Balongo baji na byubilo byawama bya bwina Kilishitu bakwasha bingi kipwilo. Mwanamulume wakoka muchima utundaika mutende. Inge mukeba bantu kwimuyuka’mba mwakooka muchima, mwafwainwa kutelekanga ne kulondela bibena kwamba bakwenu. Inge mubena kwisamba na bakwenu, nanchi mukalondelanga byafuukula bakwenu bavula inge kechi bibena kulala mizhilo nangwa mafunde a mu Baibolo nenyi? Kechi mwafwainwa kukebangatu’mba bakwenu balondele byonka byo mubena kukeba ne. Kyanema bingi kuteleka ku bibena kwamba bakwenu. (Nte. 13:8, 9; Maana 15:22) Kino kibena kulumbulula’mba mwafwainwa kwikala bakooka muchima ne kunemeka bakwenu. Inge mwizhingijisha na bakwenu mwafwainwa kupwana nabo ne kwikala mu mutende. (Yako. 3:17, 18) Byambo byenu byawama bikafwomona michima ya bantu kuvwangakotu ne ya balwanyi betu.​—Mito. 8:1-3; Maana 25:15; Mat. 5:23, 24. w24.11 23 ¶13

Nangwa kya kuba Yesu “wafwile jimo jonka,” pano bino watwajijila na kwitukwasha. (Loma 6:10) Mu ñanyi jishinda? Watwajijila na kwingila pa kuba’mba etukwashe kumwenamo mu bukuzhi bwanji. Akilangulukai pa bintu bimo byo abena kuba. Bamutongola kwikala Mfumu, Ñanga Mukatampe kabiji ye mutwe wa kipwilo. (1 Ko. 15:25; Efi. 5:23; Hebe. 2:17) Ye ubena kutangijila mwingilo wa kukonkanya bashingwa ne jibumba jikatampe. Uno mwingilo ukapwa malwa akatampe saka akyangye kutendeka. (Mat. 25:32) Kabiji umona kuba’mba tubena kutambwila kajo ka ku mupashi ketukwasha kutwajijila kwingijila Yehoba mu bukishinka mu ano moba a kupelako. (Mat. 24:45) Kabiji mu bukalama bwanji bwa Myaka Kiumbi Kimo, ukatwajijila kwingila pa kuba’mba tukamwenemo. Kinetu, Yehoba wapaine Mwananji kuba’mba etukwashe. w25.01 24 ¶12

Inge Yehoba witulekelako mambo, ulubako kabiji kechi ukeavulukapo nangwatu pacheche kulutwe ne. Kino kitulengela kwikala na bulunda bwawama na Shetu wa mwiulu. Kabiji twafwainwa kuvulukanga’mba kwitulekelako mambo kya kine ke bupe kufuma kwi Yehoba. Bufuma kwi Yehoba na mambo a butemwe ne lusa lwanji lukatampe lo amwesha bantu bandengamambo. Yehoba ulekelako bantu mambo, kechi na mambo a kuba’mba kibafwainwa ne. Twafwainwa kumusanchila bingi Yehoba mambo aye ye Lesa ‘witulekelako mambo kya kine.’ (Sala. 130:4; Loma 4:8) Nangwa byonkabyo, twafwainwa kubapo kintu kyanema bingi pa kuba’mba Yehoba etulekeleko mambo. Yesu walumbulwile’mba: “Inge mwabula kwibalekelako bantu mambo o bemulenga, ne aye Shenu wa mwiulu kechi ukemulekelako mambo enu ne.” (Mat. 6:14, 15) Onkao mambo, kyanema bingi kulekelako bakwetu mambo byonka byuba Yehoba. w25.02 13 ¶18-19

Akilangulukai pa bantu bo baipayile kimye Yehoba kyo aonawine mizhi ya Sodoma ne Gomola. Mu muzhi wa Sodoma mwaikalanga ne muntu waoloka aye Lota. Pano nanchi Lota wasapwijile bantu bonse bajingamo nyi? Ine. Ibyo kuba’mba baubanga byatama, pano nanchi bonse bayukile kyawama ne kyatama nyi? Vulukai kuba’mba jibumba ja banabalume ba mu uno muzhi bakebelenga kukuna benyi ba kwa Lota. Baibolo waamba’mba jino jibumba javwangilemo bantu bavula “kutatwilatu ku banyike kufika ne ku bakulumpe.” (Nte. 19:4; 2 Pe. 2:7) Nanchi twayuka’mba Lesa wa lusa aye Yehoba wazhachishe bano bantu bonse pa muntu pa muntu kwa kubula luketekelo lwa kukasangulwa kulutwe nyi? Yehoba wabuujile Abalahama amba mu uno muzhi kechi mwajingapotu nangwa banabalume jikumi baoloka ne. (Nte. 18:32) Onkao mambo, bajinga bantu babula koloka kabiji Yehoba wibazhachishe na mambo a byubilo byabo byatama. Nangwa kiji bino, nanchi twakonsha kwamba ne kupwisha’mba, kafwako nangwa umo pe abo ukekala mu “lusanguko lwa . . . babula koloka” nenyi? Ine, kechi twakonsha kwamba bino ne. w24.05 2 ¶3; 3 ¶8

