifundisa muntu ko.
16 Kana nkutu vo mfundisi, e mfundisa ame yaludi, e kuma kadi, kina mono mosi ko, kansi o Se ona wantuma una yame.+
17 Muna Nsiku eno diasonama vo: ‘O umbangi wa wantu wole waludi.’+
18 Omono ikuyisilanga e kimbangi, o Se mpe ona wantuma, okunsilanga e kimbangi.”+
19 Bamvovese vo: “O Se diaku akweyi kena?” Yesu ovutwidi vo: “Omono ke nunzeye ko, ngatu zaya o Se diame.+ Kele vo nuanzaya, o Se diame mpe nuadi kunzaya.”+
20 Vana yanzala kia lundilu+ kavovele mambu mama, ekolo kalongelenge muna tempelo. Kansi ke vakedi ona umbaka ko, kadi e ntangw’andi ke yafwene ko.+
21 Ubavovese diaka vo: “Ikwenda kwame, oyeno nukumpava, muna masumu meno nufwila.+ Kuna ikwenda, oyeno ke nulendi ko kwenda ko.”+
22 Ozevo Ayuda bavovele vo: “Nga vonda kekuyivonda? Kadi owu kavovele vo: ‘Kuna ikwenda, oyeno ke nulendi ko kwenda ko.’”
23 Ubavovese vo: “Oyeno nu wantu a nsi; omono kuna ntandu yatuka.+ Oyeno nu wantu a nza yayi; omono ki muntu a nza yayi ko.
24 I dianu inuvovesèle vo: Muna masumu meno nufwila. Kadi avo nulembi kwikila vo i mono kwame, muna masumu meno nufwila.”
25 Banyuvuidi vo: “Ongeye u nani?” Yesu ubavovese vo: “Ntangwa yankatu ifwasanga mu mokena yeno!
26 Mambu mayingi ngina mau mu kunuvovesa yo fundisa. Ndiona wantuma waludi, mana yawá kwa yandi, i mau isamunanga kwa nza.”+
27 Oyau ke babakwidi ko vo mambu ma Se diandi kabavovese.
28 I bosi, Yesu ovovele vo: “Vava numanika Mwan’a muntu,+ i bosi nuzaya wo vo i mono yuyu,+ omono mpe kivanganga diambu muna ngindu za mono kibeni ko;+ kansi mana yalongwa kwa Se, i mau kaka isamunanga.
29 Ndiona wantuma wina yame; kangiambwidi mono mosi ko, e kuma kadi, lumbu yawonso ivanganga mambu mekunyangidikanga.”+
30 Vava kavovele mambu mama, ayingi bakwikidi muna yandi.
31 I bosi, Yesu ovovese Ayuda ana bankwikidi vo: “Avo nusikila muna diambu diame, nu alongoki ame kieleka,
32 nuzaya e ludi,+ e ludi kikunuvevola.”+
33 Bamvutwidi vo: “Oyeto tu mbongo ya Abarayama, ke twabundunua nkutu kwa muntu ko. Aweyi ovovele vo, ‘Nuvevolwa’?”
34 Yesu ubavutwidi vo: “Kieleka, kieleka, inuvovese vo, konso ona osumukanga, i mbundu a sumu.+
35 O mbundu ke kalanga mu nzo yakwele mvu ko; o mwana okalanga mu nzo yakwele mvu.
36 Dianu vo, o Mwana avo unuvevuele, nuvevokele kikilu.
37 Nzeye wo vo nu mbongo ya Abarayama. Kansi nuzolele kumponda, e kuma kadi, e diambu diame ke disikilanga mu yeno ko.
38 Mana yamona kwa Se diame,+ i mau isamunanga, kansi oyeno mana nuawá kwa se dieno, i nuvanganga.”
39 Bamvutwidi vo: “O se dieto, Abarayama.” Yesu ubavovese vo: “Kele vo nuakala wan’a Abarayama,+ nuadi vanga mavangu ma Abarayama.
40 Kansi owau nuzolele kumponda, mono inusamunuini e ludi kina yawá kwa Nzambi.+ Abarayama kavanga wo ko.
41 Oyeno mavangu ma se dieno nuvanganga.” Bamvovese vo: “Ke tu wan’a zumba* ko; Se dimosi kaka tuna diau, Nzambi.”
42 Yesu ubavovese vo: “O Nzambi kele vo kakala Se dieno, nga nuadi kunzola,+ kadi kwa Nzambi yatuka, i dianu nginina ovava. Kiayizila mu luzolo lwame ko, kansi yandi wantuma.+
43 Ekuma nulembele bakulwila mana ivovanga? Kadi ke nuzolele wá diambu diame ko.
44 Nkadi ampemba i se dieno, zolela ya se dieno nuzolele vanga.+ Oyandi, mumponda-muntu tuka kuna lubantiku,+ kasikila muna ludi ko, e kuma kadi, muna yandi ke muna ludi ko. Vava kevovanga luvunu, ovovanga mun’owu wa ngindu zandi, kadi nkwa luvunu kwandi ye se dia luvunu.+
45 Omono, wau mpovele ludi, oyeno ke nuzolele kunkwikila ko.
46 Nani vovo nuina, okuntumba muna diambu dia sumu? Avo ludi mpovele ekuma nulembele kunkwikidila?
47 Ndiona una vo muntu a Nzambi, mambu ma Nzambi kewanga.+ Kiaki i kuma nulembele wila, e kuma kadi, oyeno ke nu wantu a Nzambi ko.”+
48 Ayuda bamvutwidi vo: “Ke kiau ko i kuma tuvovele vo, ‘Ngeye u musi Samaria,+ nkuya mpe wina wau e’?”+
49 Yesu ovutwidi vo: “Kina ye nkuya ko, Se diame kaka izitisanga, vo i yeno, ke nukunzitisanga ko.
50 Kansi omono, kivavanga nkembo a mono kibeni ko;+ vena ye Ndiona ovavanga wo, yandi i mfundisi.
51 Kieleka, kieleka, inuvovese vo, avo muntu olunda diambu diame, ke mona lufwa ko yakwele mvu.”+
52 Ayuda bamvovese vo: “Owau tuzeye wo vo nkuya una wau. Abarayama wafwa, ye angunza mpe, kansi edi ovovele vo: ‘Ovo muntu olunda diambu diame, ke yeleka lufwa ko yakwele mvu.’
53 Nga osundidi o se dieto Abarayama ona wafw’e? Angunza mpe bafwa. Ongeye benze vo u nani?”
54 Yesu ovutwidi vo: “Avo yikikembese, o nkembo ame wankatu. Se diame okunkembesanga,+ ona nuyikidi vo Nzambi eno.
55 Ke nunzeye mpe ko,+ kansi omono, inzeye.+ Avo mpovele vo, kinzeye ko, ozevo nkitukidi nkwa luvunu nze yeno. Kansi mono inzeye, ilundanga mpe diambu diandi.
56 O se dieno Abarayama wayangalela e vuvu kia mona e lumbu kiame, kamona kio yo yangalala.”+
57 I bosi, Ayuda bamvovese vo: “Ongeye kuna ye mvu 50 ko, aweyi wamwena Abarayama?”
58 Yesu ubavovese vo: “Kieleka, kieleka, inuvovese vo, vitila Abarayama kawutuka, mono yakikadila kala.”+
59 Babongele matadi bantuba, kansi Yesu oswekamene, okatukidi muna tempelo.
Mvovo vana yand'a lukaya
^ Muna Kingerekia, por·nei′a. Tala Nsas’a Mvovo, “Mavangu ma Zumba.”
