Zasoneka Yoane 1:1-51
1 Kuna lubantiku vakala e Diambu,+ e Diambu diakala yo Nzambi,+ e Diambu diakala nzambi.+
2 I yandi ndioyo wakala yo Nzambi kuna lubantiku.
3 E lekwa yawonso muna yandi yavangilwa,+ ke vena lekwa kiavangwa ko kina kialembi vangilwa muna yandi.
Ina yavangilwa
4 muna yandi i mwakal’o moyo, o moyo wakala se ntemo a wantu.+
5 O ntemo utemenanga muna tombe,+ e tombe ke kifukanga wo ko.
6 Vayiza muntu watumwa kwa Nzambi; nkumbu andi Yoane.+
7 Wayiza se mbangi, kimana kasila ntemo e kimbangi,+ o wantu a mpila zawonso bakwikidila muna yandi.
8 Ke yandi ko i ntemo,+ kansi ntemo kayiza sila e kimbangi.
9 O ntemo aludi una utemenanga wantu a mpila zawonso ufinamene kwiza ova nza.+
10 Okedi ova nza,+ e nza yavangilwa muna yandi,+ kansi e nza ke yanzaya ko.
11 Muna nsi andi kayiza, kansi esi nsi andi ke bantambula ko.
12 Awonso ana bantambula, wabavana elau dia kala se wan’a Nzambi,+ kadi bakwikila muna nkumbu andi.+
13 Bawutuka, ke mu menga ko yovo mu luzolo lwa nitu, ngatu mu luzolo lwa muntu, kansi lwa Nzambi kaka.+
14 E Diambu diakituka se muntu,*+ wakala yeto, twamona o nkembo andi, o nkembo nze una wa mwana mosi kaka+ kuna kwa se; wazala ye dienga dia* Nzambi ye ludi.
15 (Yoane wansila kimbangi, waboka oku vo: “I yandi yuna mpovelenge vo: ‘Ndiona okwiz’andandinge, umvitidi oku ntwala, kadi wateka zinga.’”)+
16 Wau vo wazala ye nsambu, yeto awonso i dianu tutambulwilang’e nsambu ye nsambu.
17 Kadi o Nsiku muna Mose+ wavaninua, e nsambu+ ye ludi muna Yesu Kristu kizìdi.+
18 Ke vena nkutu muntu ko wamona Nzambi;+ nzambi mosi kaka,+ ona wina vana ndambu a Se,*+ i yandi wansengomona.+
19 I wau wuwu o umbangi kasia o Yoane vava Ayuda batuma anganga ye Anelevi kuna Yerusaleme, benda kunyuvula vo: “Ongeye u nani?”+
20 Kavakwidi wo nkalu ko, otambulwidi wo, oku vo: “Ke mono ko i Kristu.”
21 Banyuvuidi vo: “Ozevo, ngeye i Eliya e?”+ Ovutwidi vo: “Ke mono ko.” “Ngeye i Ngunza e?”+ Ovutwidi vo: “Ve!”
22 Bamvovese vo: “Ongeye u nani? Utuzayisa kimana twavana mvutu kw’awana batutumini. Adieyi ovovele mu kuma kia ngeye kibeni?”
23 Ovovele vo: “Omono i nding’a muntu obokanga muna makanga, oku vo: ‘Nusingika e nzil’a Yave,’*+ wauna kavova o Yesaya wa ngunza.”+