Inge mwakumwena mali mwakatazha,bamo batwela nkito ibalengela kusha kisemi kyabo ne kuya ku mpunzha ingi. Kino kimwesha kubula kufuukulapo bulongo. Saka mukyangye kuswa kutwela nkito, kechi mwafwainwa kutatu muchima pa mali o mukatambulanga ne, bino mwafwainwa kulanguluka ne pa bikekala bulunda bwenu ne Yehoba. (Luka 14:28) Iipuzhai’mba: ‘Masongola ami akekala byepi inge nafumapo kimye kyabaya? Nanchi nkakonshanga kutanwa ku kupwila kimye kyonse ne kuya mu mwingilo wa kusapwila nyi?’ Kabiji inge muji na baana, mwafwainwa kwiipuzha buno bwipuzho bwanema bwa kuba’mba: ‘Nkakomesha byepi baana bami “mu kwibajimuna ne kwibafunjisha maana a Yehoba” inge nafumapo kimye kyabaya?’ (Efi. 6:4) Ubainga bintu kwesakana na bilanguluka Lesa, kechi kulondela bimubuula ba mu kisemi nangwa balunda nenu babula kunemeka mafunde a mu Baibolo ne. w25.03 29 ¶12

Mwina Kilishitu wabula kukoma ku mupashi bakonsha kumongola ku bantu “bajimbaika” bakwabo kabiji bakonsha kumukumpula nobe bwato “bukumpaulwa ne kulelaulwa na manyaki.” Bakonsha kumongola ku bansatuki ne boba basampanya bintu bya bubela pa TV ne pa intaneti. Wakonsha kutendeka kubila bakwabo kichima, kuleta lutobo ne kuzhingila bukiji, nangwa kukankalwa kufuukula bulongo inge waesekwa. (1 Ko. 3:3) Binembelo byaesakanya muntu ubena kukoma ku mupashi na mwana ubena kukoma ne kwikala mukulumpe. (Efi. 4:15) Mwana kechi wayuka byavula ne kabiji ukebewa kumutangijila. Kimye kimo, inetu wakonsha kwambila mwananji kumukwata ku kuboko kimye kyo babena kukilañanya mukwakwa. Inge mwana wakoma, inanji ukaleka mwananji aye mwine kukilañanya mukwakwa. Pano bino, ukamuvululamo kutala kuku ne kuku pa kukilañanya mukwakwa. Inge mwana wakoma ne kwikala mukulumpe, aye mwine uyuka bya kuba pa kuba’mba abule kutaanwa mu mapuso. Kyo kimotu, inge bena Kilishitu bakoma ku mupashi, balanguluka pa mafunde a mu Baibolo pa kuba’mba bayuke bilanguluka Yehoba pa kyokyo kintu kyo bakeba kuba. Kabiji boba bintu kwesakana na mafunde a mu Baibolo. w24.04 3 ¶5-6

Pa myaka yavula, balunda ba Lesa bajinga boba bo ekala nabo mwiulu. Nangwa byonkabyo, pa kupitapo kimye walengele bantu kabiji nabo baikele benyi banji. Pa bano benyi banji pajinga ne Enoka, Nowa, Abalahama ne Yoba. Bano bapopweshi ba kine bebatelele’mba balunda ba Lesa nangwa’mba bantu “baendelenga na Lesa wa kine.” (Nte. 5:24; 6:9; Yoba 29:4; Isa. 41:8) Pa myaka yavula, Yehoba watwajijila kwita balunda nanji kwikala benyi banji. (Ezi. 37:26, 27) Ku buno bungauzhi bwa kwa Ezikyo tufunjilako kuba’mba Lesa ukeba bapopweshi banji ba kishinka kwikala na bulunda bwakosa ne aye. Walaya kulayañana nabo “lulayañano lwa mutende.” Buno bungauzhi bwamba pa kimye bantu baji na luketekelo lwa kwikala mwiulu ne bantu baji na luketekelo lwa kwikala pano pa ntanda kyo bakekala pamo mu tente wa kifwanyikizho saka bakwatankana nobe “jitanga jimo.” (Yoa. 10:16) Kino kyo kimye kibena kufika buno bungauzhi. w24.06 2 ¶2, 4; 3 ¶5

