Zasoneka Yoane 15:1-27
15 “Mono i nsing’a vinyu aludi, o Se diame i mvati.
2 Konso tayi kina omu mono kilembi yima e mbongo, oyandi ozenganga kio, konso kina kiyimanga e mbongo vangila kevangila* kio kimana kiatoma yima.+
3 Oyeno nuvelele kala mu kuma kia diambu dina inuvovese.+
4 Nukala yame ntwadi, omono ikala yeno e ntwadi. Nze una tayi ke ilendi yima mbongo ko avo ke ina mu nsing’a vinyu ko, oyeno mpe ke nulendi yima mbongo ko avo ke nuna yame ntwadi ko.+
5 Mono i nsing’a vinyu; oyeno nu tayi. Konso ona okala yame ntwadi, omono mpe ikala yandi e ntwadi, oyima mbongo yayingi;+ kadi avo ke nuna omu mono ko ke nulendi vanga diambu ko.
6 Konso ona olembi kala yame e ntwadi, vetwa kevetwa nze tayi, kayuma. O wantu bekutakesa tayi yayina batuba yo vana tiya, yavia.
7 Avo nukala yame e ntwadi ye diambu diame mpe diakala omu yeno, konso dina nulomba divangama kwa yeno.+
8 O Se diame okembeselwa muna diambu edi: Nukwamanana yima mbongo yayingi yo songa vo nu alongoki ame.+
9 Wauna o Se diame kanzolele,+ omono mpe i una inuzolele; nusikila muna zola kwame.
10 Avo nulunda e nkanikinu miame, nusikila muna zola kwame, wauna omono ilundilanga e nkanikinu mia Se diame yo sikila muna zola kwandi.
11 “Inuvovese mambu mama, kimana e kiese kiame kiakala omo yeno, e kiese kieno kialunga.+
12 I nkanikinu ame wau, nuzolaziananga wauna inuzolele.+
13 Ke vena muntu ko wina ye nzola isundidi e yayi, i sia vo, muntu kayekola o moyo andi muna wete dia akundi andi.+
14 Oyeno nu akundi ame avo nuvangidi oma inukanikini.+
15 Kikunuyikila diaka ntaudi ko, kadi ntaudi kazeye ko mana o mfumu andi kevanganga. Kansi inuyikidi se akundi, kadi inuvovese mawonso yawa kwa Se diame.
16 Ke yeno ko nunsolele, kansi mono inusolele kimana nuakwamanana yima e mbongo, e mbongo eno yakala yakwele mvu, kimana konso mana nulomba kwa Se muna nkumbu ame, kanuvana mo.+
17 “Inukanikini mambu mama kimana nuazolaziananga.+
18 Avo nza ikunumenga, nuzaya wo vo mono yateka menga.+
19 Kele vo nukala nua nza, e nza yadi kunuzola. Wau vo ke nua nza ko,+ kansi omono inusolele ova nza, ekiaki i kuma e nza ikunumengenanga.+
20 Nusungamena edi inuvovese vo: O ntaudi kasundidi mfumu andi ko. Avo bambangika, oyeno mpe bekunubangika;+ avo balunda e diambu diame, e diambu dieno mpe belunda dio.
21 Bekunuvanga mambu mama mawonso mu kuma kia nkumbu ame, kadi Ndiona wantuma ke banzeye ko.+
22 Kele vo kiayiza ko yabavovesa, ke badi kala ye tumbu kia sumu ko.+ Kansi owau ke balendi vakula nkalu ko muna tumbu kia sumu diau.+
23 Konso ona umbengene, omengene mpe o Se diame.+
24 Kele vo kivangi mavangu mana ke masidi vanga muntu ko vana bena, ke badi nata sumu ko;+ kansi owau bambwene, bambengene kumosi yo Se diame.
25 Kansi, ediadi divangamene kimana dialungana dina diasonama muna Nsiku au vo: ‘Bambengene kondwa kuma.’+
26 Vava kelwaka o nsadisi ona ikunutwikila, tuka kuna kwa Se, i sia vo, mwand’aludi,+ una utuka kwa Se, i wau ukunsila e kimbangi;+
27 oyeno mpe nukunsila umbangi,+ kadi nukalanga yame tuka kuna lubantiku.
Mvovo vana yand'a lukaya
^ Mvovo wa sina: “velelesa kevelelesa.”