24 Wantu ana batumwa, Afarisi bakala.
25 Banyuvuidi vo: “Ozevo, ekuma ovubilanga, avo ke ngeye ko i Kristu yovo Eliya, ngatu Ngunza?”
26 Yoane ubavutwidi vo: “Omono muna maza ivubilanga. Vovo nuina vatelamene ona nulembele zaya,
27 ona okundandila, kiafwana kutulula nsinga mia nsampatu zandi ko.”+
28 Mambu mama kuna Betania mavangamena, kuna simu dia Yodani, kuna kwavubilanga Yoane.+
29 Muna lumbu kialanda, omwene Yesu okwizanga kwa yandi, ovovele vo: “Tala o Mwan’a meme+ a Nzambi, ona okatula e sumu+ dia nza!+
30 Ondioyu i yandi ona mpovelenge vo: ‘Vena yo muntu okundandila ona umpitidi kuna ntwala, kadi wateka zinga.’+
31 Kana nkutu i mono kianzaya ko, i diau ngizidi vubila muna maza kimana kasengomoka kwa Isaele.”+
32 Yoane osidi mpe kimbangi, oku vo: “Yamwene o mwanda wakulumukini tuka kuna zulu nze yembe, wizidi yo kala vana ntandu andi.+
33 Kana nkutu i mono kianzaya ko, kansi Ndiona wantuma yavubila muna maza wampovesa vo: ‘Konso ona o mwanda ukulumukina yo kala vana ntandu andi,+ i yandi ndiona ovubila o wantu muna mwand’avelela.’+
34 Yamona e diambu diadi, yasia e kimbangi vo ondioyu i Mwan’a Nzambi.”+
35 Muna lumbu kialanda, Yoane otelamene ye alongoki andi wole,
36 wau katadidi Yesu okangalanga, ovovele vo: “Tala o Mwan’a meme+ a Nzambi!”
37 Alongoki yau awole vava bawidi mana kavovele, balende Yesu.
38 I bosi, Yesu ovilukidi, ubamwene vo yandi belandanga, ubavovese vo: “Adieyi nuzolele?” Bamvovese vo: “E Rabi (i sia vo, “Nlongi”), akweyi okalanga?”
39 Ubavovese vo: “Nuiza, nuatala.” Bele, bamwene kuna kekalanga, bakedi yandi muna lumbu kiakina; mu tezo kia ola ya kumi* diavangama.
40 Andere+ wa nleke a Simone Petelo, mosi muna nwole ana bawá mana kavova o Yoane ye balende Yesu.
41 Entete osolwele Simone wa mpangi andi, umvovese vo: “Tusolwele Masia”+ (i sia vo, “Kristu”),
42 untwese kwa Yesu. O Yesu vava kantadidi, ovovele vo: “Nge i Simone+ wa mwan’a Yoane; oyikilwa vo, Kefa” (yasekolwa vo, “Petelo”).+
43 Muna lumbu kialanda, Yesu ozolele kwenda kuna Ngalili. Osolwele Filipo,+ umvovese vo: “Undanda.”
44 Filipo musi Betesaida kakala, mbanza ya Andere yo Petelo.
45 Filipo omwene Natanaele,+ umvovese vo: “Tusolwele ona wayikwa kwa Mose muna Nsiku ye kuna kwa Angunza: Yesu wa Nazarete, wa mwan’a Yosefe.”+
46 Kansi, Natanaele umvovese vo: “Nga muna Nazarete mulenda tuka má kiambote e?” Filipo umvovese vo: “Wiza tala.”
47 Yesu omwene Natanaele okwizang’oku kena, ovovele mu kuma kiandi vo: “Tala Nyisaele akieleka, muna yandi ke muna umpûki ko.”+
48 Natanaele umvovese vo: “Aweyi unzayidi?” Yesu umvutwidi vo: “Vava kwabokelo kwa Filipo ko, ekolo okedi kuna nsi a nsanda, yakumona.”
49 Natanaele umvutwidi vo: “E Rabi, ngeye u Mwan’a Nzambi, ngeye u Ntinu a Isaele.”+
50 Yesu umvutwidi vo: “Nga okwikidi wau ivovese vo yakumona kuna nsi a nsand’e? Osinga mona mambu maviokele omama.”
51 Umvovese diaka vo: “Kieleka, kieleka, inusamunuini vo, numona zulu diziuka ye mbasi za Nzambi zitomboka yo kulumuka kwa Mwan’a muntu.”+
Mvovo vana yand'a lukaya
^ Yovo “nkenda za.”
^ Mvovo wa sina: “nsuni.”
^ Yovo “vana tulu kia Se.” Ediadi disongele vo fulu kiamfunu kikilu.
^ I sia vo, tezo kia ola ya 16.