Atweba bantu ba Yehoba tutundaika Bufumu bwa Lesa na muchima wetu yense, pano bino twafwainwa kuchinchika pa kuba’mba tube bino. (Mat. 6:33) Mu ino ntanda ibi tukebewa kuchinchika pa kuba’mba tulondelenga mizhilo ya Yehoba ne kusapwila mambo awama a Bufumu. Kabiji twafwainwa kuchinchika pa kuba’mba tutwajijile kubula kwivwanga mu bya bumulwila ntanda mu ntanda muji bantu baabenamo. (Yoa. 18:36) Bantu ba Yehoba bavula bapita mu lukatazho lwa bya mali, kwibamanyika nangwa kwibakasa na mambo a kukaana kwivwanga mu bya bumulwila ntanda nangwa kukaana kutwela mwingilo wa bushilikale. Kufunda pa bantu batundaika bukalama bwa Yehoba na kuchinchika, kuketulengela kwikala na bulume ne kuchinchika. Mfumu wetu aye Kilishitu Yesu wakaine byamutundaikilenga Satana kwivwanga mu bya bumulwila ntanda. (Mat. 4:8-11; Yoa. 6:14, 15) Kimye kyonse waketekelanga Yehoba kumupa bulume. w24.07 3 ¶4; 4 ¶7

Yehoba wanembele jino jishimikila ja bulanda kuba’mba tufunjileko. Jitukwasha kuyuka ene mambo Yehoba o ashikilwa bundengamambo. Bundengamambo bonauna bulunda bwetu ne Yehoba kabiji buleta lufu. (Isa. 59:2) O ene mambo Satana kilengwa kya mupashi kyasatukile ne kuleta luno lukatazho, o atemenwa bundengamambo ne kutundaika bantu kulenga mambo. Satana byo alengejile Adama ne Evwa kulenga mambo, walangulukile’mba washinda Lesa. Pano bino, kechi wayukile’mba Yehoba uji bingi na butemwe ne. Lesa kechi wapimpwile bintu byawama byo akebelenga kubila baana ba kwa Adama ne Evwa ne. Watemwa bingi bantu kabiji ponkapotu wibalengejile kwikala na luketekelo. (Loma 8:20, 21) Yehoba wayukile kuba’mba baana banji bamo bakamutemwa kabiji bakakeba’mba ebakwashe kushinda bundengamambo. Byo aji Shabo kabiji Mulenga wabo, wanengezhezhe jishinda ja kwibapokolwelamo ku bundengamambo ne kwibakwasha kufwenya kwipi ne aye. w24.08 3 ¶3-4

Bantu ba Yehoba bavula bapayankana bingi mu bwikalo bwabo. Twingila mingilo ya ku mubiji ya kwikwashishamo atweba bene ne kumwena ba mu kisemi kyetu. (1 Timo. 5:8) Bena Kilishitu bavula balama balongo babo bakolwa nangwa bakote. Kabiji atweba bonse twibikako kumona’mba tuji na butuntulu bwetu bwa mubiji bwawama mu bwikalo bwetu. Kunungapo tuji na mingilo ikwabo yanema yo twingila mu kipwilo. Mwingilo umo wanema ke kusapwila mambo awama papelela bulume bwetu. Kutanga Baibolo kuji pa “bintu byanemesha” bena Kilishitu byo bafwainwa kubanga. Onkao mambo, twafwainwa kubanga bino kimye kyonse. Salamo mutanshi waamba pa mwanamulume wa lusekelo amba: “Aye usekela monka mu mizhilo ya Yehoba, kabiji utanga mizhilo yanji ne kulanguluka langulukapo mute ne bufuku.” (Sala. 1:1, 2) Kino kibena kulumbulula’mba twafwainwa kumonangapo kimye kya kutanga Baibolo. Pano ñanyi kimye kyawama kutanga Baibolo? Mikumbu yetu yakonsha kupusana. Kintu kyanema ke kusala kimye kyawama kiketulengelanga kutanga Baibolo kimye kyonse. w24.09 3 ¶5-6

