Zasoneka Yoane 5:1-47
5 I bosi, kwakala nkinzi+ wa Ayuda; o Yesu otombokele kuna Yerusaleme.
2 Muna Yerusaleme, vana Vitu dia Mameme,+ vena ye zinga kia maza kiyikilwanga muna Kiyibere vo, Beteseda, kiazietwa kwa nlonga tanu mia malunzi.
3 Vana fulu kiokio valavalalanga mbevo zayingi, ampofo, mbevo za malu ye avanguki.*
4 * ——
5 Kansi vakala muntu mosi wayelanga mu mvu 38.
6 Yesu umwene wau kalavalele yo bakula wo vo kolo kiayingi se keyelanga, umvovese vo: “Nga ozolele sasuka e?”+
7 O mbevo umvutwidi vo: “E Mfumu, kina ye muntu unkobola mu zinga ko vava maza mefusukanga, avo se ikwenda, wankaka umpitidi kuna ntwala yo kulumuka.”
8 Yesu umvovese vo: “Telama! Bonga lwandu lwaku,* wenda kwaku.”+
9 Vana vau o muntu osasukidi, obongele lwandu lwandi,* oyantikidi kangala.
E lumbu kiakina Lumbu kia Vundu kiakala.
10 Dianu vo Ayuda bavovese ndiona wawukwa vo: “O unu Lumbu kia Vundu, ke diansongi ko mu nata lwandu lwaku.”*+
11 Ubavutwidi vo: “Ndiona unsaswidi, yandi umpovese vo, ‘Bonga lwandu lwaku,* wenda kwaku.’”
12 Banyuvuidi vo: “Nani uvovese vo, ‘Bonga lwandu wenda kwaku’?”
13 Kansi, ona wawukwa kazeye ko kana nani, kadi o Yesu okotele vana kati kwa ndonga.
14 I bosi, o Yesu unsolwele muna tempelo, umvovese vo: “Tala, osasukidi. Kusumuki diaka ko, kimana walembi lwakilwa diambu disundidi e mpasi.”
15 O muntu okatukidi kwandi, wele zayisa Ayuda vo i Yesu unsaswidi.
16 Muna diadi, Ayuda batelamene Yesu, wau kavangidi mambu mama muna Lumbu kia Vundu.
17 Kansi, o Yesu ubavutwidi vo: “O Se diame osalanga yamu wau, omono mpe yakinu sala.”+
18 Ekiaki i kuma Ayuda bayantikidi vanga mawonso kimana bamvonda, kadi kakulwidi kaka Lumbu kia Vundu ko, kansi oyikidi mpe Nzambi vo Se diandi,+ ukifwananese yo Nzambi.+
19 Muna kuma kiaki, o Yesu ubavutwidi vo: “Kieleka, kieleka, inuvovese vo, o Mwana kalendi vanga diambu ko muna ngindu za yandi kibeni, kansi dina kemonanga kaka kwa Se.+ Kadi konso dina kevanga o Se, i diau mpe kevanga o Mwana.
20 Kadi o Se ozolele o Mwana,+ okunsonganga mpe konso dina kevanga, songa kekunsonga e salu iviokele yayi, kimana nuasivika.+
21 Wauna o Se kefudilanga mafwa yo kubavana o moyo,+ i una mpe o Mwana kevaninanga o moyo kwa konso ona kazolele.+
22 Kadi o Se kefundisanga nkutu muntu ko, kansi mfundu wawonso ovene wo kwa Mwana,+
23 kimana awonso bazitisa o Mwana, una bezitisilanga o Se. Konso ona olembi zitisa o Mwana, ke zitisanga Se ko ona wantuma.+
24 Kieleka, kieleka, inuvovese vo, konso ona owanga e diambu diame yo kwikila mpe Ndiona wantuma, una yo moyo a mvu ya mvu,+ ke fundiswa ko, okatukidi muna lufwa wizidi muna moyo.+
25 “Kieleka, kieleka, inuvovese vo, e ntangwa ikwiza, i yau yiyi, ina ikala vo, o mafwa mewa e nding’a Mwan’a Nzambi, awana besia sungididi bekala o moyo.