Nanchi mwina Kilishitu wakoma ku mupashi ukebewa kumukwasha ku bakwabo nyi? Ee. Bena Kilishitu baji na bulunda bwakosa ne Yehoba nabo balomba bukwasho pa bimye bimo. Muntu ubena kukoma ku mupashi ukeba kumubuula bya kuba nangwa kumufuukwilako bintu byo afwainwa kwifuukwila mwine. Kupusanako na muntu ubena kukoma ku mupashi, mwina Kilishitu wakoma ku mupashi ulomba maana ku bakwabo baji na maana ne kuyuka bintu bulongo. Kabiji wayuka kuba’mba wakonsha kwifuukwila mwine kyo akeba kuba, ne ‘kwisendela mwine kisendwa kyanji.’ Byonkatu bantu bakoma byo babula kumweka kintutu kimo, ne bena Kilishitu bakoma ku mupashi kechi baji na byubilo bintutu bimo, nabiji maana, kuchinchika, bumpanyi ne kifyele ne. Kabiji bena Kilishitu bakoma ku mupashi babiji inge bapita mu lukatazho lwipasha, bakonsha kufuukula kwesakana na byaamba Binembelo. Pano bino, byo bakonsha kufuukulapo byakonsha kupusana. Javula kino kimweka inge kya kuba bena Kilishitu bafuukulapo kwesakana na jiwi jabo ja mu muchima. Onkao mambo, mwina Kilishitu wakoma ku mupashi kechi uzhachisha  mukwabo na mambo a kuba’mba mukwabo wafuukulapo kyapusana na kyo afuukulapo ne. Kabiji batwajijila kukwatankana.​—Loma 14:10; 1 Ko. 1:10. w24.04 4 ¶7-8

Mwakonsha kuba byepi inge mwimona’mba kechi mwanema ne? Tangai ne kulanguluka languluka pa byepelo bya mu Baibolo byakonsha kwimulengela kuyuka’mba Yehoba wimunemeka. Inge mwakankalwa kufikizha kikonkwanyi kyenu nangwa mwalefulwa na mambo a kuba kechi mubena kuba byuba bakwenu ne, kechi mwafwainwa kwizhachisha ne. Aye kechi uketekela anweba kuba bintu byo mwakonsha kukankalwa kuba ne. (Sala. 103:13, 14) Inge bakimumanyikapo kala nangwa kwimukuna, kechi mwafwainwa kwizhachishanga na mambo a byobyo bintu byatama bimubile bantu ne. Kechi yenu mwalengejile’mba bintu byatama bimumwekele ne. Yukai’mba Yehoba ukazhachisha bantu boba bakwabo byatama ne kukwasha boba bo bamanyika. (1 Pe. 3:12) Kechi mwafwainwa kuzhinauka’mba Yehoba wakonsha kwimwingijisha kukwasha bakwenu ne. Yehoba wimunemeka pa kwingijila nanji pamo mu mwingilo wa kusapwila. (1 Ko. 3:9) Makatazho o mwapitamo emulengela kuyuka ne kumvwina lusa boba babena kupita mu makatazho. Mwakonsha kwibakwasha mu bintu byavula. w24.10 7-8 ¶6-7

Yehoba umona inge babena kwituba nshiji. “Yehoba watemwa bunchibamambo bwaoloka.” (Sala. 37:28) Yesu witulaya kuba’mba Yehoba ‘ukapelawizha kwituchibila mambo’ inge kimye kyanji kyafika. Kabiji katatakatu akafumyepo buyanji ne nshiji yonse. (Sala. 72:1, 2) Tubena kutengela kimye Yehoba kyo akafumyapo makatazho onse. Pano bino ne lunotu witukwasha kuchinchika inge bantu betuba nshiji. (2 Pe. 3:13) Witufunjisha byo twafwainwa kuba inge betuba nshiji. Jishinda jimo jo obilamo bino ke kwitubuula Yesu byo aubile. Kabiji Yehoba witubuula mu Baibolo bintu byafwainwa kwitukwasha inge betuba nshiji. w24.11 2-3 ¶3-4

Yesu byo aambile pa kujisha mabumba kyamwekelenga nobe kechi kisakubiwa ne, mambo kwajinga jibumba ja banabalume 5,000. Inge kubajilako banabakazhi ne baana, ko kuba’mba bantu bonse ba kujiisha bajinga 15,000. (Mat. 14:21) Andeleo waambile’mba: “Paji uno kalombwana uji na bashinkwa batanu ba mbale ne tumasabi tubiji. Nanchi bino byakonsha kukumbana bano bonse nyi?” (Yoa. 6:9) Bantu bayanji javula bo bajanga bashinkwa ba kulenga na mbale kabiji kyamweka tuno tumasabi tucheche twajinga twauma to babikijileko jimo mukele. Nangwa byonkabyo, kajo kajinga na uno kalombwana kechi kakonsheshe kukumbana bantu bonse ne. Na mambo a kuba’mba Yesu wakebelenga kwibakwasha, waambijile bantu kwikala mu bilumbiji pa nsono. (Mako 6:39, 40; Yoa. 6:11-13) Tutanga kuba’mba Yesu walombele kwi Shanji pa shinkwa ne masabi. Byo alombele kwi Lesa, wamwesheshe kuba’mba Lesa ye wanengezhezhe kano kajo. Ku kino tufunjilako kuba’mba twafwainwa kulomba saka tukyangye kutendeka kuja. Kepo Yesu aambijile baana banji ba bwanga kupana kajo ku bantu kabiji bonse bajiile ne kwikuta. w24.12 2-3 ¶3-4

Yesu byo jinga pano pa ntanda, wapele Shanji lukumo mambo wabuujilenga bantu kuba’mba Yehoba ye wamupele bulume bwa kuba bya kukumya. (Mako 5:18-20) Kabiji Yesu wapele Yehoba lukumo kupichila mu byambo byo aambanga pe Shanji ne byo aubanga na bantu. Juba jimo, Yesu wafunjishenga mu nshinagoga. Pa bantu bamutelekelenga pajinga ne mwanamukazhi ye bamanyikile bingi ku bandemona pa myaka 18. Ndemona walengejile uno mwanamukazhi kukonkomana kabiji kechi wainukanga ne. Kino kyatamine bingi. Na mambo a kumumvwina lusa, Yesu wayile ku uno mwanamukazhi ne kumwambila na kifyele’mba: “Obewa mwanamukazhi, kikola kyobe kyapwa.” Kepo amutentekele maboko anji, ne aye ponkapotu waolokele kabiji “watatwile kutumbijika Lesa.” Waikele jibiji na butuntulu bwa mubiji bawama kabiji bantu bamunemekele. (Luka 13:10-13) Uno mwanamukazhi wajinga na bishinka byamulengejile kupa Yehoba lukumo, ne atweba kyo kimotu. w25.01 2-3 ¶3-4

Nanchi twakonsha kubwezha bintu byonse byaelele Adama ne Evwa nyi? Kechi twakonsha atweba bene na bulume bwetu ne. (Sala. 49:7-9) Kwa kubula bukwasho bwa Yehoba, kechi twakonsha kwikala na luketekelo lwa kukekala myaka ne myaka nangwa kusangulwa ne. Kabiji inge tufwatu nobe banyama kwa kubula kwikala na luno luketekelo. (Sapwi. 3:19; 2 Pe. 2:12) Shetu aye Yehoba witupa bupe bukatampe bingi bwa kufumyapo bundengamambo bo twaswaine kwi Adama. Yesu walumbulwile kino kishinka’mba: “Lesa watemenwe bingi ba pano pa ntanda kya kuba wapaine Mwananji yenkawa umotu, kuba’mba bonse bamwitabila kechi bakonaike ne, poso bakekale na bumi bwa myaka ne myaka.” (Yoa. 3:16) Kunungapo, bonka buno bupe bwitulengela kwikala na bulunda bwawama ne Yehoba. Twakonsha kumwenamo mu buno bupe bwanema ne kulekelwa mambo etu nangwa’mba “nkongole”. w25.02 3 ¶3-6

Ñanyi kintu kyakwashishe Saulo kufuukulapo kubatizhiwa? Nkambo ye batumbijikile aye Yesu byo amwekele kwi aye, Saulo walekele kumona. (Byu. 9:3-9) Pa moba asatu, kechi wajiilepo kajo ne, kabiji kwakubula nangwa kuzhinaukatu ne, walangulukilenga pa kintu kyamumwekejile. Ibyo, Saulo washiinwe’mba Yesu wajinga Mesiasa kabiji amba baana banji ba bwanga bajinga mu bupopweshi bwa kine. Kuji bintu byo twakonsha kufunjilako kwi Saulo. Kwitota ne moyo wa kuchiina bantu kwakonsheshe kumulengela kubula kufuukulapo kubatizhiwa. Pano bino, kechi byo byo aubile ne. Saulo wafuukwilepo kwikala mwina Kilishitu nangwa kya kuba wayukile’mba bakamumanyikanga. (Byu. 9:15, 16; 20:22, 23) Byo abatizhiwe, watwajijile kuketekela mwi Yehoba kuba’mba ukamukwashanga kuchinchika meseko apusana pusana o akapitangamo. (2 Ko. 4:7-10) Inge mwabatizhiwa ne kwikala Kamonyi wa kwa Yehoba, mwafwainwa kuyuka’mba mukapitanga mu meseko akesekanga lwitabilo lwenu. Nangwa byonkabyo, mwafwainwa kushiinwa’mba Lesa ne Kilishitu bakatwajijila kwimukwasha.​—Fili. 4:13. w25.03 4 ¶8-9