26 Kadi wauna o Se kekadilanga o moyo muna yandi kibeni,*+ i una mpe kavene kwa Mwana kakadila o moyo muna yandi kibeni.+
27 Umvene mpe wisa kia fundisa,+ kadi yandi i Mwan’a muntu.+
28 Ke nusiviki dio ko ediadi, kadi e ntangwa ikwiza, ina ikala vo awonso bena muna ziami* bewá e nding’andi+
29 yo vaika, awana bavanga mambu mambote, befulwa mu vua o moyo, awana bavanga mambu mambi, befulwa mu fundiswa.+
30 Omono kilendi vanga diambu ko mu ngindu za mono kibeni. Konso una ngwidi, i wau ifundisilanga, e mfundis’ame yansongi,+ kadi kivanganga luzolo lwame ko, lwa ndiona wantuma kaka.+
31 “Avo mono kibeni ikisididi umbangi, o umbangi wame ke waludi ko.+
32 Vena yo wankaka okunsila kimbangi, nzeye wo vo e kimbangi kiandi kialudi.+
33 Oyeno nuatuma wantu kwa Yoane, oyandi wasila e ludi o umbangi.+
34 Vo i mono, kitambulwila kimbangi kia muntu ko, kansi mpovele mambu mama kimana nuavuluzwa.
35 O muntu ndioyo wakala se mwinda wakwama yo kezima; muna fikolo, oyeno nuazola yangalela muna ntemo andi.+
36 Vo i mono, e kimbangi ngina kiau kiviokele kina kia Yoane, kadi e salu yavewa kwa Se diame yalungisa, i yau isalanga, e salu yoyo isianga e kimbangi vo Se wantuma.+
37 O Se mpe ona wantuma, yandi kibeni unsididi e kimbangi.+ E nding’andi ke nuawidi yo nkutu ko, ngatu mona e mpw’andi,+
38 e diambu diandi ke dikalanga mu yeno ko, e kuma kadi, ke nukwikidi muna ndiona katuma ko.
39 “Oyeno nuvavululanga e Sono+ kadi nuyindulanga vo i mûna nuvuila o moyo a mvu ya mvu; e sono yayi isianga kimbangi mu kuma kiame.+
40 Oyeno ke nuzolele kwiza kwa mono ko+ nuavua moyo.
41 Kitambulanga nkembo a wantu ko,
42 kadi ntomene wo zaya vo, o zola kwa Nzambi ke kuna mu yeno ko.
43 Ngizidi muna nkumbu a Se diame, kansi ke nuntambwidi ko. Avo muntu ankaka wizidi muna nkumbu a yandi kibeni, nukuntambula.
44 Aweyi nulenda kwikidila, oyeno nutambuziananga o nkembo, kansi o nkembo utukanga kwa Nzambi mosi kaka ke nuvavanga wo ko?+
45 Ke nuyindula ko vo funda ikunufunda kwa Se; vena ye mosi okunufundanga, i Mose,+ ona nusidi e vuvu.
46 Kala vo nuakwikila muna Mose, nuadi kwikila mpe omu mono, kadi yandi wasoneka mu kuma kiame.+
47 Avo e sono yandi nkutu ke nukwikidi yo ko, aweyi nukwikidila mana mpovele?”
Mvovo vana yand'a lukaya
^ Yovo “akwa mavola.”
^ Yovo “e mfulu aku.”
^ Yovo “e mfulu andi.”
^ Yovo “e mfulu aku.”
^ Yovo “e mfulu aku.”
^ Yovo “kenina yo lukau lwa moyo muna yandi kibeni.”
^ Mvovo wa sina: “ziami ya luyindulu.”