Kutanga Baibolo ke kikonkwanyi kyawama bingi kyo twafwainwa kwibikila. Nangwa byonkabyo, kuji ne bintu bikwabo byo twafwainwa kuba pa kutanga Baibolo pa kuba’mba tumwenengamo. Akilangulukai pa kino: Bijimwa bikebewa mema a mvula pa kuba’mba bikome. Pano bino, inge mvula mukatampe wanoka mu ka kimyetu kacheche, mema avujisha mu mushiji. Inge mvula mukwabo wanoka, mema atentamina kabiji kechi akatwela mu mushiji ne, kabiji bijimwa kechi bikakoma bulongo ne. Pafwainwa kupita kimye pa kuba’mba mema atwele mu mushiji ne kulengela bijimwa kukoma bulongo. Po pamotu, kechi twafwainwa kupitangamotu kapambala pa kutanga Baibolo kya kuba twakankalwa kumvwisha, kuvuluka ne kwingijisha byo twatanga ne. (Yako. 1:24) Nanchi pa bimye bimo mupitamotu kapambala pa kutanga Baibolo nyi? Inge byo byo kiji, ñanyi kintu kyo mwafwainwa kuba? Tangainga pachepache. Akitulumanaiko ne kulanguluka pa byo mubena kutanga nangwa byo mwatanga kala. Mwafwainwa kwikalanga na kimye kyabaya kya kutanga ne kya kulanguluka langulukangapo pa byo mubena kutanga. w24.09 4 ¶7-9

Inge batambwila mikambizho, bakulumpe mu kipwilo bafwainwa kwiitanga ne kwiyumvwisha mo yatala ne kuba kwesakana na byo bebakambizha. Batambwila mikambizho yapusana pusana. Mikambizho imo ibakwasha kuyuka bya kwamba bulongo majashi mu kipwilo ne bya kulomba kwimenako balongo ne banyenga. Kabiji batambwila mikambizho ikwabo ibakwasha kuyuka mwa kulamina bulongo mikooko ya Kilishitu. Bakulumpe mu kipwilo inge kebalondele mikambizho ifuma ku jibumba jetu, bakwasha balongo ne banyenga kuyuka’mba Yehoba wibatemwa kabiji wibazhikijila. Inge twatambwila mikambizho ku bakulumpe mu kipwilo, twafwainwa kwiilondela na muchima wetu yense. Inge twauba bino, tukalengela boba babena kwitutangijila kwingila bulongo mingilo yabo. Baibolo witutundaika kukookela ne kunekenena boba betutangijila. (Hebe. 13:7, 17) Kimye kimo kyakonsha kwitukatazha bingi kuba bino. Mambo ka? Mambo bano banabalume bambulwakulumbuluka. Nangwa byonkabyo, inge ketutetu muchima pa bintu byo balubankanya, ne kubula kuta muchima pa bintu byawama byo boba, kino kikamwesha’mba tubena kutundaika balwanyi betu. Mu ñanyi jishinda? Tukatendeka kulengulula jibumba ja Lesa. w24.04 10 ¶11-12

Nanchi bantu bonse bakafwa na mambo a bintu bikamweka mu kimye kya malwa akatampe, bakonaika myaka ne myaka kwa kubula kwikala na luketekelo lwa kukebasangula nenyi? Binembelo byaambishatu patoka’mba balwanyi bo bakonauna kwi Yehoba ne nzhita yanji pa Amagedonyi kechi bakasangulwa ne. (2 Tesa. 1:6-10) Pano ibyepi pa bantu bakonsha kufwa na mambo a kukolwa, bukote, mapuso nangwa bo baipaya ku bakwabo? (Sapwi. 9:11; Zeka. 14:13) Nanchi bamo pa bano bantu bakekala pa bantu “babula koloka” bo bakasangula mu ntanda ipya nyi? (Byu. 24:15) Kechi twayuka ne. Pano bino twayuka bintu byavula bingi pa bikamweka kulutwe. Twayuka kuba’mba pa Amagedonyi, bantu bakebachibila mambo kwesakana na byo baubanga ku balongo ba kwa Kilishitu. (Mat. 25:40) Kabiji aba batundaika bashingwa ne Kilishitu bakebachibila mambo amba mikooko.​—Lum. 12:17. w24.05 10-11 ¶9-11

Baibolo walumbulula ano moba o tubena kwikalamo amba ke “bimye byakatazha.” (2 Timo. 3:1) Kununga pa makatazho apitamo bantu bonse mu ino ntanda yatama, bantu ba Yehoba bebamanyika na mambo a kumwingijila. Ñanyi kintu kitukwasha kutwajijila kupopwela Yehoba nangwa kya kuba tupita mu ano makatazho? Kintu kine kitulengela ke kuyuka kuba’mba Yehoba ye “Lesa mumi.” (Yele. 10:10; 2 Timo. 1:12) Yehoba umona makatazho onse o tupitamo kabiji kimye kyonse umonapo mashinda mwa kwitukwashisha. (2 Moba 16:9; Sala. 23:4) Kumumona’mba aye ye Lesa mumi kwakonsha kwitukwasha kuchinchika meseko onse o twakonsha kupitamo. w24.06 20 ¶1-2

Twafwainwa kutwajijila kuketekela jibumba ja Yehoba. Inge kyamwekeshatu patoka kuba’mba twafwainwa kupimpulako mu ngumvwino ya bukine bwa mu Baibolo nangwa mu mwingilo wetu wa Bufumu, aba batangijila kechi bazhinyazhinya kupimpulako ne. Boba bino, mambo kintu kyo bakebesha ke kutokesha Yehoba ku muchima. Kabiji pa kufuukula bintu, bebikako bingi kwingijisha Mambo a Lesa muji mizhilo ilondela bantu ba Yehoba bonse. Mutumwa Paulo witujimwineko’mba: ‘Kwachishainga ku musango wa byambo byawama.’ (2 Timo. 1:13) “Musango wa byambo byawama” ulumbulula mafunjisho a bena Kilishitu ataanwa mu Baibolo. (Yoa. 17:17) Mafunjisho a uno mutundu po paimena byonse byo twaitabilamo. Jibumba ja Yehoba jitufunjisha kukakachila ku ano mafunjisho. Inge twatwajijila kuba bino, Yehoba uketupesha. w24.07 11-12 ¶12-13

Mutumwa Petelo wayukile ene mambo o kyanemena kulapila ne kulekelwa mambo. O ene mambo o afunjishe bakwabo pa bino bintu. Byo papichile kimye panyuma ya kijiilo kya pa Pentekosita, Petelo waambile jashi ku jibumba ja Bayudea babujile kwitabila ne kwibalumbulwila’mba baipayile Mesiasa. Nangwa byonkabyo, wibatundaikile’mba: “Lapilai ne kwaluluka pa kuba’mba mambo enu beazhimañanye, ne Yehoba ukemukokolosha.” (Byu. 3:14, 15, 17, 19) Petelo wamwesheshe’mba kulapila kulengela ndengamambo kwaluluka ko kuba’mba kupimpula ndangulukilo ne byubilo byanji byatama ne kutendeka kuba bintu bitokesha Lesa ku muchima. Mutumwa Petelo wamwesheshe’mba Yehoba uzhimañanya mambo abo nangwa’mba kwiafuuta. Kino kitekenesha bena Kilishitu kuba’mba inge balenga mambo nangwa abayepotu byepi, Lesa ukebalekelako mambo. w24.08 12 ¶14

Kiketupelela bingi kubula kutemwisha bintu bya ku mubiji inge twaikala na lwitabilo lwakosa ne kuyuka’mba mpelo ya buno bwikalo bwatama ijitu pepi. Mu kimye kya malwa akatampe, bantu “bakataya siliva mu mikwakwa” mambo bakayuka’mba “siliva nangwa ngolode yabo kechi bikebapulusha mu juba ja bukaji bwa Yehoba ne.” (Ezi. 7:19) Mu kifulo kya kuta muchima pa kukebesha kwikala na mali avula bingi, twafwainwa kubanga bintu byakonsha kwitukwasha kumwena ba mu kisemi ne kwitulengela kutwajijila kwingijila Yehoba. Kabiji twafwainwa kuchinuzhukanga makongole nangwa kwingijishanga kimye kyabaya na kukebatu bya ku mubiji. Kechi twafwainwa kutesha muchima ku bipe byo tuji nabyo ne kwibimona’mba byo bintu byanema bingi mu bwikalo bwetu ne. (Mat. 6:19, 24) Mpelo ya buno bwikalo byo ibena kufwenya pepi, twafwainwa kusalapo kana kuketekela mwi Yehoba nangwa mu bipe byetu. w24.09 11 ¶13-14

Inge twibikako, twakonsha kushinda bintu byatama byo twakonsha kuba na mambo a bumbulwakulumbuluka bwetu. Pano bino, bintu bimo byakonsha kwitukatazha pa kuba’mba twibishinde. Akilangulukai pa byamwekejile mutumwa Petelo. Kuchiina bantu kwamulengejile kukaana Yesu pa bimye bisatu. (Mat. 26:69-75) Kyamweka Petelo walekele kwikala na moyo wa kuchiina bantu byo asapwijile na kuchinchika mu kije kya Saniedilini. (Byu. 5:27-29) Nangwa byonkabyo, pa kupitapo myaka, pa kakimye kacheche, walekele kujiila pamo na bantu babujile Bayudea “na mambo a kuchina boba ba mukanda.” (Nga. 2:11, 12) Petelo waikele jikwabo na moyo wa kuchiina bantu. Kampe moyo wanji wa kuchiina bantu kechi wapwile ne. Ne atweba kintu kya uno mutundu kyakonsha kwitumwekela. Nangwa byonkabyo, twakonsha kushinda muteeto ye twakankalwa kuleka inge twalondela lujimuno lwa kwa Yesu lwa kuba’mba: “Labainga ne kukenkenta.” (Mat. 26:41) Nangwatu mu bimye byo mumona’mba mwakosa, chinuzhukainga bintu byakonsha kwimulengela kuponena mu lweseko. Twajijilai kwingijisha mashinda emukwashishe kushinda yewo muteeto.​—2 Pe. 3:14. w24.07 18-19 ¶17-19

Kafwako muntu nangwa umo wakwashapo bantu kukila byaubile Yesu ne. Byo ajinga pano pa ntanda, javula wakwashanga bantu kwingijisha bya kukumya. (Luka 9:12-17) Wapaine bupe bwakila bonse byo etufwijile. (Yoa. 15:13) Kufumatu kimye kyo bamusangwile, Yesu watwajijila kwitukwasha. Byonkatu byo alayile, usashijila Yehoba kwitupa mupashi wazhila wa kwitufunjisha ne kwitutekenesha. (Yoa. 14:16, 17, tubyambo twa munshi; 16:13) Kabiji pa kupwila, Yesu watwajijila kwitukwasha kufunjisha bantu kwikala baana ba bwanga mwaya ntanda yonse. (Mat. 28:18-20) Mutumwa Paulo wanembele’mba Yesu byo ayile mwiulu, “wapaine bantu kwikala bya bupe.” (Efi. 4:7, 8.) Paulo walumbulwile’mba Yesu wapaine bino bya bupe pa kuba’mba bakwashenga kipwilo mu mashinda apusana pusana. (Efi. 1:22, 23; 4:11-13) Bano banabalume bambulwa kulumbuluka kabiji balubankanya. (Yako. 3:2) Nangwa byonkabyo, Nkambo yetu aye Yesu Kilishitu bo bo engijisha kwitukwasha kabiji ke bya bupe byo etupa. w24.10 18 ¶1-2

Davida wabuujile mwananji aye Solomone amba bafwainwetu kumupesha inge watwajijila kukookela Yehoba Lesa. Pano bino mu kuya kwa moba, Solomone watendekele kupopwela balesa ba bubela. Yehoba walekele kumupesha kabiji walekele kumupa maana amukwashishenga kulama bantu bulongo mu bololoke. (1 Mfu. 11:9, 10; 12:4) Ñanyi bintu byo tubena kufunjilako? Kukookela kulengela Yehoba kwitupesha. (Sala. 1:1-3) Nangwa byonkabyo, Yehoba kechi walaya kwitupa bunonshi ne lukumo byonka byo aubile kwi Solomone ne. Pano bino, inge ketukookele Lesa wetu, uketupa maana aketukwashanga kufuukula bintu bulongo. (Maana 2:6, 7; Yako. 1:5) Mafunde anji akonsha kwitukwasha kusala bulongo nkito ne bya kisangajimbwe byawama, kuyuka bulongo po twafwainwa kupelela pa kufunda sukulu ne kubula kutemwisha mali. Kwingijisha maana a Lesa kuketuzhikijila ku bintu byatama byakonsha konauna bulunda bwetu ne Lesa. (Maana 2:10, 11) Tukekala na balunda bawama bavula kabiji tukekala na lusekelo mu kisemi kyetu. w24.11 10-11 ¶11-12

Anweba bansemi, ikalaingapo na kimye kya kwisamba na mwanenu pa Baibolo ne pa kwitabila mwi Lesa. Mwakonsha kufunjisha mwanenu pa bino bintu inge kya kuba ke mwikalepo na kimye kya kufwakesha bishimikwa mo balamina bintu bya kala. Mwakonsha kumumwesha mwanenu bintu bimo bya kala nangwa bipikichala byo byakwatankana na bintu bimo byaamba Baibolo. Kuba bino kukakwasha mwanenu kuyuka’mba byaamba Baibolo bya kine. Kampe mwakonsha kufunjisha mwanenu pa jibwe ja Moabu paji jizhina ja Yehoba. Jino jibwe jaikala myaka kukila 3,000. Pa ofweshi mukatampe wa ntanda yonse wa Bakamonyi ba kwa Yehoba wa mu Warwick mu New York, inge mwaya pa mpunzha po banemba’mba “The Bible and the Divine Name,” paji kipikichala po bamwesha jibwe ja Moabu. Jino jibwe ja Moabu paji byambo bya kuba’mba Mfumu Mesha wa bena Moabu, wasatukijile bena Isalela. Abino byo byaamba ne Baibolo. (2 Mfu. 3:4, 5) Mwanenu inge wimwena bino bishinka byonse byaamba Baibolo, lwitabilo lwanji lukakosa bingi. w24.12 14 ¶4; 15 ¶6